Aydın Əliyev: “Ümumilikdə, bu, bölgələrdə həkim təminatına, keyfiyyətin yaxşılaşmasına müsbət təsir edəcək”
Birinci vitse-prezident Mehriban xanım Əliyeva tibb işçilərinin maddi rifahının yaxşılaşdırılması, əməyinin yüksək qiymətləndirilməsi və səhiyyə sistemində insan kapitalının gücləndirilməsi məqsədilə TƏBİB sistemində çalışan tibb işçilərinin əməkhaqlarının artırılması təşəbbüsü ilə çıxış edib.
Prezident İlham Əliyev bu təşəbbüsü müsbət qarşılayıb və icrası ilə bağlı müvafiq tapşırıq verib. Bu, tibb işçilərinin sosial rifahının yüksəldilməsi istiqamətində növbəti mühüm addımdır. Yeni əməkhaqqı qaydaları 2026-cı il sentyabrın 1-dən tətbiq olunacaq və TƏBİB-in tabeliyindəki tibb müəssisələrində çalışan 72 212 tibb işçisini əhatə edəcək.
Mehriban xanımın bu təşəbbüsü bölgə səhiyyəsində indiyə qədər mövcud olmuş hansı problemləri, çatışmazlıqları həll edəcək? Məsələn, tez-tez bölgələrdə həkim çatışmazlığından bəhs edilir. Hətta parlamentdə Səhiyyə Komissiyası qərarda verdi ki, regionlarda yaşı 65 olan həkimlər işləməkdə davam etsinlər. Çünki bölgələrdə ixtisaslı həkimlərin çatışmazlığı, maaşın aşağı olması problemi var. Bir sözlə, bu təşəbbüs rayon səhiyyəsində hansı problemləri aradan qaldıracaq və bölgələrdə səhiyyənin ümumi səviyyəsinin yüksılməsində nə rol oynayacaq?
Tibb Universitetinin Farmokologiya kafedrasının dosenti, tanınmış həkim Aydın Əliyev bununla bağlı baki-xeber.com-a açıqlamasında bildirdi ki, bu, bölgələrdə səhiyyə xidmətinin yaxşılaşmasına müsbət təsir göstərəcək: “O baxımdan birmənalı olaraq bu təşəbbüsə və qərara müsbət yanaşıram. Bununla belə, diaqnozun dəqiq olması üçün regionlarda zəruri avadanlıqların, laboratoriyaların olması vacibdir. Kəndlərdə işləyən həkimlərə daha çox yük düşür. Çünki həkim çatışmır. Paytaxta əhalinin axını həm də yerlərdə səhiyyə xidmətinin zəif olması ilə bağlıdır. O baxımdan həkimlərin məvaciblərinin artırılması çox müsbət haldır. Bu, həkimlərin məsuliyyətini daha da artıracaq. İşlərinin keyfiyyətinə daha yaxşı təsir edəcək. Ümumilikdə, bu, bölgələrdə həkim təminatına, keyfiyyətin yaxşılaşmasına müsbət təsir edəcək. Həkimlərin böyük şəhərlərə axınının qarşısını alacaq. Səhiyyənin təminatı yaxşılaşacaq. Bu da əhalinin sağlamlığının qorunması baxımından mühüm əhəmiyyət kəsb edir”.
Vidadi ORDAHALLI
