Əpoş Vəliyev: “Uşağın analizində psixotrop maddənin necə və hansı şəraitdə aşkarlandığı müəyyən edilməli, məsul şəxslər varsa, onlara hüquqi qiymət verilməlidir”
Bakının Yasamal rayonunda fəaliyyət göstərən 98 saylı uşaq bağçasına gedən uşağın analizlərinin nəticəsində qanında psixotrop dərman aşkarlanması ilə bağlı araşdırma aparılır.
Bu barədə KİV-in sorğusuna cavab olaraq, Bakı Şəhəri üzrə Təhsil İdarəsindən məlumat verilib.
Bildirilib ki, araşdırmanın nəticəsi barədə ictimaiyyətə məlumat veriləcək.
"Sosial şəbəkələrdə Yasamal rayonundakı 98 saylı uşaq bağçasına cəlb olunmuş azyaşlının səhhətində və davranışında neqativ dəyişikliklərin müşahidə edilməsi, habelə aparılmış tibbi müayinələr zamanı orqanizmində sağlamlığına mənfi təsir göstərə biləcək maddələrin aşkarlanması barədə yayılan məlumatlar dərhal nəzarətə götürülüb". Bu barədə isə Ailə, Qadın və Uşaq Problemləri üzrə Dövlət Komitəsindən KİV-nın sorğusuna cavab olaraq bildirilib.
Qeyd edilib ki, azyaşlının valideynləri Dövlət Komitəsinə dəvət olunub, onlardan məsələ ilə bağlı ətraflı məlumat alınıb.
"Faktın bütün təfərrüatları ilə birlikdə obyektiv və hərtərəfli araşdırılması, eləcə də azyaşlının hüquq və mənafelərinin qorunmasının təmin edilməsi məqsədilə Dövlət Komitəsi tərəfindən Daxili İşlər Nazirliyinə və Baş Prokurorluğa rəsmi müraciətlər ünvanlanıb. Hazırda aidiyyəti dövlət qurumları tərəfindən zəruri tədbirlər davam etdirilir. Araşdırmanın nəticələrinə əsasən qanunvericiliyin tələblərinə uyğun, müvafiq qaydada tədbirlər görüləcəkdir", - məlumatda qeyd olunub.
"Sosial Təşəbbüs MMC"nin rəhbəri Emil Maqalov mətbuata deyib ki, bağça yaşında olan uşağa narkotik maddə vurmaq və ya qəbul etdirmək qeyri-mümkün bir şeydir.
Onun sözlərinə görə, hazırda Azərbaycanda yayılmış bəzi narkotik maddələrdən, hətta ən az dozada belə qəbul olunarsa, uşaq həmin an dünyasını dəyişə bilər:
“Azərbaycanda qan analizləri ilə belə halların aşkarlanması demək olar ki, yox vəziyyətindədir. Narkotik maddələrin qəbulunu əsasən sidik analizi ilə müəyyən etmək mümkündür. Qan analizi isə çox bahadır və demək olar ki, heç kim bu üsuldan istifadə etmir. Bu səbəbdən belə bir məlumatı yayan şəxs bunu mütləq şəkildə sidik analizi ilə araşdırmalı və ya yaydığı xəbərə görə məsuliyyət daşımalıdır. Aidiyyəti qurumlardan xahiş edirəm ki, bu məsələni nəzarətə götürsünlər, dərhal aydınlaşdırsınlar və səhv məlumat yayan şəxslər məsuliyyətə cəlb olunsunlar. Çünki bu məsələ təkcə uşağa deyil, onun valideynlərinə, yaxınlarına, uşağa məhəbbəti olan insanlara və həmin bağçanın adına, imicinə də çox böyük xətər yetirə bilər"-deyə E.Maqalov yerli mətbuata bildirib.
Təhsil üzrə mütəxəssis Əpoş Vəliyev baki-xeber.com-a bildirdi ki, bu çox ciddi iddiadır və bu hərtərəfli şəkildə araşdırılmalıdır. Rəsmi qurumların bu məsələnin ardınca sona qədər getməli olduğunu deyə Ə.Vəliyev hesab edir ki, sosial şəbəkədə yayılan bu iddia cəmiyyətdə geniş rezonans yaradıb.
“Sosial şəbəkələrdən öyrəndiyim bu hadisə çox ciddi məsələdir və ilk növbədə tam və obyektiv araşdırılmalıdır. Uşağın analizində psixotrop maddənin necə və hansı şəraitdə aşkarlandığı müəyyən edilməli, məsul şəxslər varsa, onlara hüquqi qiymət verilməlidir. Lakin məsələni yalnız bir bağça ilə məhdudlaşdırmaq olmaz. Bütün məktəbəqədər müəssisələrdə uşaqların təhlükəsizliyi ilə bağlı ciddi audit aparılmalıdır.
Bağçalarda dərmanların, xüsusilə psixotrop preparatların saxlanması və uçotu, videomüşahidə, əməkdaşların fəaliyyəti və uşaqlara nəzarət sistemi gücləndirilməli, mütəmadi xəbərdarlıqsız yoxlamalar keçirilməlidir. Valideynlərin şikayətləri də formal xarakter daşımamalı, hər bir müraciət operativ və şəffaf şəkildə araşdırılmalıdır.
Burada söhbət ən həssas və özünü müdafiə edə bilməyən təbəqədən, uşaqlardan gedir”.
Ə.Vəliyev qeyd etdi ki, “Uşaq hüquqları haqqında” Azərbaycan Respublikasının Qanununun 18.3-cü maddəsinə əsasən, təhsil müəssisələrində uşağa qarşı zorakılıq qadağandır və uşağın zorakılıqdan müdafiə olunmaq hüququ var. “Qanunun 11-ci maddəsi də hər bir uşağın yaşamaq və inkişaf etmək hüququnu təsbit edir.
Ona görə də bağçalarda nəzarət hadisədən sonra reaksiya vermək prinsipi ilə deyil, hadisənin baş verməsinə imkan verməyən preventiv sistem əsasında qurulmalıdır. Uşaqların təhlükəsizliyi məsələsində səhlənkarlığa və məsuliyyətsizliyə sıfır tolerantlıq olmalıdır”-deyə Ə.Vəliyev vurğuladı.
İradə SARIYEVA
