Rusiya Dövlət Duması ölkədə sahibkarlıq və əmək fəaliyyəti ilə məşğul olan Ermənistan vətəndaşlarının milli sürücülük vəsiqələrinin tanınması haqqında qanun layihəsinə baxılmasını qeyri-müəyyən müddətə təxirə salmaq qərarına gəlib. Bu barədə Rusiya parlamentinin mətbuat xidmətinin spikeri Vyaçeslav Volodindən sitat gətirilir:
“Ermənistana gəlincə, biz görürük ki, rus dilinin statusu yoxdur. Hökumətin son qərarları isə qətiyyən bu sahədə münasibətləri inkişaf etdirmək məqsədi daşımır”.
O vurğulayıb ki, əslində bu qanun layihəsində Ermənistana əlavə üstünlüklər verilməsi təklif olunur. Ancaq rəsmi İrəvan rus dilinin statusunun möhkəmləndirilməsi üçün heç bir addım atmayıb. Məhz bu əsasda Rusiya Federasiyası digər ölkələrin milli sürücülük vəsiqələrinin Rusiya ərazisində istifadəsinə icazə verir:
“Biz Belarus, Qazaxıstan və Qırğızıstanla bağlı belə qərarlar qəbul etdik. Çünki konstitusiyaya uyğun olaraq onlarda rus dilinə müəyyən status tətbiq edilib”.
Plenar iclasın əvvəlində qanun layihəsinə baxılmasının dayandırılması təklifini Nəqliyyat və Nəqliyyat Strukturunun İnkişafı Komitəsinin rəhbəri Yevgeni Moskviçev verib.
Politoloq Elşən Mustafayev “Bakı-Xəbər”ə açıqlamasında bildirdi ki, Rusiya Ermənistana təzyiqləri davam etdirir: “Beynəlxalq Cinayət Məhkəməsinin Roma Statutunun ratifikasiyasına töhfə vermiş erməni deputatlara qarşı sanksiyaların tətbiqi ehtimalını istisna etmək olmaz. Bunu Rusiya Dövlət Dumasının Beynəlxalq əlaqələr komissiyasının sədr müavini Aleksey Çepa deyib. O qeyd edir ki, Ermənistan Baş naziri Nikol Paşinyanın rusofob siyasəti ABŞ-ın təzyiqi altında baş verir, lakin bu cür hərəkətlərə görə deputatlar da məsuliyyət daşıyırlar. Rusiyanın atdığı bu addın erməni əslilli miqrantların güzəranına pis təsir edəcək. Çünki bir çoxları məhz həmin sənədin hesabına taksi və yükdaşıma fəaliyyətilə məşğul olurdu. Rusiya açıq şəkildə deyir ki, bu addımı təzyiq üçün atır. Hətta mahiyyətini də açıqlayır ki, Ermənistanda rus dilinə status verilmədiyi səbəbindən o da belə edir.
İki ölkə arasındakı bu gərgin münasibət yaxşı nəsə vəd etmir. Artıq Ermənistanda KTMT və Avrasiya İqtisadi Birliyindən çıxmaqla bağlı fikirlər səslənməyə başlayıb. Erməni cəmiyyəti hətta Rusiyanın hərbi bazasının da ölkədən çıxarılmasını tələb edir. Göründüyü kimi, dünənə qədər özünü Rusiyanın “müttəfiqi” hesab edən Ermənistan Rusiya ilə “danışığa” sonuncu mərhələdə başlamaq niyyətini ortaya qoyub. Bu isə Rusiya üçün olduqca ciddi və həssas məsələdir. Xatırladaq ki, Beynəlxalq Cinayət Məhkəməsinin Roma Statutu 15 iyun 1998 - 17 iyul 1998 tarixləri arasında Birləşmiş Millətlər Təşkilatı Konfransının İtaliyanın paytaxtı Romada qəbul etdiyi Beynəlxalq Cinayət Məhkəməsinin Qurulması haqqında statusdur. 2016-cı ilin mart ayından etibarən 139 dövlət müqaviləni imzalasa da, cəmisi 124 dövlət bu müqaviləni təsdiqləyib ki, Ermənistan da son mərhələni adlamaqla 125-ci tamhüquqlu təsdiqçi ola bilər - təbii ki, bu da Rusiya ilə ikitərəfli əlaqələrin konkret olaraq dayandırılmasına belə yol aça bilər. Baş verənlər, perspektivdə gözlənilənlər isə Rusiya ictimaiyyəti tərəfindən diqqətlə izlənilir. Rusiya KİV-in məsələyə münasibəti isə birmənalıdır - hətta vaxtilə Ermənistanın dəstəkçisi qismində çıxış edən, Azərbaycana qarşı antikampaniyalar aparan KİV, ekspertlər, siyasi şərhçilər və Duma deputatları belə bu acı reallığı etiraf etmək məcburiyyətində qalıblar - Ermənistanın Roma Statutunu qəbul etməsi, imzalaması ikitərəfli əlaqələrin bitməsi anlamına gəlir”.
Məhəmmədəli QƏRİBLİ
