Ermənistanla Rusiya arasında növbəti dəfə gərginlik yaranıb. İrəvanla Moskvanın üz-üzə gəlməsinə səbəb Rusiyanın məbləği artıq ödənilmiş silahların tədarükünü gecikdirməsi olub.
Ermənistan parlamentinin hakim “Vətəndaş müqaviləsi” partiyasından olan deputatı Andranik Koçaryan bununla bağlı narahatlığını dilə gətirib. Erməni parlamentari əks təqdirdə ölkəsinin buna səssiz qalmayacağını bildirib:
“İstənilən müqavilədə müddətlər var və bu müddətlərin pozulması halında sanksiyalar nəzərdə tutulur”.
Qeyd edək ki, Ermənistanla Rusiya arasındakı gərginlik son bir neçə ayda özünün ən pik nöqtəsinə çatıb. Moskvanın ikitərəfli ziddiyyətlərin dərinləşməsi fonunda pulu ödənilmiş silahları qəsdən Ermənistana vermədiyi ehtimal olunur.
Analitiklər hesab edir ki, Ermənistanın müdafiə naziri Suren Papikyanın Fransa səfəri məhz bu narahatlıqdan qaynaqlanır. Belə ki, erməni nazirin fransız həmkarı Sebastyan Lekornu ilə görüşünü bu kontekstdə şərh edənlər çoxluq təşkil edir. İddialara görə, S.Papikyanın gözlənilməz Paris səfərinin pərdəarxası məqamı bununla bağlıdır və rəsmi İrəvan arsenalını fransız silahları ilə doldurmaq niyyətindədir.
Əvvəla, bir daha təsdiqlənir ki, Ermənistan sürətlə silahlanmaya meyl göstərir. İkincisi, Ermənistan Rusiyaya hansı sanksiyaları tətbiq edə bilər?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, Rusiyanın bununla bağlı Ermənistanın qarşısına qoyacağı çox ciddi faktlar var: “Biz bilirik ki, zaman-zaman Ermənistan Rusiyadan əvəzsiz xeyli sayda, dəyəri milyonlarla ölçülən silahlar alıb. Rusiya zamanla öz əlini Ermənistanın üzərində saxlayıb. Son hadisələrə kimi heç vaxt əlini Ermənistanın üzərindən çəkməyib. Yəni Ermənistanın silahlanmaya bu qədər meyl göstərməsi Azərbaycanla müqayisədə heç nəyi dəyişmir. Azərbaycan Prezidenti, Ali Baş Komandanımızın dediyi kimi, Cənubi Qafqazda yaratdığımız yeni geosiyasi reallıqlar Ermənistan kimi marionetka bir dövlətin təsirini leqallaşdırır. Yəni Ermənistan Azərbaycan kimi sözü, siyasi xətti, əqidəsi, beynəlxalq hüquq tərəfindən qorunan mövqeyi olan bir ölkənin yaratdığı reallıqları dəyişdirməyə malik ola biləcək bir ölkə deyil. İkinci tərəfdən də, Ermənistan nə qədər silahlansa da xeyri yoxdu. Cənab Prezident bu 20 illik fəaliyyəti dövründə, hələ ilk vaxtlardan bəyan etmişdi ki, mənim üçün ən əsas fəaliyyət prioriteti ordu qurculuğu məsələsini daima ön planda saxlamaqdır və saxladı da. Bunu dövlətin və milli maraqlarımızın təminatçısı rolunda çıxış edən ordumuza verilən bir qiymət kimi də dəyərləndirə bilərik. Nəticə də göz qabağındadır. Ermənistan Rusiyaya nə sanksiya tədbiq edə bilər? Rusiya Ermənistana verdiyi silahların siyahısını çıxarsa, ermənistanlılar gərək şalvarlarını satıb o pulu ödəsinlər. Yəni bunlar hamısı formal məsələlərdi. Guya Rusiyaya qarşı qısa bir axındır. Ermənistanın havadarları, başda Fransa, Amerika olmaqla,7 guya Rusiyaya embarqo qoyurlar. Gülməli bir vəziyyətdir. Öz əhalisinə sahib çıxa bilməyən, öz siyasi kursu olmayan dövlətin belə bir iddiada olması çox gülüncdür. Tamamilə mənasız bir cəhddir”.
Məhəmmədəli QƏRİBLİ
