Separatçı, cani Vaqif Xaçaturyan həbs edildikdən sonra onunla bağlı bir sıra daha başqa əməllər ifşa olunub. Bəlli olub ki, erməni tərəfin "fağır" kimi qələmə verdiyi Xaçaturyanın cinayətləri Meşəli soyqırımı ilə bitmir, Ballıqaya faciəsinin də "müəllif"lərindən biri Xaçaturyan imiş.
Meşəli kəndində baş verən soyqırımın şahidi Azay Kərimov mətbuata "Mən o zaman Şuşa rayon Post Patrul Xidmətinin xüsusi təyinatlı batalyonunun qərargah rəisi idim. Həmin vaxt bizi vertolyotla Füzulinin Tuğ kəndinə atmışdılar. O zamanlar Meşəlidə də, Malıbəylidə də vəziyyət çox çətin idi. Bizdə silah yox idi, amma ermənidə hər şey var idi. Biz Tuğ kəndində olanda xəbər gəldi ki, ermənilər Meşəlini işğal edib. İşğaldan 8 saat sonra üç istiqamətdən Meşəliyə girdik. Ermənilər ordan taxıl oğurlayırdılar, Meşəlini qarət edirdilər. Orada 8 nəfər ermənini öldürdük, hamısı da Ballıca kənd sakini idi. Ballıca ilə Meşəli arasında 2-3 kilometr məsafə vardı. Qarabağda 4 kənd var idi ki, onların hər bir tərəfi ermənilərin yaşadıqları kəndlərlə əhatə olunmuşdu. Bütün yollar, cığırlar, hamısı ermənilərin yaşadıqları kəndlərin içindən keçməli idi. Həmin 4 ərazi Xocalı, Malıbəyli kəndi, Xocavəndin Qaradağlı kəndi, bir də Meşəli kəndi olub. Meşəlidən Ağdama getmək üçün mütləq sürətdə Ballıcadan keçməli idin. Orada balaca, 10-15 nəfərdən ibarət bölük var idi. 10-15 nəfər polis nə edə bilərdi ki? Bilirdik ki, orada vəziyyət ağırdır. Biz Meşəliyə çatanda ermənilər taxıl oğurlayırdılar, öz köhnə adət-ənənələrinə uyğun olaraq paltarlar, əşyalar oğurlayırdılar. Sonra kəndin yuxarı hissəsində ermənilər 4 nəfəri güllələmişdi. Həmin insanların kürəyinə bəlkə də iki daraq güllə boşaltmışdılar. Birinin qulağını, birinin başını kəsmişdilər. Təsəvvür edin, ev pişiyini, həyətdəki itləri belə güllələmişdilər. Bir itin də başını kəsib evin qabağına qoymuşdular. Tövləyə od vurub heyvanları içəridən çıxarmayıblar, dilsiz-ağızsız heyvanları yandırıblar. İydən, qoxuduan dayanmaq olmurdu...
Vaqif Xaçaturyanın Laçın sərhəd buraxılış məntəqəsində saxlanma xəbərini görən kimi kompüterimi götürüb atamgilə getdim. Atamın 90 yaşı var, demək olar ki, onun 48 ilini Malıbəyli kəndində təsərrüfat birliyi sədri işləyib. Vaqifi göstərib soruşdum ki, bu adamı tanıyırsan? Dedi ki, Vaqifdi, avtonəqliyyat müəssisəsində sürücü işləyirdi. Özü də qatı daşnak idi. Ondan sonra dedim ki, onu Laçın sərhəd buraxılış məntəqəsində saxlayıblar. Bütün cinayətlərin də hamısını törədən Vaqif olub. Xocalı soyqırımında işğalçıların əlli faizi Vaqifin kəndçiləri olub. 1992-ci il fevral ayında Xocalı işğal olunandan sonra, həmin ilin 24 aprelində Ballıca kəndində yaşayan ermənilər əsir düşən 150 azərbaycanlını dar ağacından asdılar. O vaxt Rəhim Qazıyevə, Yaqub Məmmədova xəbər verdim. Axırda Yaqub Məmmədov üstümə qışqırdı ki, mənə zəng eləmə, sizin müdafiə naziriniz var ona zəng edin. Rəhim Qazıyevə məruzə elədim, Yaqub Məmmədova nə qədər dedik ki, bizə bir vertolyot verin bu hadisənin qarşısını alaq, amma heç nə eləmədilər. Ballıca kəndində yaşayan ermənilər balacasından-böyüyünə hər biri bunun bədəlini ödəməlidi. Onlar Qarabağın işğalı zamanı əsir düşən 150 nəfər azərbaycanlını Ballıcanın üzərində yerləşən Berd yüksəkliyində dar ağacından asdılar. 300 metr aralıda 8 saat qarın içində qalaraq olanlara şahid oldum. Amma heç nə eləmək mümkün deyildi. Qadınlara qarşı zorakılıq olurdu, insaları asırdılar, gedib yeyib-içirdilər, gəlib yenə asırdılar. Mən çox yerdə vəhşiliklər görmüşəm. Amma Vaqifin etdiyi kimi vəhşiliklər görməmişəm. Başa düşə bilmirəm, insan necə belə vəhşi ola bilər" - deyə o bildirib.
Qeyd edək ki, keçirilmiş axtarış tədbirləri nəticəsində 29 iyul 2023-cü il tarixdə Vaqif Xaçaturyan Beynəlxalq Qırmızı Xaç Komitəsinin vasitəçiliyi ilə müalicə almaq adı altında Ermənistan Respublikasına getmək istəyərkən Dövlət Sərhəd Xidmətinin hərbi qulluqçuları tərəfindən Azərbaycan-Ermənistan dövlət sərhədinin Laçın sərhəd-keçid məntəqəsində saxlanıb.
"... ermənilər 24 apreldə azərbaycanlılara qarşı tükürpədici cinayətlər törədiblər, onları asıblar"
Azad Vətən Partiyasının sədri Akif Nağı "Bakı-Xəbər"ə şərhində bildirdi ki, V. Xaçaturyan da daxil olmaqla, erməni caniləri azərbaycanlıları kütləvi olaraq qətlə yetiriblər. "İstər Vaqif Xaçaturyan, istərsə də digər sepataçılar olsun, ermənilərin cinayətləri ilə bağlı çoxlu sayda məlumatlar var. Çox təəssüf ki, bugünə qədər Xocalı canilərinin cəzalandırılmasına, İnterpol vasitəsilə ciddi şəkildə axtarışlarına nail ola bilməmişik. Beynəlxalq rəyə onu yeridə bilməmişik ki, Azərbaycana qarşı bu cür cinayətlər törədilib. Burada həm biz tərəfin subyektiv təqsiri var, həm də bir sıra aidiyyəti qurumların. Eyni zamanda da dünya bizim səsimizi eşitmək istəmir. Məsələnin bu tərəfi də var ki, biz nə qədər faktları çatdırsaq da, yenə də bizim həqiqəti eşitmək istəmirlər. Ermənilərin yalanlarına inanırlar. Baxmayaraq ki, yalan olduğunu özləri də bilir, amma bu yalanları tirajlayırlar. Erməni yalanları əsasında sənədlər qəbul edirlər. Amma görürsən ki, Azərbaycan tərəfindən verilən məlumatları heç nəzərə də almırlar. Amma biz yorulmadan bu istiqamətdə işlərimizi davam etdirməliyik. Erməni terrorunun, zülmünün qurbanı olan, erməni vəhşiliyini, vandalizmini gözü ilə görən yüzlərlə şahid var. Azay Kərimov birinci Qarabağ müharibəsinin qəhrəmanlarındandır. Çox böyük fədakarlıq edib, çox böyük əziyyətləri olub, axıra qədər döyüşüb, Şuşa və digər istiqamətlərdə döyüşlərdə iştirak edib. O bu cinayətləri gözləri ilə görüb. O indiyə qədər bu barədə danışırdı. Mətbuatda, sosial şəbəkələrdə, müzakirələrdə bu barədə söhbət açırdı, müəllif yazılarında bu faktları qeyd edirdi. Azay Kərimovun dedikləri tam reallığı əks etdirir, bu səbəbdən də onlar ciddi şəkildə nəzərə alınmalı, protokollaşdırılmalıdır, arxivləşdirilməlidir. Erməni daşnaklarının azərbaycanlılara qarşı zülmünün, qaniçənliyinin şahidi olan hər bir kəsin danışdıqları nəzərə alınmalıdır.
Bir neçə şahidin ifadəsi qeydə alınmalıdır, araşdırılma aparılmalıdır, məhkəmə qərar çıxarmalıdır. Şahidin dedikləri bir daha sübut edir ki, ermənilər necə vəhşiliklər ediblər".
A.Nağı dedi ki, statistikaya görə, Xocalıda girov götürülənlərdən hələ də 150 nəfərin taleyi məlum deyil. "Baxın, indi o 150 nəfərin taleyi, başlarına gətirilən faciə ilə bağlı fakt ortaya çıxır. Fakt ortaya çıxır ki, aprelin 24-də onları bir çox şahidlərin gözləri qarşısında Xaçaturyan və digər erməni terrorçuları asıblar. Halbuki, tarixdə ermənilərə qarşı heç bir soyqırım olmayıb, 24 aprel "soyqırım"ı boş və əsassız bir iddiadır. Amma məlum olur ki, ermənilər 24 apreldə azərbaycanlılara qarşı tükürpədici cinayətlər törədiblər, onları asıblar. Şahid bildirib ki, ermənilər tərəfindən 24 aprel tarixində Azərbaycan türklərinə qarşı qırğın törədilib və 150 nəfər asılaraq qətlə yetirilib. Belə faktlar çoxdur, onları bir yerə yığmaq, ümumiləşdirmək, bu istiqamətdə işləri genişləndirmək lazımdır. Bu yaxınlarda bir şahid də danışdı və göstərdi ki, girovluqda olanda Xaçaturyanın iştirakı ilə ermənilər onun sinəsinə necə xaç çəkib. Xaçaturyanın 150 nəfər azərbaycanlının da qətlində iştirakını şahid qeyd edib. Bütün bu faktlara, cinayətlərə görə Xaçaturyan cavab verməlidir"-deyə A. Nağı qeyd etdi.
Leyla QARAXANLI
