İranın Nurduz sərhəd-keçid məntəqəsindən Ermənistana hərbi yükün olduğu avtomobil karvanının hərəkəti videogörüntülərdə qeydə alınıb. Yük İranın Bəndər Abbas limanına çatdırılıb. Yük maşınlarının üzəri örtülsə də, onların hərbi məqsəd daşıdığı aydın görünür.
Bildirilib ki, silah göndərən tərəf son vaxtlar Ermənistanın hərbi-texniki əməkdaşlığını sürətlə artırdığı Hindistandır. Açıq mənbələrdən məlum olduğu kimi, Ermənistan və Hindistan 400 milyon dollarlıq hərbi müqavilə imzalayıb. Son zamanlar iki ölkənin hərbçiləri arasında tez-tez təmasların olması da onlar arasında hərbi əməkdaşlığın güclənməsindən xəbər verir.
İyulun 26-da Azərbaycan Prezidentinin köməkçisi Hikmət Hacıyev Hindistanın ölkəmizdəki səfiri Sridharan Madhusudhanan ilə görüşüb. Görüşdə Hikmət Hacıyev Ermənistanla Hindistan arasında hərbi əməkdaşlığın dərinləşməsi və bu xüsusda son günlər mediada Hindistan istehsalı olan silah sistemlərinin İran vasitəsilə Ermənistana daşınması barədə foto və videoların yayılmasının Azərbaycan tərəfində narahatlıq doğurduğunu bildirib.
Prezident Administrasiyasının rəsmisi vurğulayıb ki, Azərbaycanın Ermənistanla sülh sazişi üzrə danışıqlar apardığı bir vaxtda Hindistanın bu ölkəyə öldürücü silahlar tədarük etməsi Ermənistanın militarizasiyasına və vəziyyətin gərginləşməsinə yol açır və Cənubi Qafqaz regionunda davamlı sülhün və təhlükəsizliyin bərqərar olmasına maneələr törədir. Bu, həm də Hindistanın özünün bəyan etdiyi beynəlxalq hüququn norma və prinsiplərinə əsaslanan xarici siyasəti, eləcə də bu ölkənin də təmsil olunduğu Qoşulmama Hərəkatının tarixi “Bandunq prinsipləri” ilə uyğun gəlmir.
Qeyd edək ki, rəsmi Bakı bundan əvvəl də Hindistana Ermənistanı silahlandırdığına görə müxtəlif kanallarla öz etirazını bildirib.
Qeyd edək ki, bütün bu etirazların fonunda Hindistan Ermənistana silah göndərməyin başqa üsulunu tapıb. İndi də bu tədarükü gizli yollarla həyata keçirir. Hindistan mediası yazır ki, bu, Hindistandan ilk belə irimiqyaslı ixracdır: “İndiyədək Hindistanın mürəkkəb hərbi texnikasına xaricdə tələbat olmayıb. Hindistan 214 millimetr kalibrli və 60 kilometrə qədər məsafə qət edə bilən MLRS Pinaka ilə bağlı da əvvəllər Ermənistanla müqavilə imzalayıb.
Hindistanın Badmal şəhərindəki döyüş sursatı fabriki ilk ixrac məhsulunu “adı açıqlanmayan müştəriyə” göndərib.
Çox təfərrüat məlum deyil - 155 mm-lik mərmilər və onlar üçün silahlar haqqında danışa bilərik. Xarici müştərinin də adı çəkilmir, amma demək olar, əmin ola bilərsiniz ki, bu, Ermənistandır. Əsas səbəb Hindistan istehsalı olan artilleriya və döyüş sursatlarının, o cümlədən 155 millimetrlik MArG 155/39 özüyeriyən haubitsaların alınması ilə bağlı son razılaşmalardır.
Sifarişçinin rəsmi İrəvan olmasını bir sıra başqa məqamlar da göstərir. Bir müddət əvvəl Ermənistanın Hindistandakı səfirliyində hərbi attaşenin peyda olacağı xəbəri yayılmışdı. Bu, ölkənin Hindistan silahlarını almağa böyük marağı ilə izah edilib”.
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Hindistanın qısqanclığının və bizə qarşı qərəzli olmasının başlıca səbəblərindən biri Pakistanın regionda tədrici möhkəmlənməsi, müdafiə və təhlükəsizlik məsələlərində Azərbaycanın yanında durması ilə də əlaqədardır: “Yəni regionda Hindistanın böyük rəqibləri Çin və Pakistandır. Hindistanın Ermənistanı silahlandırması onun Çin və Pakistanla sərhəddə reaktiv yaylım atəşi sistemləri yerləşdirməsi fonunda aydınlaşır. Dehlinin İrəvana xoş münasibəti Azərbaycanın Laçın yolunda sərhəd-buraxılış məntəqəsi qurmasından sonra daha da aktuallaşdı, görünür ki, Bakının bu qərarı strateji əhəmiyyətli və regional təsirlər yarada bilən gücə malikdir. Hindistanın Ermənistana qol-qanad gərmək cəhdləri onu deməyə əsas verir ki, İrəvan Azərbaycanla münasibətlərin sülh gündəliyi üzrə getməsi barədə verdiyi bəyanatlarda dürüst deyil. Hamı başa düşür ki, Çinin Azərbaycandan keçən layihələri var. Buna maneələr törətmək üçün Hindistan Ermənistana yardım etməkdədir. Bu, geopolitik oyunların nəticəsidir. Ermənistanın müdafiə sistemini bərpa etmək üçün illər və milyardlarla pul lazımdır. Ordan-burdan alınan silahlar hansısa sistemin tərkib hissəsi olmalıdır, Ermənistanda isə müdafiə sistemi, demək olar ki, yoxdur. Vaxtilə Rusiyadan qırıcı təyyarələr alıblar, amma onları istifadə etməyiblər. Daha çox daxili auditoriya üçün yönələn addımlardır ki, orada insanları sakitləşdirsinlər. Silah ticarətində belə gedişlər var. Son istifadəçi kimi başqa ölkənin adını yazırlar, sonra silahı həmin ölkə vasitəsilə lazım olana çatdırırlar. Hazırda Hindistan bu yola əl atıb, amma bununla da Ermənistanı vəziyyətdən çıxara bikməyəcəklər. Təbiidir ki, bu məsələdə rəsmi Bakının etirazları da öz nəticəsini verib”.
Məhəmmədəli QƏRİBLİ
