İrəvandan Qarabağa göndərilən 19 yük maşını Azərbaycanla sərhədə çatıb. Bu barədə erməni mediası məlumat yayıb. Ermənilərin "səlahiyyətli" nümayəndəsi Vardan Sərkisyan Ermənistanın sərhəd-keçid məntəqəsindən buraxıldıqlarını, hazırda iki ölkənin sərhəd keçid məntəqələri arasında gözlədiklərini bildirib:
"Rusiya sülhməramlıları ilə əlaqə yaratmışıq. Cavab gözləyirik. Prosesə əlavə təsirlərin olduğunu nəzərə alsaq, bir qədər səbrli olmalıyıq. Cavab gələnə qədər yük maşınları sərhəddə gözləyəcək".
Qeyd edək ki, Sərhəd Qoşunları bəyanat yayıb ki, bu, Ermənistanın növbəti təxribatıdır və baş verəcək hansısa xoşagəlməz hala görə məsuliyyət Ermənistanın üzərinə düşəcək.
Azərbaycan XİN-in bəyanatında isə deyilir ki, bizim erməni sakinlərin ehtiyaclarının qarşılanması üçün “Ağdam-Xankəndi” yolundan və digər alternativ yollardan istifadə daxil olmaqla, bir sıra təkliflər irəli sürməsinə və bu təkliflərin Avropa İttifaqı, Beynəlxalq Qızıl Xaç Komitəsi tərəfindən dəstəklənməsinə baxmayaraq, erməni tərəfinin bütün təkliflərə, eləcə də Azərbaycanın qeyd etdiyi yollar vasitəsilə BQXK tərəfindən yüklərin daşınmasına qarşı çıxması, müvafiq humanitar fəaliyyətə maneçilik törədilməsi, alternativ yollara beton maneələr düzməklə əraziyə girişin bloklaması onların humanitar vəziyyət barədə iddialarının siyasi şantaj olduğunu göstərir. Bu addımlar, humanitar fəaliyyəti siyasiləşdirməklə yanaşı, Azərbaycanın suverenliyi və ərazi bütövlüyünün tanınmasına dair bəyanatlarla ziddiyyət təşkil edir:”Qeyd edilən təxribatda Avropa İttifaqının Ermənistandakı missiyasının və diplomatik korpusun da alət edilməsi bunun əvvəlcədən planlaşdırılmış addım olduğunu nümayiş etdirib.
Bu kimi təxribatlardan əl çəkməyi Ermənistan tərəfindən bir daha tələb edirik".
Göründüyü kimi, Ermənistan bu təxribata həmin ölkədəki Avropa Birliyi missiyasını da alət etməyə cəhd göstərir. Bu missiyanın məsələyə münasibəti necə olmalıdır ki, Ermənistanın bu çirkin oyununda alətə çevrilməsinlər?
Demokratik Dəyişim Partiyasının (DDP) sədri Əli Mustafa “Bakı-Xəbər”ə bildirdi ki, Ermənistanın bu cəhdləri Azərbaycan-Ermənistan münasibətlərinin normallaşmasına xidmət etmir: “Anlaşılan odur ki, Ermənistan daim intellektual oyunlarla haqlı olduğunu göstərməyə çalışır. Eyni zamanda, bununla da Azərbaycanın daim haqlı olduğunu sübut edir. Ermənistan Respublikası bir tərəfdən Azərbaycanla danışıqlar aparır, özünü sərhədlərin müəyyənləşməsini, sülh müqaviləsinin imzalanmasını, ərazi bütövlüyünün tanınmasını sanki istəyirmiş kimi göstərir. Digər tərəfdən isə, Azərbaycanın ərazi bütövlüyünü, sərhəd toxunulmazlığı prinsipini pozur. Bütün bunları deyərkən bir şeyi bilməliyik. Təsəvvür edək ki, Gürcüstan ərazisində azərbaycanlılar yaşayır. Sabah Azərbaycan oraya müdaxilə edir, deyir ki, mən bu işi görürəm, o işi görürəm. Bütün hallarda bu, dövlətlərarası razılaşma əsasında olmalıdır. İndiyə kimi Qarabağda nələrin baş verməsi, Ermənistandan silahın, minanın gəlməsi artıq bitib. Anlaşılan odur ki, Ermənistanın məğlubiyyət barədə razılaşması yerinə yetirilmir. Bu isə o deməkdir ki, hər zaman müharibə şəraiti mümkündür. Mən düşünürəm ki, baş verən hadisələr bütün hallarda, hansısa humanitar problemlərin həllindən daha çox, Azərbaycanla Ermənistan arasında gərginliyin qalmasına, Azərbaycanın beynəlxalq nüfuzuna zərər vurmağa xidmət edir. Mənə elə gəlir ki, Avropa İttifaqının da məsələlərə müdaxiləsi doğru deyil. Belə götürəndə, Qarabağda hansısa qərara ehtiyac varsa, bu artıq anlaşılır. Paşinyan da, Ermənistanın baş naziri də bəyanat verib ki, Qarabağ Azərbaycanın tərkib hissəsidir. Bu isə o deməkdir ki, Azərbaycan Qarabağda ehtiyac olan hər bir şeyi Ağdam-Xankəndi marşrutu üzrə təmin edə bilər. Ermənistan da bunu Azərbaycan vasitəsilə etməlidir. Bu halda gərginlik, növbəti münaqişə yaranmaz. Əks təqdirdə bu birbaşa Azərbaycanın süverenliyinə müdaxilədir. Azərbaycan ərazisində hər hansı etnik insanların yaşaması imkan vermir ki, digər dövlətlər istədikləri vaxt ora girsin-çıxsın, nəsə aparsın-gətirsin. Bütün hallarda bunlar Azərbaycan tərəfinin razılığı əsasında olmalıdır. Əgər razılıq olmasa, o zaman dövlətlərarası, beynəlxalq hüquq prinsiplərinə uyğun olaraq dövlətin daxili işi kimi nəzərə alınmalıdır. Əks təqdirdə bu, daxili işlərə qarışmaq sayılacaq. Mən düşünürəm ki, bu məsələdə Avropa İttifaqının da, Ermənistan tərəfinin də ağıllanması və anlayış göstərməsi lazımdır. Əks təqdirdə, Azərbaycan tərəfinin hər zaman haqqı var desin ki, Azərbaycan ərazisində yaşayan erməni əhali ya Azərbaycan qanunlarına tabe olmalıdır, ya da ərazini tərk etməlidir. Anlaşılan odur ki, biz axır-əvvəl Qarabağı tamamilə azad etməli olacağıq. Yoxsa orda olan 10-15 min erməni daim münaqişə üçün bir istifadə elementi olacaq”.
Məhəmmədəli QƏRİBLİ
