Beynəlxalq Qızıl Xaç Komitəsi (BQXK) Azərbaycanla bağlı növbəti qərəzini ortaya qoyub. Qurumun yaydığı bəyanatda bildirilir ki, davamlı səylərə baxmayaraq, onlar hazırda Laçın dəhlizi və ya Ağdam da daxil olmaqla hər hansı digər marşrutla mülki əhaliyə humanitar yardım çatdıra bilmir.
Təşkilat yaydığı bəyanatda məsul şəxsləri BQXK-nın bölgədə əsas humanitar əməliyyatlarını bərpa etməyə icazə verməyə çağırır.
BQXK-nin ağ yalanı buradan açıq görünür. Çünki bir neçə gün əvvəl Azərbaycan XİN ermənilərin saxta “blokada” bəhanəsini kəsmək üçün Ağdam yolundan istifadə etməklə lazım olanların Xankəndi və ətraf qəsəbələrə çatdırılmasını təkif etmişdi. İndi isə qurum bəyanat verir ki, hətta Ağdam yolundan belə istifadə edə bilmirlər.
Əslində bu qurumun bizə qarşı qərəzi əvvəl də olub. Beynəlxalq Qırmızı Xaç Komitəsi nəyə görə hələ birinci Qarabağ müharibəsi zamanı itkin düşmüş şəxslərin taleyi ilə bağlı məsələni araşdırmır? Azərbaycan tərəfinin bu mövzu ilə əlaqədar çoxsaylı müraciəti cavabsız qalır.
Birinci Qarabağ müharibəsi zamanı itkin düşmüş 54 hərbçi BQXK vasitəsilə ailələri ilə əlaqə saxlasalar da, sonradan onların talelərinin necə olması ilə bağlı hər hansı məlumat verilməyib. Bu illər ərzində BQXK bu hərbi cinayətin araşdırılması istiqamitəndə heç bir səy göstərməyib.
BQXK-nin 2014-cü ildə DNT məlumat bazasını yaratmasına baxmayaraq, itkin düşən soydaşlarımızın işinə hər hansı xeyri olmayıb. Bu da BQXK-nin itkin düşən azərbaycanlıların taleyinə biganə yanaşmasının göstəricisidir.
Önəmli humanitar missiyanı daşıyan beynəlxalq bir qurumun belə qərəzli mövqeyu nə ilə izah oluna bilər?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, ümumiyyətlə Beynəlxalq Qırmızı Xaç Komitəsi adlanan qurum bir əsr yarım bundan əvvəl silahlı qarşıdurmalardan, müharibə kimi bəladan zərər görmüş istər mülki əhaliyə, istər hərbçilərə yardım məqsədilə yaradılmış bir təşkilatdır: “Amma zaman keçdikcə, bu təşkilata əlavə funksiyalar da həvalə edildi ki, bu da humanitar yardımdan tutmuş digər sahələri də əhatə edir.
İndiki halda dünyanın hər hansı bir nöqtəsində silahlı münaqişələrdən, müharibələrdən ziyan çəkmiş elə bir nöqtə yoxdur ki, orada Beynəlxalq Qırmızı Xaç Komitəsinin bu və ya digər şəkildə iştirakı olmasın.
Amma iş ondadır ki, Beynəlxalq Qırmızı Xaç Komitəsinin neytrallıq və humanizm baxımından müstəqil surətdə ərazilərdə iş aparmaq kimi üstünlüklərindən yararlanmaq istəyən maraqlı tərəflər bəzi hallarda bu təşkilatın işinə müdaxilə edərək ondan faydalanmağa çalışırlar.
Son dövrlər ərzində böyük dövlətlərin bu təşkilatdan hətta yerlərdə kəşfiyyat, hadisələrə dolayısı yolla müdaxilə məqsədilə istifadə üçün yararlanmaq cəhdləri barədə məlumatlar almaqdayıq. Əslində bu təşkilat artıq münaqişə zonalarında böyük dövlətlərin öz maraqlarını həyata küçirməsi kimi funksiyaları yerinə yetirən bir quruma çevrilib.
Elə son hadisələrdən də göründüyü kimi, bu təşkilatın Azərbaycanın Qarabağ regionundakı fəaliyyəti heç də onun birbaşa vəzifə və funksiyaları ilə bir araya sığmayan hərəkət kimi qiymətləndirilə bilər.
Nə qədər gülməli olsa da, iş o yerə çatıb ki, bu təşkilata məxsus olan texniki vasitə və avadanlıqlardan istifadə edərək ərazilərə qeyri-qanuni yolla kontrabanda keçirilməsi hallarına da rast gəlinir. Şəxsən mənə belə gəlir ki, Beynəlxalq Qırmızı Xaç Komitəsi adlı bir təşkilat münaqişə zonalarında artıq tərəf olaraq qəbul edilməlidir və onların yerlərdə fəaliyyət göstərmək kimi imkanları nəzarət mexanizmi altında olmalıdır. Zamanında əsir götürülən Azərbaycan vətəndaşlarının hüquqlarını qorumaq əvəzinə, ermənilərin saxta “blokada” təbliğatına dəstək verirlər”.
Məhəmmədəli QƏRİBLİ
