Qərb, o cümlədən ABŞ tərəfindən ATƏT-in Minsk qrupunun fəaliyyətinin bərpası üçün müəyyən cəhdlər müşahidə olunur. Bu, Qərbin siyasi riyakarlığının növbəti təzahürüdür, artıq Minsk qrupu keçmişdə qaldı və təbiidir ki, Azərbaycan belə yararsız təsisatın bərpa edilməsinə imkan verməyəcək.
Qərb bütün mövzularda Rusiyaya qarşı kəskin əks-mövqe bildirsə də, onu düşmən saysa da, yalnız Qarabağ məsələsində Azərbaycanın maraqlarına qarşı Rusiya ilə sövdələşməyə hazır görünür. Qərbin Ukrayna məsələsi ilə bağlı Rusiya ilə separat danışıqlara başlaması və əks-hücum əməliyyatları üçün Ukraynaya kifayət qədər silah tədarük etməməsi onun siyasi riyakarlığını bir daha sübut edir. Prezident Zelenskinin istədiyi silahlar verilmir, amma bununla yanaşı Qərb Ukraynadan son əsgərə qədər döyüşməsini gözləyir. Bu ağır vəziyyətin fonunda Qərb və Rusiya arasında Ukraynanın bölünməsi istiqamətində iş gedir.
Minsk qrupunun fəaliyyətinin bərpası cəhdi, şübhəsiz ki, Azərbaycan üçün qəbuledilməzdir. Ölkəmizə qarşı yeni vahid cəbhənin yaradılmasına imkan verilməyəcək. 30 illik işğal dövrü geridə qaldı, 44 günlük Vətən müharibəsindən sonra yeni reallıqlar yarandı. Azərbaycan cəmiyyətində bu mövzu ilə bağlı tam həmrəylik mövcuddur.
Politoloq Yeganə Hacıyeva “Bakı-Xəbər”ə açıqlamasında bildirdi ki, Ukraynadakı müharibədə Rusiyanın irəliləməsi, duruş gətirməsi Qərbin 2008-ci ildən başlayaraq Moskvanın müxtəlif ölkələrdə nümayiş etdirdiyi açıq şıltaqlıqlarına dözümlü yanaşmasına bağlı olan məsələdir. Çünki Ukraynaya qədər də Qərb Rusiyanın işğalçı addımlarına dözümlü yanaşıb. Əslində, Qərb 2008-ci ildə Rusiyanın siyasətini aktiv şəkiıdə həyata keçirmək üçün əsaslar formalaşdırdı. Bunu ilk olaraq Gürcüstanda etdilər, müəyyən qarşılıqlı razılaşmaların müqabilində rəsmi Tiflisi sona qədər müdafiə etdilər. Bunu Gürcüstanda ediblərsə, demək ki, Ukraynada da təkrarlaya bilərlər. Artıq bunun ilkin işarıları özünü göstərir. Qarabağda da ermənilərin adından Rusiya danışır. Həm Qarabağda, həm də Ukraynada resursların talanmasında iştirak edən milyarderlər eyni qrupa aiddir. Resurların talanmasında Rusiya ilə yanaşı Qərbin də bəzi şirkətləri iştirak edir. Bu gün Qərbin Ukraynaya verdiyi maliyyə və hərbi dəstəyin təxminən 30 faizinə əməl olunub. Hətta ABŞ qanunverici orqanlarında belə hərbi dəstəyin verilməsinə şərait yaradan qanuni hüquqi bazalara da məhdudiyyət qoyuldu. Səbəbi də bununla izah edildi ki, güya Ukraynaya verilən müasir silahlar Rusiyanın və İranın əlinə keçə bilər. Reallıq bundan ibarətdir ki, artıq Qərbin Ukraynaya göndərdiyi bəzi silahlar İranın əlinə keçib. Amma bu, bəhanə sayıla bilməz. Ümumilikdə nəzarəti gücləndirə bilərdilər. Priqojinlə bağlı Rusiyanın yaşadığı gərginliyin fonunda da biz Qərbin və Ukraynanın ciddi basqılarını hiss etmədik. Bunun da əsası olub. Həmin vaxt ABŞ bunu rəva bilməyib. Rusiyada hazırda ən böyük investor ABŞ şirkətləridir. Onlar sanksiyalara görə Rusiyanı tərk etsələr də, dərin qatlarda Rusiya ilə əməkdaşlıqları davam edir. Həm Rusiya, həm də Ukraynadakı ABŞ-ın biznes maraqlarını ifadə edən şirkətlərin bu məsələdə təsiri güclüdür. Bu məsələdə onların yekun rəyi önəmlidir. Müharibənin aqibətini də onlar həll edəcək. Biz tərəflər arasındakı separat razılaşmanın əsas elementlərini Minsk qrupunu dirçəltmək cəhdlərində görürük. Bunun bir sadə cavabı var. Onlar Cənubi Qafqazda qalmağın yolunu bu formatda görürlər. Əminəm ki, onların bu planı baş tutmayacaq. Ölünü yenidən diriltmək mümkün deyil”.
Məhəmmədəli QƏRİBLİ
