Azərbaycanın Qarabağ iqtisadi rayonunda məskunlaşan ermənilərin Laçın yolunun açılması ilə bağlı başlatdıqları aksiya şousu onlar üçün hələ də istənilən nəticəni vermir. Məsələ burasındadır ki, dünya Qarabağdakı ermənilərin Azərbaycanın tərkibində təhlükəsiz yaşamasında heç bir problem görmür.
Amma Qarabağda separatçı mövqedə dayanan Araik Arutyunyan, Ruben Vardanyan kimi canilər bölgədə yenidən qan tökülməsini istəyirlər. Halbuki, onların fəaliyyətinin əbəs olduğunu ermənilər özləri də qəbul edir.
Ermənistan parlamentinin “Şərəf duyuram” fraksiyasının katibi Tiqran Abramyan da bildirir ki, Qarabağla bağlı məsələdə hansısa yenilik gözləmək əbəsdir: “Hakim “Vətəndaş müqaviləsi” partiyasının nümayəndələri bildirir: “Biz Azərbaycan ərazisində mövcud olan 120 minlik erməni icmasının hüquq və prinsiplərini tanımışıq və bəyan edirik. Qarabağı Azərbaycanın bir hissəsi kimi tanımaq, Qarabağın gələcəyini azərbaycanlılarla birlikdə görmək, Qarabağdakı erməniləri Azərbaycanın erməni icması hesab etmək yanaşması sırf Paşinyan rejiminin mövqeyidir. Həm Qarabağda, həm də Ermənistanda Qarabağ məsələsində sıçrayış etmək istəyən qrupların sadəcə olaraq qeyri-siyasi gündəmlə müqavimət göstərmək imkanları yoxdur”. Ermənistan mətbuatına müsahibəsində hakim partiyadan parlamentdə təmsil olunan deputat Akop Aslanyan da bu yanaşmanı qəbul edir: “Ermənistan Azərbaycanın ərazi bütövlüyünü tanıyıb”. Jurnalistlərin Azərbaycan daxilində erməni əhalisinin hüquqları ilə bağlı sualını cavablandıran deputat bildirib: ”Azərbaycan onların hüquqlarını qoruyacaq. İndi 21-ci əsrdə yaşayırıq. Qarabağın erməni əhalisi öz yerlərində azad və firəvan həyat sürəcəklər. Buna Azərbaycan da, beynəlxalq təşkilatlar da təminat verir. Əvvəllər Qarabağ Azərbaycanın tərkibində necə yaşayırdı? Elə də olacaq. Bundan əvvəl isə Levon Ter-Petrosyan, Robert Köçəryan və başqaları Qarabağı Azərbaycanın bir hissəsi kimi tanıyıblar. Əgər Robert Köçəryan Qarabağı Azərbaycanın bir hissəsi kimi tanımırdısa, niyə Mehrini başqa əraziyə dəyişməyə çalışırdı? Azərbaycan öz zamanını gözlədi və istədiyinə nail oldu. İndi Ermənistan zəifdir və Azərbaycanın daha çox ərazi qoparmaq imkanı var”. Akop Aslanyan bunun olmaması üçün Azərbaycanla sülh müqaviləsinin imzalanmasının vacibliyini bildirib. Ermənilər yaxşı başa düşürlər ki, Qarabağda antiterror əməliyyatını həyata keçirmək üçün Azərbaycanın kifayət qədər gücü, potensialı və resursları mövcuddur.
Beynəlxalq birliyin buna yol verməmək üçün Azərbaycana qarşı hansısa addımlar atacağına dair ermənilərin gözləntiləri də əbəsdir. Bunu rusiyalı analitik Aleksandr Razuvayev də xüsusi olaraq qeyd edir. Razuvayev qeyd edir ki, bunun üçün ciddi izahatlar lazımdır: “Axı, Bakı Avropanın mühüm neft və qaz tədarükçüsüdür. Üstəlik bu, Qərbin gördüyümüz kimi münasibətlərini qorumağa çalışdığı Türkiyə ilə ciddi şəkildə mübahisə etməsi deməkdir. Bundan əlavə, Azərbaycan son illər statusunu artırır, lakin bununla belə, ona qarşı təzyiqlər kifayət qədər ciddidir. Bakı sözsüz ki, möhkəm dayanacaq və Qarabağ məsələsini həll edəcək. Axı Azərbaycan özünün mükəmməl diplomatiyası sayəsində ildən-ilə daha da güclənir - hələ həqiqətin də onun tərəfində olduğunu nəzərə almasaq. Amma bu gün dünyada qalib gəlmək üçün həqiqətin sənin tərəfində olması yox (bu işə yaramır), güclü və nüfuzlu olmağın vacibdir. Hər tərəfdən təzyiq altında olduğunuz zaman da müstəqil olmağı bacarmalısınız. Azərbaycanın iqtisadiyyatı ilə bağlı hər şey qaydasındadır, güclü müasir ordusu var və bu ordunu daha da güclü, müasir edəcək. Son illər Azərbaycan nəinki regionda, hətta dünyada nüfuzlu dövlətə çevrilib. Sadə dillə desək, Bakının Qarabağa tam nəzarətini bərpa edəcəyinə əminəm”. Erməni siyasətçi Tiqran Xzmalyan isə məsələnin başqa tərəfinə diqqət edir. O, Qarabağdakı ermənilərə xitabən bildirir ki, Rusiya artıq Qarabağdan çıxacağına dair siqnallar verməyə başlayıb: “Rusiyanın bölgədən çıxışı qaçılmazdır. Son bəyanatlardan belə görünür ki, Rusiya regionu tərk edir. Bunu Ukraynadakı məğlubiyyətlə də əlaqələndirmək olar. Türkiyə prezidenti 1918 və 1991-ci illərdə olduğu kimi, 2025-ci ildə də Rusiyanın bölgədən çıxacağını bildirərək buna eyham vurmuşdu. Rusiya Federasiyası xarici işlər nazirinin müavini Andrey Rudenkonun Moskvanın Azərbaycanın ərazi bütövlüyünə həmişə hörmətlə yanaşdığı ilə bağlı bəyanatı da buna nümunədir. Moskva 2020-ci ildə Qarabağın Azərbaycana məxsus olduğunu elan etmişdi və 3 il sonra Ermənistan da tanıdı. Rusiyanın bölgədən çıxması artıq qaçılmazdır. Amma məsələ bununla bitməyəcək. Rusiya Gümrüdən 102-ci bazanı da çıxaracaq”. Keçmiş deputat Naira Zöhrabyan Qarabağdakı ermənilərin Ermənistana bu vəziyyətdə ümid etməsinin də əsasının olmadığını qeyd edir: “Çox təəssüf ki, Ermənistanın siyasi həyatında baş verənlər heç bir üsyana, heç bir müqavimətə səbəb olmadı. Bu o deməkdir ki, biz hamımız Ermənistanın kapitulyasiya prosesini sadəcə seyr edirik. Bəzi insanlar düşünür ki, Ermənistanın Qarabağı de-yure Azərbaycanın bir hissəsi kimi tanıması oyundur. Amma yanılırlar. Azərbaycan istədiyini əldə edəcək və məqsədinə nail olacaq. Özü də heç bir müharibə aparmadan. Ruslar Paşinyanın Qarabağı Azərbaycanın bir hissəsi kimi tanımasından sonra vəziyyətin kökündən Azərbaycanın xeyrinə dəyişməsini qəbul edir. Məhz bundan sonra Qarabağ problemi Azərbaycanın daxili işinə çevrilib. Bizim Rusiya Federasiyasına qarşı tələblər irəli sürməyə, sülhməramlıların qarşısında çadırlar qurmağa haqqımız yoxdur. Çünki Nikol Paşinyan Praqada Qarabağı Azərbaycanın bir hissəsi kimi tanımaqla rusların əl-qolunu bağladı”.
Nahid SALAYEV
