Müxalifətin ən böyük siyasi təşkilatlarından hesab olunan Azərbaycan Xalq Cəbhəsi Partiyası Ədliyyə Nazirliyi tərəfindən mənfi cavab alıb.
Nazirliyin Ədliyyə sahəsində Xidmətlər Baş İdarəsinin rəisi İlqar Məmmədovun iyulun 19-da partiyaya göndərdiyi məktubda qeyd olunub ki, 5138 üzvü əhatə edən reyestrdə 2497 nəfər barədə məlumatlar (adı, soyadı, ata adı, doğulduğu tarix) düzgün göstərilmədiyindən onlar tərəfinizdən dəqiqləşdirilməlidir:
“Reyestrdəki eyniləşdirilmiş şəxslərin sırasından 119 nəfərin başqa partiyanın üzv olduğu, 59 şəxs barədə məlumatların təkrarlandığı və 3 nəfərin öldüyü müəyyən edilib. Həmçinin, reyestrdə adları qeyd olunan şəxslərlə əlaqə saxlanılarkən onlardan 609 nəfəri AXCP üzvü olmadığını bildirib”.
İlqar Məmmədovun sözlərinə görə, təqdim olunan məlumatlarda 33 nəfərin əlaqə telefonunun nömrəsi qeyd olunmayıb.
Nazirlik “Siyasi partiyalar haqqında” Qanunun 30.2 maddəsinə əsaslanaraq reyestrdə aşkar edilən çatışmazlıqların aradan qaldırılması üçün partiyaya 30 gün vaxt verib.
Ədliyyə Nazirliyi üçüncü müxalif partiyadır ki, sorğusuna mənfi cavab verir. Bundan əvvəl Müsavat Partiyası da imtina cavabı alıb. Ancaq hakim Yeni Azərbaycan Partiyası reyestrdən keçirilib.
İki gün əvvəl isə REAL Partiyasına da 30 gün vaxt verildiyi haqda məktub göndərilmişdi.
Nazirlik bir həftədən çoxdur müxalif partiya üzvləri ilə əlaqə saxlayıb onlara siyasi mənsubiyyəti ilə bağlı suallar verir. Bu yanaşma sosial şəbəkələrdə və bir sıra ekspertlər tərəfindən birmənalı qarşılanmır. Onlar yoxlama prosesinin qanunun tətbiqində problemlərin olmasından irəli gəldiyini deyirlər.
Görünən budur ki, ölkənin tanınmış müxalif siyasi partiyaları: Real, Müsavat, AXCP ilk cəhddən tələb olunan 5 min nəfərlik üzüvlük siyahısını təqdim edə bilməyiblər. Müxalifətin sırasının belə seyrəlməsi nə ilə izah edilə bilər? Qabaq bu sayda üzv bir rayon təşkilatında olurdu.
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, lazım olan baryeri aşa bilməməklərinin səbəbini həmin partiyaların özləri izah etsələr daha yaxşı olar: “Ümumilikdə götürdükdə isə, siyasi partiyalar haqda yeni qanunun qəbulundan sonra partiya sədrləri içərisində bu məqsədlə ən çox mən rayonlarda oldum. Vəziyyət əvvəlki dovrlərdən xeyli fərqlidir. Proporsional seçki sistemi ləğv olunandan sonra partiyalara üzv olan vətəndaşların sayı xeyli azalıb. İnsanlar müxalifətçi olmaqlarını etiraf etməkdən də çəkinirlər. Bu səbəbdən də siyasi təşkilatlara maraq azalıb. Hətta elə adamlar var idi ki, üzvlərinin sayının 15 min olmasını təklif edirdi. Belə olsa idi, vəziyyət daha pis olardı. Biz özümüz haqda danışaq. Son 6 ayda bu istiqamətdə xeyli iş gördük. 7388 nəfər partiya üzvünün məlumatlarını vermişik. Hesab edirəm ki, bunlar doğru məlumatlardı. Çünki köhnə məlumatları da yeniləmişik. Bu müddət ərzində xeyli yeni üzvlər də qəbul etmişik. Bir sıra bölgələr var ki, orda da işlərimizi davam etdiririk. Açığını deyim ki, ölkədə siyasi partiyaların fəaliyyətinə normal imkan yaradılacaqsa, biz ilk üçlükdə olmağa iddialıyıq”.
Son bir neçə ayda Azərbaycanda 30-dan çox partiya özünü buraxıb. Bu sıraya Müstəqil Xalq Partiyası (MXP), Azərbaycan Milli Demokrat Partiyası (AMDP), Yeni Yol Partiyası, Azərbaycan Respublikaçılar Partiyası, Müstəqil Azərbaycan Partiyası, Azərbaycan Vahid Kommunist Partiyası, Azərbaycan Sosial Demokrat Partiyası (ASDP), Azərbaycan Liberal Demokrat Partiyası (ALDP), Milli Vəhdət Partiyası (MVP), Azərbaycan Sosial Rifah Partiyası (ASRP), Azərbaycan Naminə Alyans Partiyası (ANAP), Azərbaycan Təkamül Partiyası, Birlik Partiyası, Aydınlar Partiyası, Kommunist Partiyası, Vahid Azərbaycan Milli Birlik və Azərbaycan Azad Respublikaçılar Partiyası və digərləri daxildir.
2022-ci ilin dekabrında Milli Məclis “Siyasi partiyalar haqqında” Qanunu üçüncü oxunuşda qəbul edib.
Məhəmmədəli QƏRİBLİ
