Azərbaycan və Ermənistan arasında sərhədin demarkasiyası üzrə komissiyaların dördüncü iclasında demarkasiya üçün hansı ilin xəritəsinin əsas götürülməsi ilə bağlı razılıq əldə olunmayıb.
Bu sözləri Ermənistan Baş nazirinin müavini Mger Qriqoryan deyib.
O bildirib ki, yeni görüşün vaxtı və yeri hələ bəlli deyil.
Qeyd edək ki, Azərbaycan Baş nazirinin müavini Şahin Mustafayevin və Ermənistan Baş nazirinin müavini Mger Qriqoryanın sədrliyi altında Azərbaycan və Ermənistan arasında dövlət sərhədinin delimitasiyası üzrə Dövlət Komissiyasının dördüncü görüşü iyulun 12-də sərhəddə keçirilmişdi.
Ermənistan Baş naziri Nikol Paşinyan və digər rəsmilər uzun müddətdir ki, 1975-ci il xəritəsi üzrə sərhədin müəyyən edilməsini təklif edirlər. Razılaşma yoxdursa, demək, Azərbaycan bu təklifi qəbul etməyib.
Ermənilər niyə məhz 1975-ci ildəki xəritələrin üzərində dayanırlar?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, Ermənistan bütün dövrlərdə danışıqlar prosesini pozub, müxtəlif bəhanələr irəli sürüb: “SSRİ mövcudluğunda, Levon Ter-Petrosyan dövründə, həmçinin MDB dövlət başçılarının vasitəçiliyində də belə olub. Daha sonra müstəqillik dönəmində, bilirsiz ki, ATƏT-in həmsədrləri, Köçəryan hakimiyyəti dövründə İstanbulda danışıqlar zamanı sülh müqaviləsi imzalanması gözlənilirdi. Ancaq Ermənistan parlamenti gülləbaran olundu. Ardından Sarkisyanın, Paşinyanın dönəmində bu proseslər davam etdi. 44 günlük Vətən müharibəsinin nəticəsində Azərbaycan dövləti Ermənistanı məcbur etdi ki, BMT Təhlükəsizlik Şurasının qətnamələrini yerinə yetirsin. Ermənistan heç vaxt müstəqil olmayıb. Gah Rusiyanın İrəvandakı səfiri onları idarə edib, gah da Qərbdan, Fransadan, Amerikadan asılı olub. Paşinyan özü müxtəlif bəhanələrlə bu danışıqları uzadır. Vaxtında bu danışıqları ona görə uzadırdılar ki, xəyal edirdilər ki, zaman geçəcək və onlar Qarabağın işğalını rəsmiləşdirə biləcəklər, ya Ermənistana birləşdirəcəklər, ya da qondarma ikinci Ermənistan dövləti yaradacaqlar. Lakin bütün bu xəyalları suya düşdü. Azərbaycan dövləti erməni ordusunu darmadağın edib, böyük bir qələbə əldə etdi. İndi bu xəritələr məsələsi də düzgün qoyulmur. Ermənistan zamanında Azərbaycanın ərazisində qurulan ölkədir. İrəvan da 1918-ci il may ayının 29-u Milli Şuranın qərarı ilə verilmiş bir şəhərdi. 9 min kv km ərazisi olub. SSRİ-yə daxil olanda onun 9 min, Azərbaycanın isə 114 min kv km ərazisi olub. Azərbaycanın böyük bir hissəsi - Göyçə və Zəngəzur, 20 min kv km ərazi alınaraq Ermənistana verilib. 114 min kv km - dən əlavə isə xeyli hissə, 10 min kv km - dən artıq hissə də Gürcüstan, Azərbaycan və Ermənistan arasında mübahisəli bir ərazi idi. Borçalı da Gürcüstana verildi. İndi belə bir məsələ ortaya çıxır. SSRİ - ni dünyada heç kim qəbul etmir. SSRİ təşkil olunana kimi olan sərhədlər məlumdur. Həmin sərhədlər, xəritələr həm Amerikada, Fransada, həm də Rusiyada var. Ermənistan danışıqları bu cür pozsa, Azərbaycan 1920 - ci ilin xəritələri ilə məsələlərə baxacaq. Əgər vəziyyət belə davam etsə, 1918 - ci ilin may ayının 29 - na kimi olan xəritələrə baxacaq ki, orda da Ermənistanın mövcudluğu demək olar yox idi. Bu məsələdə Azərbaycan dövləti heç bir güzəştə getməyəcək və bu proses daha uzun müddət davam edə bilməz. Ermənistan və onun sahibləri ağıllarını başlarına yığmasa, Azərbaycan torpaqlarını öz ordusu gücünə işğaldan azad etdiyi kimi, sərhədlərini də öz ordusu gücünə müəyyənləşdirəcək və sonra Ermənistana təslimçi aktını imzaladıb, ondan razılaşmanı alacaq”.
Məhəmmədəli QƏRİBLİ
