Bu günlərdə Rusiya XİN-in Azərbaycanla bağlı qərəzli bəyanatı bu ölkənin də mətbuatında müzakirə obyektinə çevrilib. Rusiyanın “Kommersant” qəzeti yazır ki, son onillik ərzində Rusiya-Azərbaycan münasibətlərində ən ciddi böhran yaranıb:
“Cənubi Qafqaz dramatik hadisələrin astanasında ola bilər. Bu, Rusiya və Azərbaycanın xarici işlər nazirlikləri arasında görünməmiş kəskin bəyanat mübadiləsindən sonra aydın oldu. Azərbaycan XİN bəyanatından ən maraqlı hissə isə budur: “Erməni silahlı birləşmələrinin qalıqlarının Azərbaycandan çıxarılması hələ də təmin edilməyib. Üstəlik, bu birləşmələrə Rusiya sülhməramlı kontingentinin nəzarəti altında dəstək verilir”. Başqa sözlə, Bakı birbaşa Moskvanı Ermənistan və Azərbaycan arasında hərbi əməliyyatları dayandıran 2020-ci ilin noyabr razılaşmalarını yerinə yetirməkdə acizlikdə və könülsüzlükdə ittiham edir. Əlavə olaraq, Qarabağdan erməni silahlı birləşmələrinin qalıqlarının çıxarılmasına nail olmaq əzmini göstərir. Bakının getdikcə daha qətiyyətli olan bəyanatları heç bir şübhə yeri qoymur ki, Prezident Əliyev və onun komandası hadisələrin inkişafını sürətləndirməyə hazırdırlar”.
“Rus mediası Azərbaycanın haqlı narazılığını qeyd etmək əvəzinə, bunu yanlış istiqamətdə təftiş edib təqdim edir”
Sözügedən məsələni “Bakı-Xəbər”ə şərh edən siyasi ekspert Elşad Həsənovun fikrincə, son dövrlər Rusiya hakimiyyət təmsilçiləri 10 noyabr üçtərəfli razılaşmasının bəndlərinin yerinə yetirilməməsinə biganə yanaşırlar: “Bu da regionda gərginlik yaradır. Ancaq onlardan fərqli olaraq, Azərbaycan razılaşmadan irəli gələn məsələləri yerinə yetirib. Əfsuslar olsun ki, bu yöndə Rusiya üzərinə düşən öhdəlikləri yerinə yetirmək əvəzinə, bu ölkənin XİN-i Azərbaycana qarşı qərəzli bəyanatla çıxış edir. 10 noyabr razılaşmasında qeyd edilir ki, Rusiya sülhməramlılarının yerləşdirilməsi ilə paralel erməni silahlı birləşmələri Qarabağdan çıxarılmalıdır. Bunu kim təmin etməlidir? Əlbəttə ki, Rusiya. Üçtərəfli Bəyanatın 9-cu bəndində göstərilir ki, Zəngəzur üzərindən Naxçıvana maneəsiz gediş-gəliş açılmalıdır. İndiyə qədər bu təmin olunmayıb. Halbuki, Rusiya da bununla bağlı üzərinə öhdəlik götürüb. Sonuncu Brüssel görüşündə Şarl Mişel bəyan etdi ki, sözügedən məsələlər müzakirə olunub. Hətta qeyd etdi ki, Avropa bankları Zəngəzurdan keçəcək dəmir yolunun açılması üçün maliyyə dəstəyi göstərəcəklər. Bu o deməkdir ki, həmin yolun açılması razılaşdırılıb. Ancaq bölgədə sabitliyin təmin olunması üçün vacib olan şərt Qarabağdakı qanunsuz silahlı birləşmələrin çıxarılmasıdır. Avropa İttifaqı da bunda maraqlıdır. Lakin problem ondadır ki, Rusiya erməni birləşmələrinin Qarabağdan çıxarılmasına mane olur. Rusiya sülhməramlıları separatçı qruplara silah daşınmasını təmin edir. Yaxşı olardı ki, Rusiya mediası bunların üzərinə getsin. Ancaq biz bunu görmürük. Əksinə, Rusiya mediası Azərbaycanın haqlı narazılığını qeyd etmək əvəzinə, bunu yanlış istiqamətdə təftiş edib təqdim edir. Bütün bunlardan ruhlanan Qarabağdakı separatçılar daha sərt açıqlamalarla çıxış edirlər. Təbii ki, onların arxasında Rusiya dayanmasa, buna cəsarət etməzlər. Azərbaycan XİN-i sərt bəyanat verməklə göstərdi ki, ölkəmiz geri çəkilməyəcək. Bu, Rusiyanın xoşuna gəlsə də, gəlməsə də Qarabağa Azərbaycanın tam nəzarəti bərpa olunmalıdır. Üstəlik, 22 fevral 2022-ci ildə Azərbaycanla Rusiya arasında müttəfiqlik sazişi imzalanıb. Bu səbəbdən üçtərəfli razılaşmada Rusiya üzərinə düşən öhdəlikləri yerinə yetirməlidir”.
Vidadi ORDAHALLI
