“Prezident İlham Əliyev və baş nazir Nikol Paşinyanla danışıqlar zamanı Qarabağın erməni sakinləri üçün Bərdə-Ağdam istiqamətində humanitar yüklərin daşınması məsələsi müzakirə olunub”. Bunu Avropa İttifaqı Şurasının prezidenti Şarl Mişel Brüsseldə Prezident İlham Əliyev və baş nazir Nikol Paşinyanla görüşündən sonra mətbuata açıqlamasında deyib.
Xankəndidəki sülhməramlılara və ermənilərə təminatın Bərdə-Ağdam yolu ilə gətirilməsinin Laçın yolu ilə gətirilməsidən nə kimi üstünlükləri var?
“Ağdamla Xankəndi arasındakı məsafə cəmi 25 kilometrdir, amma Xankəndidən Gorusa olan məsafə 100 kilometrdən artıqdır”
Politoloq Mehman İsmayılov “Bakı-Xəbər”ə şərhində “Birincisi, Şarl Mişel Brüssel görüşündə hər iki variantın işlədilməsinin tərəfdarı olduğunu söylədi. Yəni Qarabağda yaşayan erməni əsilli Azərbaycan vətəndaşlarının bütün humanitar qayğılarının, sosial məsələlərinin həm Laçın yolu vasitəsilə Ermənistandan, həm də Ağdam yolu ilə Azərbaycandan paralel olaraq həyata keçirilməsini dəstəklədi. Dövlətimizin erməni əsilli Azərbaycan vətəndaşları olan Qarabağdakı erməni əhalisinin bütün sosial-iqtisadi, hümanitar problemlərinin çözülməsi istiqamətində atdığı addım Azərbaycanın dövlət və milli maraqlarının tələb etdiyi bir addımdır. Bu siyasi məsələdir. Azərbaycanın vətəndaşları Ermənistan tərəfindən nə maliyyələşdirilə, nə də onların sosial-iqtisadi, hümanitar məsələləri həll edilə bilər, buna son qoyulmalıdır. Azərbaycan çox aydın şəkildə məsələləri masa üzərinə qoyur və bunun həllini tələb edir ki, Azərbaycanın əhalisi Azərbaycan hökuməti tərəfindən maliyyələşdirilməlidir, onların bütün problemləri, təhsil, səhiyyə, sosial-iqtisadi, hümanitar məsələləri Azərbaycan dövləti tərəfindən həll edilməlidir”-deyə bildirdi.
M.İsmayılovun sözlərinə görə, bu, Azərbaycanın ərazi bütövlüyünün və öz ərazisi üzərində suveren hüquqlarının tam bərpası deməkdir. Məsələnin başqa tərəfinə gəlincə, M.İsmayılov qeyd etdi ki, Ağdam-Bərdə yolu məsafə baxımından da sərfəlidir: “Ağdamla Xankəndi arasındakı məsafə cəmi 25 kilometrdir, amma Xankəndidən Gorusa olan məsafə 100 kilometrdən artıqdır, özü də dağ yolları və aşırımlarla, dolamalarla. Praktik baxımdan ora Ağdam yolu ilə təminatı və təchizatı həyata keçirmək çox əlverişlidir, bu bu cür də olmalıdır. Başqa məsələ isə Rusiyanın və Qarabağdakı erməni separatçılarını, revanşistləri maliyyələşdirən, silahlandıran, dəstəkləyən qüvvələrin maraqlarıdır ki, o əhalinin təminatı Azərbaycanın nəzarətindən kənarda olsun. Bu isə Azərbaycanın qəbul etmədiyi bir məsələdir. Başqa bir məqam isə odur ki, Azərbaycan indi təcili şəkildə Ağdamda bir qida məhsulları deposu inşa edib, o əhalini təmin etmək üçün gərəkli olan bütün qida məhsullarının, dərman preparatlarının bura gətirilməsini təmin etməlidir. Təklif edərdim ki, Şuşa ilə Xankəndi arasında Azərbaycan nəhəng bir qida məhsulları deposu inşa etsin və orada onların ehtiyacı olan hər şey Azərbaycanın nəzarəti altında bu depoda olsun. Bununla da ermənilərin qida, dərman, xəstəxana üçün Ermənistana getdikləri barədə bəhanələrinə son qoyulsun”.
M.İsmayılov hesab edir ki, onlar Azərbaycan ərazində yaşayırlar və Azərbaycan vətəndaşlığını qəbul etsələr də, etməsələr də qida təminatını bizim ərazidən keçirmək zorundadırlar. O qeyd edir ki, kim bizim vətəndaşlığımızı qəbul etməyəcəksə, bizim ərazimizi tərk edəcək. Amma Azərbaycan belə bir addım atıb Şuşa-Xanbkəndi yolunda nəhənğ bir qida, tibbi ləvazimat, dərman məhsulları deposu təşkil edərsə, Xankəndi erməniləri 120 kilometr deyil, 6-8 kilometr yol gəlməklə o depodan öz təminatlarını həyata keçirərlər. “Yəni Şarl Mişel Azərbaycanın atdığı bu addımı dəstəkləyir, amma təbii ki, vəziyyəti yumşaltmaq üçün hələlik iki variantın ikisinin də işlək olmasını təklif edir. Amma təbii ki, Rusiyanın sülhməramlı adlandırdığımız işğalçı qüvvələri Azərbaycan ərazisini tərk edən kimi bu məsələlər özünün məntiqi həllini tapacaq, Azərbaycanın erməni əsilli vətəndaşları bütün ehtiyaclarını Azərbaycandan ödəməlidirlər. Ermənistan və Rusiya onları nə maliyyələşdirməlidir, nə Azərbaycanın daxili işlərinə qarışmalıdır, nə Azərbaycan ərazisində olan insanların qayğısına qalmalıdır, bu, Azərbaycanın dövlət müstəqilliyinə və suveren haqlarına qarşı qəsd siyasətidir. O səbəbdən Azərbaycan bu addımı çox ciddi şəkildə atıb və onu müdafiə edəcək”-deyə M.İsmayılov vurğuladı.
İradə SARIYEVA
