“Smolensk Atom Elektrik Stansiyasına (AES) NATO raketləri ilə hücum cəhdi edilərsə, Rusiya Şərqi Avropadakı nüvə obyektlərinə zərbələr endirə bilər”. Bu barədə Rusiya Federasiyası Təhlükəsizlik Şurasının sədr müavini Dmitri Medvedyev özünün Teleqram kanalında bildirib.
“Smolensk AES-ə NATO raketləri ilə hücum cəhdi təsdiqlənərsə, Rusiyanın Cənubi Ukrayna AES, Rovno AES və Xmelnitski AES-ə, eləcə də Şərqi Avropadakı nüvə obyektlərinə eyni vaxtda zərbə endirməsi ssenarisini nəzərdən keçirmək lazımdır. Artıq burada çəkinməli bir şey yoxdur”. Qeyd edək ki, ötən bazar günü bəzi teleqram kanallarında Ukrayna Silahlı Qüvvələrinin Smolensk vilayətindəki Desnoqorsk AES-ə raketlərlə hücum etmək istəməsi ilə bağlı xəbərlər yayılıb. Xatırladaq ki, iyulun 9-da günortadan sonra Rusiya hava hücumundan müdafiə qüvvələri iki raketi vurub. Daha sonra onların fraqmentləri Bryansk vilayətinin ərazisində aşkar edilib. Bir sıra KİV istisna etmir ki, söhbət məhz Smolensk vilayətindəki atom elektrik stansiyasını və Kaluqa vilayətindəki hərbi aerodromu vura biləcək raketlərdən gedir. Dmitri Medvedyev əvvəllər ən sərt formada nüvə raketlərdən istifadənin zəruriliyindən danışıb. Bir neçə gün əvvəl o deyib: “İstənilən müharibəni nüvə silahından dərhal istifadə etməklə bitirmək olar”. Medvedyev İkinci Dünya müharibəsinin sonunda ABŞ-ın Xirosima və Naqasakiyə atdığı atom bombalarını xatırladıb. Beləliklə, nüvə silahı ilə bağlı təhdidlər artır. Bunlar fonunda Ukrayna prezidenti Volodimir Zelenski Rusiyanın nüvə silahından istifadə ehtimalını, Zaporojye AES-dəki vəziyyəti şərh edib. Zelenski qeyd edib ki, Rusiya prezidenti Vladimir Putin nüvə silahından istifadə etməyəcək. Ukrayna prezidenti “ABC News” telekanalına müsahibəsində bildirib ki, Rusiya Ukrayna Silahlı Qüvvələrinin əks-hücumunu dayandırmaq üçün Zaporojye atom elektrik stansiyasını minalaya bilər. Bu arada BMT-nin Beynəlxalq Atom Enerjisi Agentliyi (MAQATE) Zaporojye AES-də mümkün partlayışı təsdiqləyən dəlil görmədiyini bildirib, eyni zamanda obyektə daha şəffaf giriş tələb edib. Zelenski buna da toxunub: “Başqa partlayıcılar varmı? Bəli. Onlar indi partlayıcıları görə bilirlərmi? Xeyr. Ərazinin nə qədər hissəsinin minalarla çirklənməsi barədə nəticə çıxarmaq üçün... qərəzsiz olan kifayət qədər insan varmı? Xeyr”. Lakin ekspertlər diqqəti ona yönəldir ki, Rusiya-Ukrayna müharibəsi tərəflərin “qırmızı xət”ləri çox asanlıqla keçə biləcəyini göstərir. Məsələn, “Kaxovka” su elektrik stansiyasnın partladılmasına qədər hərbi təhlilçilər düşünmürdülər ki, Rusiya və ya Ukrayna bu fəaliyyəti icra edə bilər. “Harpers Magazine” jurnalı bu fonda yazır ki, ABŞ-ın Rusiya ilə bağlı xarici siyasəti dünyanı nüvə müharibəsi təhlükəsi həddinə çatdırıb. Məqalədə amerikalı tarixçi və diplomat Corc Kennanın səsləndirdiyi fikirlərdən sitat gətirilib. O, 1997-ci ildə bildirmişdi ki, Vaşinqtonun “soyuq müharibə” atmosferini bərpa etmək səyləri Ağ Evin üzləşəcəyi ciddi səhv addım olacaq. Bildirilir ki, ABŞ nümayəndələri, bununla yanaşı, nüvə təhlükəsizliyi və təminatı sahəsindəki öhdəliklərini genişləndirmək istiqamətində səylərini davam etdiriblər. Məqalədə vurğulanır ki, Ağ Ev Rusiya ilə açıq münaqişəyə yaxınlaşır. Bütün bunlar ABŞ və Rusiyanın nüvə qüvvələrini yüksək hazırlıq vəziyyətinə gətirib çıxarıb. Hazırki məqamda iki ölkə arasında nüvə qarşıdurması tarixdə görünməmiş şəkildə fəlakətli həddə çatıb.
Tanınmış polşalı analitik Roman Bekker də qeyd edir ki, Putinə yaxın olan Rusiya Təhlükəsizlik Şurasının sədr müavini Dmitri Medvedyevin nüvə silahından istifadənin tərəfdarı olduğu və demək olar ki, hər gün nüvə apokalipsisinin mümkünlüyündən danışması təsadüfü deyil: “Medvedyev, çətin ki, belə bəyanatları təsadüfən verir, o, Putinin düşüncə tərzini bilir. Bu yerdə Putinin bir neçə il əvvəl “Valday” Diskussiya Klubunun iclasındakı çıxışını xatırlaya bilərik. “Onlar (Qərbdə) hamısı öləcəklər, biz isə əzabkeşlər kimi cənnətə gedəcəyik”, - ifadəsinə necə münasibət göstərmək olar? Hələ o zamanlar bu cümlə nüvə müharibəsi təhlükəsinin mövcud olduğuna sübut idi. Düşünürəm ki, Kreml müharibədə uduzsa, o zaman “qırmızı düymə”yə basa bilər. Yenə deyirəm, bu bütün dünya üçün çox təhlükəlidir”. Qeyd edək ki, Rusiyanın taktiki nüvə silahları artıq Belarusdadır. Polşa isə Qərbdən nüvə silahlarını öz ərazisində yerləşdirməyi xahiş edib. Bu arada “Future of Life Institute” qeyri-kommersiya təşkilatının alimləri ABŞ və Rusiya arasında proqnozlaşdırıla bilən nüvə münaqişəsinin simulyasiyasını həyata keçiriblər. Buna əsasən, bir tərəf nüvə raketlərini buraxır, digər tərəf onları aşkar edir və zərbə nöqtəsinə qədər zərbə endirərək cavab verir. Norveçin qərbində ABŞ sualtı qayıqlarından atılan ballistik raketlər təxminən 10 dəqiqə ərzində Rusiyanı, Rusiya raketləri isə Kanadanın şimalından bir neçə dəqiqə ərzində ABŞ-ı vurmağa başlayır. Qeyd olunur ki, ilk zərbələr elektronika və elektrik şəbəkələrinə dəyəcək, bununla da hər metrdə on minlərlə volt gərginliyə malik elektromaqnit impulsuna səbəb olacaq. Sonrakı zərbələr komanda məntəqələrini və nüvə qurğularını məhv etməyə yönəlib. Yerdə yerləşdirilən qitələrarası ballistik raketlər buraxılış anından hədəfə çatana qədər təxminən yarım saat uçur. Bütün bunlar bütün planet üçün böyük təhdidə çevrilir.
Nahid SALAYEV
