Rusiya Təhlükəsizlik Şurasının sədr müavini Dmitri Medvedev Telegram kanalında deyib ki, Smolensk vilayətindəki Desnoqorsk Atom Elektrik Stansiyasına (AES) NATO raketləri ilə hücum cəhdi təsdiqlənərsə, Rusiyanın Ukrayna və Şərqi Avropadakı bir sıra nüvə obyektlərinə eyni vaxtda zərbə endirməsi ssenarisini nəzərdən keçirmək lazımdır.
Rusiya kanalları Ukrayna qüvvələrinin Smolensk AES-ə hücum etməyə cəhd etdiyini bildirib. Məlumata görə, zərbənin Britaniyanın “Storm Shadow” qanadlı raketləri tərəfindən həyata keçirildiyi iddia edilir. Mərmilər saat 14:00 radələrində Bryansk vilayətinin Bıtoş kəndi üzərində Rusiyanın hava hücumundan müdafiə sistemi tərəfindən vurulub.
Bütün bu yaşananlar fonunda, dünyanın nüvə müharibəsinin astanasında olduğu təsdiqlənirmi?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, əslində soyuq müharibə cəbhəsində nüvə məsələsi həmişə aktual, həmişə dinamik bir fazada saxlanılmış mövzudur: “Yəni hələ ötən əsrin ikinci yarısından sonra, İkinci Dünya müharibəsindən sonra, Qərb və ABŞ başda olmaqla, Rusiya ilə aralarındakı “soyuq müharibə”nin əsas paradiqmasını nüvə silahı təşkil edirdi. Bu ölkələr nüvə silahına daha tez yiyələnmək məqsədi ilə yarışa girmişdi və bu məsələyə milyardlarla dollar vəsait xərclənirdi. Bilirsiz ki, ABŞ prezidenti Con Kennedi məhz bu soyuq müharibəyə son qoymaq məqsədilə belə bir proqramla çıxış etmişdi. O bildirmişdi ki, soyuq müharibəyə, nüvə silahına xərclənən pulu mədəniyyətin inkişafına, kosmosun tədqiqinə xərcləyəcək. Ancaq Con Kennedinin bu arzusu yarımçıq qaldı. Bilirsiz ki, ona qarşı 1962 - ci ildə Dallasda böyük bir sui - qəsd təşkil edildi. Bu müharibənin əsas tərkib hissəsini də nüvə silahı təşkil edirdi. Nüvə silahı üzərində qurulmuş prinsiplər vardı. Bu gün Amerika və Rusiya arasında “soyuq müharibə”nin növbəti bir fazasına qədəm qoymuşuq. Bu birbaşa odlu müharibədir. Amerika bu müharibənin başlanmasından ötrü xüsusi xidmət orqanlarının, kəşfiyyat orqanlarının iştirakı ilə çox böyük vəsait xərcləmişdi. Təbii, Amerika ciddi cəhdlə çalışırdı ki, strategiyada tutulan planları həyata keçirsin. Buna da nail oldu. Bu gün Rusiya-Ukrayna müharibəsi Amerikanın Rusiyaya qarşı apardığı “soyuq müharibə”nin isti variantıdır. Amerika çox hiyləgərcəsinə planını cızdı və həyata keçirdi. Artıq Rusiyanın Ukraynadakı vəziyyəti gündən - günə gərginləşir. Rusiya sanki bütün dünyaya qarşı döyüşür. Müharibənin hər uzanan günü Rusiya üçün çox ciddi maliyyə hesabına başa gəlir. Bütün dünya Ukraynanın silahlanması, maliyyələşməsi ilə bağlı böyük cəhdlər göstərir, ən yeni silahlar verilir. Bütün bu silahların verilməsində, maliyyə dəstəyinin göstərilməsində əsas məqsəd Rusiyanı daha çox bataqlığa çəkməkdir. Rusiya artıq vəziyyətin gərginliyini başa düşür. Ona görə də, prezident Vladimir Putinin də dilindən tez - tez nüvə silahı ilə bağlı fikirlər eşidirik. Onun mühafizəçilərinin sırasında əlində diplomat mühafizəçilərin olması da ayrıca bir mesajdır. Amma açıq şəkildə də Putin bildirib ki, elə etməsinlər bütün dünya da, onlar da məhv olsun. Təbii ki, bütün bunlar ciddi alternativlərlə işlənilir. Burada elə bir vəziyyətdir ki, nüvə silahına doğru ciddi addımlar artır, təhdidlər artır. Rusiyanın əlində hazırda ciddi nüvə silahları var. Dünyanı dağıtmaq gücündə olan silahların işə düşməsini biz də heç vaxt arzulamarıq. Bu, bölgədə çox böyük fəlakətlərə səbəb ola bilər. Bəli, dünya nüvə silahı ilə bir-birinə hədə-qorxu gələn dövlətlərin əlində aciz qalıb. Bu gün nüvə silahının adı heç vaxt bu qədər hallandırılmayıb. Eyni zamanda heç vaxt belə bir təsəvvür yaranmayıb ki, dünya nüvə silahından istifadə edə bilər. Təbii ki, bu silahdan istifadənin də çox ciddi problemləri var. Bu asan məsələ deyil və bir nəfərin qəbul etdiyi qərar əsasında reallaşa bilməz. Dünya bu müharibəni yaşamaya bilər. Amma görünən budur ki, bütün dünya liderləri, Amerika, Rusiya kimi aparıcı dövlətlər bir - birinə qarşı nüvə silahı ilə təhlükəli hədə - qorxu ilə çıxış edirlər. Elə bir dövrdə yaşayırıq ki, nüvə sözü hər şeydən çox işlənir. Bu çox təhlükəli tendesiyadır. Arzu edək ki, vəziyyət daha da ağırlaşmasın”.
Məhəmmədəli QƏRİBLİ
