Ermənistan Kollektiv Təhlükəsizlik Müqaviləsi Təşkilatının (KTMT) təlimlərini keçirməkdən imtina edib. Bunu Baş nazir Nikol Paşinyan yanvarın 10-da mətbuat konfransında bildirib.
Onun sözlərinə görə, müdafiə naziri artıq KTMT-nin birləşmiş qərargahına məlumat verib ki, yaranmış vəziyyətdə təlimlərin keçirilməsi məqsədəuyğun deyil. İstənilən halda, bu il təlimlər keçirilməyəcək. Bundan öncə Ermənistanın ərazisində KTMT-nin “Sarsılmaz qardaşlıq – 2023” adlı təlimlərinin keçiriləcəyi deyilmişdi. Daha sonra Paşinyan bunları deyib: “Biz KTMT təlimlərinin Ermənistanda keçirilməsini yersiz hesab etdik, çünki bu təlimlər Türkiyə-Azərbaycan tandemi üçün təhlükə yarada bilər. Onlar təlimlər keçirəcəklər, sonra biz bu təhlükə ilə baş-başa qalacağıq. Bu səbəbdən KTMT regionda öz məsuliyyət sahəsini aydınlaşdırmalıdır. Onlar cavab vermədikdə, bu bizim üçün əsas problemə çevrilir. Mən KTMT-yə ümid edirəm, amma başqa şey odur ki, KTMT məyus edə bilər”.
Maraqlıdır, Paşinyan “yaranmış vəziyyətdə təlimlərin keçirilməsi məqsədəuyğun deyil” deyərkən hansı şəraiti nəzərdə tutur? Digər tərəfdən o, sözügedən təlimlərin Azərbaycan-Türkiyə tandeminə təhlükə törətdiyini deməklə əslində heç də bizim qayğımıza qalmır. Bununla əslində öz qayğısına qalır. KTMT-ni özündən uzaqlaşdırmaq, Ermənistanın bu təşkilatdan çıxması üçün hər şeydən istifadə edir.
“Paşinyan bu cür çıxışlarla həm Qərbdəki hamilərinə hesabat verir, həm də daxili auditoriyaya xitab edərək...”
Sözügedən məsələni dəyərləndirən politoloq İlyas Hüseynovun fikrincə, Paşinyanın mətbuat konfransında verdiyi bəyanat Ermənistanı daha çox Rusiyanın təsirindən qoparmaq və Qərbə yaxınlaşdırmaq məqsədi daşıyır: “Bu siyasət əslində Ermənistanın Baş nazirinin siyasi kursunun təməlini təşkil edir və bu da onu göstərir ki, Paşinyan hakimiyyətə gəlməmişdən əvvəlki siyasi kursunu hələ də davam etdirir. Hesab edirəm ki, Moskva İrəvana qarşı hər nə qədər səbr nümayiş etdirsə də, onlar da çoxdan nəyin nə olduğunu bilirlər. Sadəcə Moskvada hesab edirlər ki, Paşinyanla körpüləri yandırmaq hələ ki, çox tezdir. Ancaq görünən odur ki, Paşinyan bu körpüləri yandırmağa çoxdan hazırdır. Sadəcə, Ermənistanın Baş naziri ilk aqressiyanın məhz Rusiyadan gəlməsini istəyir. Paşinyan bu cür çıxışlarla həm Qərbdəki hamilərinə hesabat verir, həm də daxili auditoriyaya xitab edərək Rusiyanın Ermənistandakı mövqeyini sarsıtmaq siyasəti yürüdür. Paşinyan Rusiyaya və təmsil olunduğu KTMT-yə qarşı demarşı davam etdirir. Ötən ilin sonlarında Paşinyan İrəvanda keçirilən KTMT-nin sammitində Ermənistanın müdafiəsi və ona yardım nəzərdə tutan bəyanatı imzalamaqdan imtina etdi. Çünki həmin dövrdə Ermənistanda Avropa İttifaqının mülki missiyası fəaliyyət göstərirdi və bu missiya dekabrın 19-da öz fəaliyyətini bitirdi. Digər tərəfdən, artıq İrəvanın demarşı çoxşaxəli xarakter daşıyır. Laçın-Xankəndi yolunda Azərbaycanın ekofəallarının həyata keçirdiyi aksiya ilə paralel, Azərbaycanın Rusiya və Ermənistan xarici işlər nazirlərinin Moskvada görüşünün keçirilməsi nəzərdə tutulurdu. Amma bu görüşə Ermənistanın xarici işlər naziri Ararat Mirzoyan gəlmədi. O, aksiyanı bəhanə edərək bu görüşdən imtina etdi. Biz görürük ki, Ermənistanın siyasi rəhbərliyi müxtəlif bəhanələrlə Rusiya ilə keçirilən bütün dialoqlardan özünü kənarda saxlamağa çalışır və açıq-aşkar şəkildə dialoqdan imtina etməklə öz işini bitmiş sayır. Ermənistan de-fakto KTMT-dən getdikcə uzaqlaşır. Zaman-zaman da bu təhdidlərə, şantajlara çevrilir. İrəvanın KTMT-dən çıxmaq niyyəti özünü geniş şəkildə büruzə verir”.
Vidadi ORDAHALLI
