Məlum olduğu kimi, Ermənistan Müdafiə Nazirliyi qadınların könüllü olaraq orduya hərbi xidmətə çağırılması imkanlarını nəzərdən keçirir. Ermənistanın Müdafiə Nazirliyinin mətbuat katibi Aram Torosyan bu faktı təsdiq edərək bildirib: “Yalnız onu təsdiq edə bilərəm ki, biz qadınlara könüllü olaraq hərbi xidmətə getmə imkanının verilməsi məsələsini müzakirə edirik”.
Erməni mediasının məlumatına əsasən, artıq Ermənistanda qadınların hərbi xidmətə cəlb olunması üçün qanun layihəsi hazırlanır. Müdafiə nazirinin müavini Arman Sarkisyan müvafiq layihənin hazır olduqdan sonra ictimaiyyətin müzakirəsinə veriləcəyini vurğulayıb. Arman Sarkisyan qadınların orduda xidmətinin sırf könüllü xarakter daşıyacağını əlavə edib. Onun sözlərinə görə, bu fikrin yaranmasına səbəb müdafiə və təhlükəsizliklə bağlı məsələlərdə qadınların fəallığı olub. Nazir müavini qeyd edib ki, Müdafiə Nazirliyi əvvəllər qadınlar üçün atıcılıq kursları təşkil edib və nəticələr rəhbərliyi yaxşı mənada təəccübləndirib. Bu və digər amillər nəzərə alınaraq müvafiq qanunvericilik təşəbbüslərinin müzakirəsinə başlanılması qərara alınıb. Sarkisyanın sözlərinə görə, qadınlar üçün hərbi xidmət yalnız könüllü olacaq: “Bəzi hüquqi prosedurlardan keçdikdən sonra qanun layihəsi ictimaiyyətə təqdim olunacaq və bütün maraqlı tərəflər öz fikirlərini bildirmək imkanı əldə edəcəklər. Artıq təxmini layihəmiz var, lakin konkret danışmaq hələ tezdir”. Nazirlik rəsmisi əlavə edib ki, söhbət qadınların potensialından istifadə edərək, silahlı qüvvələrin döyüş hazırlığının artırılmasından gedir. Ekspertlər isə hesab edirlər ki, Ermənistan rəhbərliyi ordu sıralarında yaranan əsgər çatışmazlığını aradan qaldırmaq üçün qadınların xidmətindən istifadə etməyi düşünür. Ordunun qadınların ümidinə qalması Ermənistanın düşdüyü vəziyyəti açıq şəkildə ortaya qoyur. Erməni gənclər arasında ordudan yayınmaq halları da qadınlara ehtiyacı artırıb. Məsələ ilə bağlı erməni hərbi ekspert Mher Hakopyan bildirir: “Ermənistanda Müdafiə Nazirliyi qadın vətəndaşlarının könüllü hərbi xidmətə getmə imkanının yaradılması məsələsini müzakirə edir. Qadınlar indi də könüllü olaraq müqaviləli hərbi qulluqçu kimi qulluq edirlər. Qadınların könüllü olaraq məcburi hərbi xidmətə getməsinə gəlincə, bu bir qədər absurddur, o cümlədən ifadə baxımından absurddur. İndi siz necə təsəvvür edirsiniz, əgər qadın müqaviləli xidmət keçə bilərsə, müddətli hərbi qulluqçu olmağa gedəcək? Müddət isə məcburidir. 18 yaşına çatdıqdan sonra qız müqaviləli xidmət keçə bilər, onsuz da bu imkan var. Bəs qadınlar da müddətli xidmət keçməli olsalar, bunun harası könüllü oldu? Burada nəsə tam deyil”. Erməni hərbi ekspert qadınların məcburi hərbi xidmətinin mümkünlüyünə toxunaraq bildirib: “Bu, ayrı və böyük mövzudur, sosial, fiziki, milli mentalitet və bir çox başqa cəhətləri var. Hər erməni kişi 18 yaşlı qızının hərbi xidmətə getməsinə icazə verməz. Sonra orada min bir sual yaranacaq. Bəli, ümumiyyətlə, mən məsələn, hansısa yaşayış yerinin yaxınlığında, bəlkə də axşam evə gəlmək imkanı ilə qadın xidmətinin təşkil edilməsinin tərəfdarıyam. Bu, ciddi müzakirə mövzusudur. Hər halda, qadınların kişilərin xidmət etdiyi kimi xidmət etməli olduğunu düşünmək ciddi deyil. Kimin komandir olacağını, hansı şəraitdə yaşayacağını bilmədən 18 yaşlı qızı evindən götürmək düzgün deyil. Burada çoxlu suallar var, amma bu barədə düşünmək olar. İsrailin təcrübəsini götürmək, yaxşı öyrənmək olar. Adamlar bundan keçiblər, niyə biz yeni velosiped icad edək?”. Ermənistan parlamentinin müdafiə və təhlükəsizlik məsələləri daimi komissiyasının üzvü, “Vətəndaş müqaviləsi” fraksiyasının deputatı, general Qaqik Melkonyanın sözlərinə görə, hələ layihə yoxdur, parlamentə çatmayıb. Melkonyan qeyd edib ki, bu mühüm təşəbbüsdür, xidmət etmək istəyən qızlar çoxdur, buna görə xidmət üçün imkan yaradan qanun olmalıdır. Burada onu da qeyd edək ki, hazırda Ermənistan ordusunda ailə quran qadınlara hərbi xidmət stajına görə güzəştlər edilmir. Qadınların hesabına ordunu gücləndirmək istəyən Ermənistan başqa ölkələrdən silah alınmasına da xüsusi diqqət edir. Təbii ki, bütün bunların əsas hədəfi Azərbaycanla düşmənçilik siyasətinin davamıdır. Amma Azərbaycan ən yüksək səviyyədə öz xəbərdarlığını edib. Qeyd edək ki, prezident İlham Əliyev yerli televiziya kanallarına müsahibəsində bu xüsusda bildirib: “Onu da bildirməliyəm ki, Ermənistana istənilən silah verilərsə, onlara kömək etməyəcək və mən Ermənistan tərəfinə bir neçə dəfə bunu demişəm. Demişəm ki, buna əbəs yerə vəsait xərcləməyin. Çünki birincisi, bu sizə kömək etməyəcək, ikincisi ölkənizdə olan revanşist qüvvələrdə hansısa bir illüziya yarada bilər. İllüziya yarada bilər ki, siz revanş edə bilərsiniz. Edə bilməyəcəksiniz! Biz əgər görsək ki, bizim üçün hər hansı bir ciddi təhlükə varsa, bu təhlükəni dərhal dəf edəcəyik. Baxmayaraq ki, bu təhlükə harada yaranıb, bizim ərazimizdə, yaxud da ki, hüdudlarımızın kənarında. Bu, bizim legitim hüququmuzdur. Ona görə belə cəhdlər var və biz görürük, bilirik hansı ölkələr Ermənistana silah verməyə hazırlaşırlar. Əfsuslar olsun ki, onların arasında Hindistan da indi rol alıb. Biz bunu qeyri-dost addım kimi qiymətləndiririk. Çünki bu silahların, özü də hücum silahlarının bir hədəfi var, o da Azərbaycandır. Ona görə biz, əlbəttə ki, lazımi tədbirləri görürük və imkan verə bilmərik ki, Ermənistan bizim üçün təhlükə yaratsın, heç vaxt imkan verə bilmərik”.
Bütün bunlar o deməkdi rki, erməni tərəfinin istənilən düşmənçilk addımına Azərbaycan ən sərt formada cavab verəcək.
Tahir TAĞIYEV
