Ermənistan rəsmilərinin ölkənin KTMT-ni tərk edə biləcəyi ilə bağlı şantaj xarakterli açıqlamaları səngimək bilmir. Ermənistan parlamentində jurnalistlərə müsahibəsində parlamentin spikeri Alen Simonyan növbəti dəfə bəyan edib ki, KTMT məsələsində Ermənistanın mövqeyi qətidir.
O, “Ermənistanın Qərb fiqurları vasitəsilə Azərbaycanla danışıqlar aparması təhlükəlidirmi, bu, danışıqlara aparacaqmı və Rusiyada qısqanclıq hissi yaratmırmı” sualına belə cavab verib: “Mənə fərqi yoxdur – qısqanclıq və ya razılaşmalar əsasında danışıqlar baş verir. Mənim ritorik sualım var. Tutaq ki, hansısa xəyali düşmən Rusiya sərhədini keçib və buna görə Soçi boşalıb. Bu vəziyyəti təsəvvür edə bilirsinizmi? Ölkəmizin təhlükəsizliyi və ərazi bütövlüyü mənim üçün önəmlidir. Əgər KTMT-də bu mexanizm işləməsə, o zaman təbii ki, biz başqa mexanizmlərə keçəcəyik və hazırda bunu edirik. Biz ona gətirib çıxardıq ki, bəyanat verildi, siyasi qiymət verildi. Amma eyni zamanda, bu bizi qane etmir. Biz ölkəmizin təhlükəsizliyinin təmin olunmasından danışırıq və filan tərəfdən nəyinsə olmasını gözləməyəcəyik. Çünki nəyisə gözləməyə vaxt, ərazi, imkan yoxdur. Bu qədər gözlədik, bəsdir”.
Görünən odur ki, Ermənistan KTMT məsələsində istəklərindən əl çəkmək istəmir.
“Erməni siyasətçiləri anladılar ki, Rusiyanın Ukraynada apardığı müharibədə getdikcə...”
Sözügedən məsələni “Bakı-Xəbər”ə şərh edən AMİP-in sədr müavini Afsəddin Nəbiyev hesab edir ki, Ermənistan belə şantaj xarakterli mövqeyi ilə Rusiyaya bu təşkilatın perspektivinin olmadığını deyir: “Ermənistan parlamentinin spikeri Alen Simonyanın KTMT-nın mexanizmlərinin işləmədiyini dilə gətirməsiı əslində bu dövlətin heç bir gələcək perspektivinin olmayacağını açıq şəkildə ortaya çıxarır. Spiker Alen Simonyanın digər mexanizmlərə keçəcəyik və hazırda bunu edirik açıqlaması Rusiyanı şantaj etmək, Qərb dövlətlərindən dəstək almağa hesablanmış bir siyasi gedişdir. Əslində erməni siyasi dairələri artıq başa düşürlər ki, dünyanın yeni siyasi düzəninin formalaşdığı belə bir kritik dövrdə "küləkli havanın bayrağı" olmaq mümkün deyil. Hər bir dövlət indiki şəraitdə öz getdiyi yolu dəqiq müəyyən etməli, hədəfləri aydın olmalıdır. Biz bilirik ki, Ermənistan süni dövlət olduğu üçün belə həlledici vaxtlarda müstəqil qərar qəbul etmək imkanlarından tamamilə məhrumdur. Erməni siyasətçiləri anladılar ki, Rusiyanın Ukraynada apardığı müharibədə getdikcə nüfuzu aşağı düşür, dərhal istiqaməti Qərbə yönəltməyi düşünürlər. Bu alınacaqmı? Bunu zaman göstərəcək. Əslində erməni politoloqları belə bir versiya irəli sürürlər ki, Ermənistan Rusiya ilə həmsərhəd olmadığı üçün, bu dövlətin Rusiya üçün heç bir önəmi qalmayıb. Ona görə təcili Qərb ölkələrinin yanında yer almalıyıq ki, digər təsirlərdən xilas ola bilək. İstənilən halda, Ermənistanın siyasi rəhbərliyi mövcud reallıqları dərk edərək təcili Azərbaycanın irəli sürdüyü 5 prinsiplal sülh şərtini qeyd-şərtsiz yerinə yetirməlidir. Bu halda Ermənistan bölgədə öz mövcudluğunu qoruyub saxlaya bilər. Ermənistan siyasi rəhbərliyi bir məsələni dərindən dərk etməlidir ki, onların Azərbaycan dövlətinə vurduğu milyardlarla dollar ziyanın qarşılığında Azərbaycan yeni səhifə açaraq, sülh təklif edərək bölgədə əminamanlığın yaradılması üçün var qüvvəsi ilə çalışır. Əgər onlar bu xoş təşəbbüsü əldən verəcəklərsə, sonradan bu şans olmaya bilər. Daha dəqiq ifadə etsəm, ermənilər hansı səmtə gedirlərsə getsinlər, bu onların öz seçimidir. Əsas sülh seçimini qəbul etməlidirlər ki, bu bölgədə nəhayət sabitlik yaransın”.
Vidadi ORDAHALLI
