Ümid edirəm ki, biz sülhə yavaş-yavaş yaxınlaşırıq. Mən Şarl Mişelin bu sahədəki fəaliyyətini yüksək qiymətləndirirəm. Çünki bildiyiniz kimi, Brüsseldə bir neçə dəfə üçtərəfli görüş keçirilib və hər dəfə biz sülhə daha da yaxınlaşırıq.
Bu fikirləri Prezident İlham Əliyev oktyabrın 6-da Praqada Azərbaycan televiziya kanallarına müsahibəsində bildirib.
Bu dördtərəfli görüşün Şarl Mişel və Emmanuel Makron tərəfindən təşkil edildiyini qeyd edən Prezident deyib:
“Bu görüş zamanı da önəmli məsələlər müzakirə edilib və hesab edirəm ki, bu görüşün də sülh müqaviləsinə çatmaq üçün önəmi olacaqdır. Hələ ki, təmaslar davam edir. Biz razılaşdıq ki, şam yeməyindən sonra yenə də bir araya gələk. Hər halda, sülh prosesinə artıq təkan verildi”.
Sülh prosesinə təkan verildi deyəndə Prezident əsasən nələri nəzərdə tutur?
İctimai Siyasi Proseslər Beynəlxalq Əlaqələr Mərkəzinin (İSBAM) rəhbəri Samir Adıgözəlli “Bakı-Xəbər”ə açıqlamasında bildirdi ki, Fransanın ənənəvi ermənipərəst siyasətini nəzərə alsaq, Praqada keçirilən dördtərəfli görüşdə Azərbaycana müxtəlif təzyiqlərin göstəriləcəyini proqnozlaşdırmaq olardı: Paşinyan Fransanın da iştirak etdiyi görüşdə hər zaman özünü qətiyyətli hiss edir, Fransa tərəfi də Ermənistanı dəstəklədiyini gizlətmir. Amma Prezident Əliyevin qətiyyəti və prinsipiallığı buna imkan vermədi - 5 saatdan artıq çəkən və 2 hissədən ibarət olan görüşdə Azərbaycana qarşı hər hansı bir formada təzyiq cəhdinin qarşısı alındı.
Yekunda qəbul edilmiş bəyanatda Azərbaycan və Ermənistan bir-birinin ərazi bütövlüyü və suverenliyini tanıdılar və bu xüsusda BMT nizamnaməsi əsas sənəd kimi götürüldü. Faktiki olaraq bu o deməkdir ki, Qarabağın Azərbaycanın ayrılmaz hissəsi olduğu bir daha təsdiq edildi. Suverenliyi tanımaqla Ermənistan Qarabağ üzərində Azərbaycanın hakimiyyətini tanıyır.
Sərhədlərin delimitasiyası üzrə komissiyanın iclasının tezliklə keçirilməsi razılaşdırıldı.
Aİ və Fransa Azərbaycan ərazilərini də əhatə edəcək birgə sərhəd monitorinq missiyası yaradaraq bundan regiona daxil olmaq üçün istifadə etmək istəyirdilər. Amma öz suverenliyinə dəyər verən Azərbaycan buna etiraz etdi. Azərbaycanın qəti mövqeyindən sonra belə razılaşdırıldı ki, missiya yalnız Ermənistan ərazisində olacaq. Azərbaycan isə öz maraqlarına uyğun şəkildə missiya ilə əməkdaşlıq edəcək.
Beləliklə, Azərbaycanın maraqları Prezident İlham Əliyev tərəfindən layiqincə qorundu”.
İSBAM sədrinin sözlərinə görə, Azərbaycan öz mövqeyində daim sabitqədəmdir: “Bizim təkliflərimiz açıq təqdim olunub. Bundan əvvəlki görüşlərdə də eyni mövqeni ifadə etmişik. Ermənistan özünü əvvəl bir cür, sonra fərqli aparır. İlk baxışdan Praqa görüşünün nəticələrinə nikbin yanaşa bilərik. Cünki sülhün əldə olunması ilə bağlı önəmli mesajlar verilib. Ümid edək ki, Ermənistan bu mövqeyini sona qədər qoruyub saxlayacaq. Bəli, prosesin yerindən tərpəndiyini söyləyə bilərik. Yetər ki, sabotajlar edilməsin. Ermənistana sülh hamıdan çox lazımdır”.
Məhəmmədəli QƏRİBLİ
