“Biz Qarabağı və Zəngəzuru yenidən quracağıq. Buna heç bir şübhəmiz yoxdur. Necə bahalı olursa-olsun, bunu edəcəyik”. Bu barədə Prezident İlham Əliyev Ağdamda keçirilən Azərbaycan Milli Şəhərsalma Forumundakı çıxışında bildirib.
Ölkə başçısının fikrincə, dağıdılan yaşayış məntəqələrinin bərpası bizim milli ideyamızdır. Prezidentin çıxışından o da məlum oldu ki, Ağdamda aparılan quruculuq işləri Füzulidə, Qubadlıda, Zəngilanda da görülür: “İki ay bundan əvvəl qayıtdığımız Laçın şəhərini növbəti ilin sonuna kimi bərpa etməyi planlaşdırırıq. Çünki dediyim kimi, orada qeyri-qanuni məskunlaşma var idi. Heç də bütün binalar sökülməmişdir. Biz artıq bir qrup mütəxəssisi oraya göndərmişik. Beləliklə, biz Qarabağı və Zəngəzuru yenidən quracağıq. Buna heç bir şübhəmiz yoxdur. Necə bahalı olursa-olsun, bunu edəcəyik. Bu, bizim milli ideyamızdır. Əvvəllər bizim milli ideya torpaqlarımıza qayıtmaqdan, ədaləti və ərazi bütövlüyümüzü bərpa etməkdən ibarət idi və bütün Azərbaycan xalqı bu ideya ətrafında birləşmişdi, özünü buna hazırlamışdı. Canlarını qurban vermiş gənc nəsil, - müharibə zamanı demək olar ki, üç min nəfəri qurban verdik, - və Qələbəmizi qeyd edən minlərlə insan, bu, həqiqətən də müasir Azərbaycandır, bu, yeni Azərbaycandır. İndi artıq işğal damğasından azad olunmuş Azərbaycan yüksəlməkdədir və mən əminəm ki, Azərbaycan ən uğurlu ölkələrdən biri olacaq və söhbət təkcə bizim regiondan getmir”.
Görünən odur ki, Azərbaycan işğaldan azad olunmuş bütün yaşayış məntəqələrinin bərpasında qərarlıdır.
“Aparılan intensiv yenidənqurma işləri məskunlaşmanın gözləniləndən daha tez baş verəcəyindən xəbər verir”
Məsələyə münasibət bildirən millət vəkili Vüqar Bayramovun fikrincə, Zəngəzurun, Qarabağın bərpa olunması çox önəmli məsələdir: “Zatən bu istiqamətdə genişmiqyaslı işlər görülür. İnfrastruktur yenidən qurulur. Yollar, tunellər, elektrik stansiyaları inşa edilir. Mərhələli şəkildə dağıdılan şəhərlərin, kəndlərin bərpası planlaşdırılır. Nəzərə almaq lazımdır ki, gələn il işğaldan azad olunan torpaqlarımızın bərpası və eləcə də məskunlaşma üçün daha çox vəsaitin ayrılması nəzərdə tutulur. Bu da məcburi köçkünlərin ata-baba yurdlarına gözləniləndən daha tez qayıtmasına imkan verəcək. 2023-cü il üçün dövlət büdcə layihəsinə əsasən, gələn il Böyük Qayıdış layihəsi çərçivəsində işğaldan azad olunmuş ərazilərin yenidənqurulması və bərpası ilə bağlı xərclər 3 milyard manat nəzərdə tutulub. Qeyd edək ki, büdcədən 2021-ci ildə bərpa prosesinə 2.2 milyard, 2022-ci ildə 2 milyard 670 milyon manat nəzərdə tutulmuşdu. Bu isə o deməkdir ki, 3 il ərzində (2021-2023-cü illər) Qarabağ və Şərqi Zəngəzurunun bərpa və yenidənqurmasına yalnız dövlət büdcəsindən 7 milyard 870 milyon manat vəsait ayrılır. Bütün bunlar Qarabağın daha qısa müddətdə bərpasına olan xüsusi diqqətdir. Azərbaycan işğaldan azad olunan ərazilərimizi heç bir xarici borclanma olmadan, yalnız daxili maliyyə resursları hesabına bərpa edir. Şərqi Zəngəzur və Qarabağda aparılan intensiv yenidənqurma işləri məskunlaşmanın gözləniləndən daha tez baş verəcəyindən xəbər verir. Qayıdış əhalimizin təhlükəsizliyi qorunmaqla ağıllı şəkildə reallaşır. Zəngilanla yanaşı 2023-ci ilin ikinci yarısında artıq işğaldan azad olunan bir sıra digər rayonlarımızda da məskunlaşmaya start verilməsi gözlənilir. Qarabağ və Şərqi Zəngəzur yenidən qurulur və bərpa edilir”.
Bir sözlə, millət vəkili hesab edir ki, tezliklə Böyük Qayıdışın yeni mərhələləri başlayacaq.
Vidadi ORDAHALLI
