"Qarabağ erməniləri bizim vətəndaşlarımızdır, biz onlarla nə vaxt danışacağımızı özümüz bilərik. Hər hansı bir ölkə ilə bunu müzakirə etmək fikrində deyilik".
Bunu Prezident İlham Əliyev Praqada “Avropa siyasi birliyi” Zirvə Toplantısı çərçivəsində “Avropa qitəsində sülh və təhlükəsizlik” mövzusunda keçirilən tədbir çərçivəsində "Azadlıq" Radiosunun müxbirinin “Nikol Paşinyan deyir ki, Azərbaycan Qarabağ erməniləri ilə danışıqlar aparmalıdır” sualını cavablandırarkən deyib.
"Mənə elə gəlir, Azərbaycan Prezidentinin cavabından hər kəs öz payını alıb"
Mövzuya şərh verən AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli bildirdi ki, İlham Əliyevin net cavabından həm N.Paşinyan, həm dünya erməniləri, həm də separatçılar və onlara havadarlıq edənlər payını götürməlidir.
“Dövlət başçısının dediyi fikir konkretdir. Azərbaycanda yaşayan bütün vətəndaşlar kimi, Qarabağda yaşayan ermənilər də vaxtilə Azərbaycan vətəndaşı olublar, sonradan isə separatçılığa meyl göstəriblər. Separatçılığın cəzasını da çox ciddi şəkildə çəkdilər. İndi isə onların necə yola gəldikləri də artıq bəllidir. Bundan da yaxşı yola gələcəklər. Əvvəllər də dediyimiz kimi, bunların iki yolu var, ya separatçılığa son qoyub Azərbaycan vətəndaşları olub dövlətimizin qayda-qanunları çərçivəsində yaşamaqlarına davam etməlidirlər, ya da Azərbaycan ərazilərini tərk edib getməlidirlər. Bu baxımdan, Prezidentin də dediyi kimi, bu məsələni başqa ölkə ilə müzakirə etmirik. Qarabağda nə qədər erməni varsa və onlarla artıq müəyyən mənada danışıqlar olacaqsa, bu sadəcə Azərbaycan dövlətinin diqtəsi altında həyata keçiriləcək, onlar burada söz sahibi olmayacaqlar, ola da bilməzlər. Hər şey dövlətimizin istəyinə, qanunlarına uyğun olacaq. Burada separatçılara bircə güzəşt ola bilər, bu da ondan ibarət ola bilər ki, separatçılığa son qoyub Azərbaycan qanunları çərçivəsində yaşamağa davam etsinlər. Əslində, bununla bağlı müharibədən əvvəl də, sonra da dəfələrlə mesajlar verilib. Artıq görünən odur ki, Nikol Paşinya hər hansısa məsələyə müdaxilə etmək iqtidarında deyil. Nəinki Paşinyan, eləcə də Fransa, Rusiya, başqa dövlətlətlər artıq bu məsələdə kənarda qalıblar, qalmalıdırlar da. Qarabağdakı erməni vətəndaşlarımızla necə davranacağımız bizim daxili işimizdir. Prezident bunun bizim daxili işimiz olduğunu ifadə etdi və bununla da bir növ Ermənistana və onun havadarlarına net mesaj verdi. Bu elə bir mesajdır ki, bundan hər kəs öz payını götürməlidir, bir də bu məsələyə toxunmamalıdır”.
F.Ələkbərli qeyd etdi ki, biz bu məsələni böyük ölçüdə həll etmişik və yaxın zamanlarda məsələ tamamilə kökündən həll olunacaq. “Burada Prezidentin vermək istədiyi əsas mesaj budur ki, Qarabağdakı beş-on nəfər erməni vətəndaşlarla hər hansı bir söhbət, yaxud onları ağıllandırmaq üçün başqa bir üsuldan istifadə ediləcəksə, burda ikinci, üçüncü dövlətin müdaxiləsinin yeri yoxdur. Prezidentin açıqlamasından aydın oldu ki, nə Ermənistan, nə də başqası bizim daxili işimizə qarışa bilməz və buna cəhd də etməməlidir, heç buna haqları da yoxdur. Bu təkcə Nikol Paşinyana deyil, separatçıların bütün yaxın-uzaq havadarlarına bir mesajdır ki, siz bu işə qarışmayın, Azərbaycan dövləti nəyi nə zaman və necə edəcəyini yaxşı bilir. Mənə elə gəlir ki, Azərbaycan Prezidentinin cavabından hər kəs öz payını alıb”- deyə F. Ələkbərli qeyd etdi.
İradə SARIYEVA
