"30 ilə yaxın davam edən işğal dövründə Ermənistan Azərbaycan ərazilərini işğal altında saxlamaqla yanaşı, şəhər və kəndlərimizi talan ediblər, milli-mədəni, maddi sərvətlərimizi, dəyərlərimizi, abidələrimizi dağıdıblar. Onların törətdikləri vandalizmin sərhədləri yoxdur. İşğal dövründə ən çox dağıdılan ərazimiz isə Ağdam şəhəri idi. Bu şəhəri olduqca pis vəziyyətə salmışdılar. Hətta evlərin daşlarını bir-bir söküb daşıyıblar. Məlum olmuşdu ki, ermənilər məscidlərdə, tarixi abidələrimizdə, müqəddəs yerlərimizdə donuz və inək saxlayıblar. İşğaldan azad olunmuş ərazilərdə yerləşən ümumilikdə 67 məsciddən 65-i tamamilə dağılıb. Bu ermənilərin bir daha heç bir dəyərə malik olmadığını, hətta dini dəyərlərə belə hörmət etmədiklərini ortaya çıxardı".
Bu fikirləri açıqlamasında Azərbaycan Sosial Rifah Partiyasının sədri Əsli Kazımova deyib.
Onun sözlərinə görə, oktyabrın 5-də Ağdamda baş tutan Azərbaycan Milli şəhərsalma Forumu olduqca mühüm əhəmiyyətə malik idi. Forumun BMT-nin Məskunlaşma Proqramı (UN-HABITAT) və Dövlət Şəhərsalma və Arxitektura Komitəsinin birgə əməkdaşlığı, ADA Universitetinin təşkilati dəstəyi ilə Ağdamda “Dayanıqlı İnkişaf Məqsədləri” və “Yeni Şəhər Gündəliyi” – postmünaqişə dövründə bərpa və yenidənqurmanın aparıcı qüvvəsi kimi” mövzusunda keçirilməsi isə bütün dünyanın diqqətini erməni vandalizminə yönəltmək üçün fürsət sayıla bilər. Ermənistanın vandalizm və Azərbaycan ərazilərində qeyri-qanuni məskunlaşdırma siyasəti artıq iflasa uğrayıb. "Ermənistan dövləti müxtəlif ölkələrdən olan erməniləri işğal edilmiş ərazilərdə yerləşdirmək üçün qanunsuz məskunlaşma siyasəti yürüdürdü. Bu, beynəlxalq hüququn və Cenevrə Konvensiyasının kobud şəkildə pozulması hesab olunur. Eləcə də, bu ölkə həm müharibədən öncə, həm müharibə dövründə, həm də post-müharibə dövründə etdiyi cinayətlərə görə cavab verməlidir. Ermənilər işğal dövründə 1 milyondan çox mina basdırıblar. Bu, Böyük Qayıdışı gecikdirən amillərdəndir. Müharibə başa çatandan bəri təxminən 250 azərbaycanlı minaların partlaması nəticəsində həlak olub və ya ağır yaralanıb. Bu rəqəm hər həftə artır. Azərbaycana və azərbaycanlılara qarşı olan bu terror siyasəti davam edir. Amma Azərbaycan dövləti bütün çətinliklərin öhdəsindən layiqincə gəlib və gələcək. Prezident İlham Əliyevin də bildirdiyi kimi ən qısa zamanda həmin ərazidlərin əsl sahibləri öz yurd-yuvalarına qovuşacaqlar", -deyən Ə.Kazımova bildirib ki, işğaldan azad edilmiş ərazilərə səfər edən xarici nümayəndələr əsl həqiqətləri öz gözləri ilə görürlər. Həmin insanlar dəhşətli mənzərə ilə üz-üzə qalırlar və mənəvi sarsıntılar keçirirlər. Hətta Ağdamı “Qafqazın Xirosiması” adlandırırdılar: "Amma həmin regionların əhalisi səbrlə və böyük həsrətlə həmin torpaqlara qayıdacaqları günü gözləyirlər. Hətta işğal dövründə anadan olan vətəndaşlarımız belə həmin torpaqları görmək, orada yaşamaq, oraya qayıtmaq üçün can atırlar. Bu böyük qürurverici haldır. Prezident İlham Əliyev çıxışında da bildirdi ki, bu cəmiyyətimizdə xüsusi mühit, qürur hissi, qələbə hissi, ədalətin bərpa olunması hissi, xalqın ləyaqət hissinin bərpası hisslərini formalaşdırır ki, bunlar ölçüyəgəlməz hisslərdir. Maksimum iki ildən sonra Ağdamın Xıdırlı, Kəngərli və Sarıcalın kəndlərində bir neçə min insan yaşayacaqdır. Ağdam şəhərində min yerlik məktəb tikilir. Keçmiş məcburi köçkünlərin öz yurdlarına tezliklə qayıtması üçün bütün imkanlar səfərbər olunub. İrimiqyaslı infrastruktur layihələr icra olunur".
