“Qarabağ bölgəsində yaşayan erməni əhalisi bizim vətəndaşlarımızdır və biz indi onların öz ərazimizdə həyatını necə təşkil edəcəyimizi heç bir beynəlxalq oyunçu ilə müzakirə etməyəcəyik”. Bu barədə Prezident İlham Əliyev Ağdamda keçirilən Azərbaycan Milli Şəhərsalma Forumundakı çıxışında bildirib.
Ölkə başçısının sözlərinə görə, bizim hər hansı vasitəçiliyə ehtiyacımız yoxdur: “Biz müharibədən sonra Ermənistana sülh təklif etdik. Sülh müqaviləsi üçün əsas olan beynəlxalq hüququn beş əsas prinsipini, - xüsusən də ölkələrin ərazi bütövlüyünün qarşılıqlı tanınması, gələcəkdə ərazi iddialarından çəkinmək, güc tətbiq etməmək və ya güc tətbiq etmək hədəsindən çəkinmək, dövlət sərhədlərinin müəyyən edilməsi və kommunikasiyaların açılması, - irəli sürdük. Bütün bunlar, əslində, beynəlxalq hüququn əsas prinsipləridir və hesab edirəm ki, münasibətlərini normallaşdırmağa çalışan ölkələr arasında sülh sazişləri və ya hər hansı sazişlər buna əsaslanmalıdır. Hələ də Azərbaycanın Qarabağ bölgəsində yaşayan erməni əhalisinə gəlincə, onlar bizim vətəndaşlarımızdır və biz indi onların öz ərazimizdə həyatını necə təşkil edəcəyimizi heç bir beynəlxalq oyunçu ilə müzakirə etməyəcəyik. Qarabağ Azərbaycandır! İkinci Qarabağ müharibəsi bunu meydanda sübut etdi. İşğal dövründə dünyanın heç bir ölkəsi, o cümlədən Ermənistan bu qondarma qurumu tanımadı. Ona görə də daxili işlərimizlə bağlı məsələləri heç vaxt beynəlxalq qurumlarla və ya böyüklüyündən və potensialından asılı olmayaraq, heç bir ölkə ilə müzakirə etmirik”.
Prezident Xankəndidəki ermənilərlə bağlı bu mövqeyi dəfələrlə dilə gətirib, indi yenidən bunu xatırlatması o deməkdir ki, sözügedən məsələdə Azərbaycan əvvəlki mövqeyindədir və heç bir güzəştə getməyəcək.
Məsələyə münasibət bildirən Aydınlar Partiyasının sədri Qulamhüseyn Əlibəyli hesab edir ki, prezidentin bu məsələdə qəti mövqeyi Ermənistana və onları himayə edən dairələrə xəbərdarlıqdır: “Yəni Ermənistan və bu dövləti himayə edənlər Qarabağ ermənilərinə hansısa statusun verilməsi ilə bağlı illüziyalara qapılmasınlar. O baxımdan cənab prezidentin mövqeyi tamamilə düzgündür. Məsələ ondadır ki, Qarabağ erməniləri Azərbaycan vətəndaşıdır. Düzdür, sonradan Livandan, Suriyadan Qarabağa qanunsuz olaraq ermənilər köçürülüb, amma onların hər hansı vətəndaşlığından söhbət gedə bilməz. Qarabağda sayı həddən artıq az olan erməniyə hansısa xüsusi statusun verilməsi qanuna ziddir. Bunun nə siyasi, nə də hüquqi əsası var. Ona görə də Azərbaycan Qarabağ ermənilərinin yaşayışı ilə bağlı hər hansı bir məsələni xarici ölkələrlə müzakirə etməyəcək. Prezident bununla onu ifadə etdi ki, sözügedən məsələdə Azərbaycanın mövqeyi dəyişməzdir. Məsələnin kökündə o dayanır ki, bəzi böyük dövlətlər ermənilərdən Azərbaycana qarşı siyasi təzyiq vasitəsi kimi istifadə etmək istəyirlər. Ermənilər vasitəsi ilə regiona daxil olmaq istəyirlər. Hesab edirəm ki, buna ehtiyac yoxdur. Regiona daxil olmaq istəyirlərsə, ermənilərdən alət kimi istifadə etmək lazım deyil. Bunun üçün Azərbaycanla əməkdaşlıq etmək lazımdır”.
Bu baxımdan partiya sədri hesab edir ki, böyük dövlətlərin Ermənistandan alət kimi istifadə etməsi nəyəsə yaramayacaq.
Vidadi ORDAHALLI
