“Bu proses artıq gedir. Ancaq yenə də deyirəm, bunun nə qədər uğurlu olacağını demək çətindir”. Bu barədə Prezident İlham Əliyev Ağdamda keçirilən Azərbaycan Milli Şəhərsalma Forumundakı çıxışında bildirib.
Prezidentin açıqlamasından belə məlum oldu ki, delimitasiya işlərinin nə qədər uğurlu olacağını indidən demək çətindir: “Ümid edirik ki, sərhədlərin delimitasiyası üzrə iki müvafiq komissiya - Azərbaycan və Ermənistan komissiyaları da vaxt itirməyəcək və iki ölkə arasında faktiki mövcud olmayan sərhədin müəyyənləşdirilməsi üzərində fəal işləyəcəklər. Demək olar ki, 30 ilə yaxın davam edən işğal illəri ərzində bu sərhəd tamamilə Ermənistanın nəzarəti altında olub. İşğal bitdikdən sonra biz sərhəd hesab etdiyimiz bu sərhədə gəldik və burada qərarlaşdıq. Ona görə də 400 kilometrdən çox olan bu sərhədi müəyyənləşdirmək üçün tarixi sənədlərə, tarixi xəritələrə, beynəlxalq təcrübə və metodologiyaya əsaslanaraq fəal şəkildə işləməliyik. Beləliklə, bu proses artıq gedir. Ancaq yenə də deyirəm, bunun nə qədər uğurlu olacağını demək çətindir”.
Bütün bunlar onu göstərir ki, delimitasiya məsələsində Ermənistana etibar etmək olmaz. Bu proses uzun vaxt tələb etdiyi üçün Ermənistanın bundan sui-istifadə edəcəyi istisna olunmur.
“Sərhəddə həlli mürəkkəb olan məsələlər də var, amma bu, danışıqlar çərçivəsində həll olunmalıdır”
Məsələyə münasibət bildirən hərbi ekspert Azad İsazadə hesab edir ki, prinsipcə, delimitasiya prosesi o qədər də çətin deyil: “Delimitasiya-demarkasiya problemi o qədər də çətin deyil, amma uzun vaxt tələb edir. Lakin hər iki tərəfin istəyi olarsa, prosesi müəyyən qədər sürətləndirmək olar. Tərəflərin istəyi varsa, problemi həll etmək mümkündür. Ancaq bu gün o istəyi Ermənistan nümayiş etdirmir. Çünki delimitasiya prosesi tam başlamayıb. Ermənistanın istəyi olsaydı, indi bir sıra işlər bu qədər yubanmazdı. Sərhəddə həlli mürəkkəb olan məsələlər də var, amma bu, danışıqlar çərçivəsində həll olunmalıdır. Problem ondadır ki, Ermənistan o prosesi başlatmır. Ona görə də proses süni şəkildə uzanır, orada real problem yoxdur. Bunun da səbəbkarı Ermənistandır. Bizim indiyənə qədər Gürcüstanla sərhəddə həll olunmayan yerlər var, amma iki ölkə müharibə aparmır. Müzakirələr davam etdirilir. Tərəflər çalışır ki, ortaq məxrəc tapılsın və vahid bir mövqe ortaya qoyulsun. Ona görə də Ermənistanın delimitasiya prosesində özünü nə dərəcədə səmimi aparmasından çox şey asılı olacaq. Konstruktiv mövqe sərgiləsələr, proses sürətlənə bilər. Əks təqdirdə proses uzanacaq”.
Vidadi ORDAHALLI
