Ermənistanın xarici işlər naziri Ararat Mirzoyan parlamentdə deputat Lilit Kirakosyanın Azərbaycan tərəfinin beş təklifi ilə bağlı verdiyi suala cavabında deyib ki, belə bir sənəd həqiqətən də İrəvana verilib.
O bildirib ki, martda Azərbaycanın təqdim etdiyi beş məlum prinsip dərc olunub və bundan həm Ermənistan, həm də dünya ictimaiyyəti məlumatlıdır. Nazir bəyan edib ki, bu prinsiplərdə erməni tərəfi üçün qəbuledilməz heç nə yoxdur.
Ermənistanın Baş naziri isə deyib ki, sülh yaratmaq niyyətindədir. Ermənistan lideri müxalifətin suallarına cavab verərkən deyib ki, Ermənistan üçün Qarabağı Azərbaycandan ayırmaq mümkün olmayacaq:
"Mən təsdiq edirəm ki, biz sülh gündəliyini qəbul etmişik. Və təsdiq edirəm ki, son müsahibəmdə elan edilmiş düstura uyğun olaraq sülh gündəliyinin həyata keçirilməsi üçün məsuliyyəti öz üzərimə götürürəm. Bu gündəliyin həyata keçirilməsi üçün parlament çoxluğunun və xalqın dəstəyinə ümid edirəm. Mən bu yolla gedirəm və gedəcəyəm. Son zamanlar gedən danışıqlar və onların məzmununa əsasən mən irəliyə doğru yolu görürəm. Bu, ən vacibidir".
Bundan əvvəl Azərbaycan Prezidenti də Ermənistanla sülh danışıqları barədə nikbin olduğu deyib. İlham Əliyev buna əsas kimi bir neçə gün əvvəl sülh müqaviləsinin ilkin versiyasını hazırlamaq məqsədilə Azərbaycan və Ermənistan xarici işlər nazirlərinin Cenevrədə təkbətək görüşünün keçirilməsini göstərib:
"Ümid edirik, sülh sazişinin mətninin hazırlanması uzun çəkməyəcək. Biz bu ədavətə, qarşılıqlı nifrətə son qoymaq və yeni sülh səhifəsi açmaq istəyirik. Bu məsələdə nə qədər uğurlu olub-olmayacağımızı bilmirəm. Amma biz bu istiqamətdə irəliləyirik".
Belə irəliləyişin fonunda Ermənistan niyə konkret addımlar atmaqdan çəkinir?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, Ermənistanla Azərbaycan arasında sülh müqaviləsinin imzalanması istiqamətində xeyli irəliləyiş hiss olunmaqdadır: “ Bu da, əlbəttə, Azərbaycanın bu məsələyə çox ciddi yanaşması, qətiyyətli siyasi iradə ortaya qoymasından irəli gəlir. Məlumdur ki, bir neçə gün bundan əvvəl Ermənistan və Azərbaycan xarici işlər nazirlərinin görüşündə də müsbət qarşılana biləcək müəyyən detallar əldə olunub. Bu isə o deməkdir ki, sülh müqaviləsinin imzalanması üçün həm yaxşı şərait yaranıb, həm də bu məsələlərdə müəyyən gözləntilər var və bu özünü günü-gündən doğrultmaqdadır. Ermənistanın Azərbaycanın irəli sürdüyü 5 maddəlik təklifləri qəbul etmək üçün hazır olduğunu bəyan etməsi onu göstərir ki, sülh müqaviləsi noyabr ayında imzalana bilər. Lakin bu müqavilənin imzalanmasının qarşını almaq, bu məsələlərə mane olmaq üçün bir çox xarici təsirlər var. Amma mən hesab edirəm ki, bu müqavilə imzalanacaq. Bildiyiniz kimi, dünən müzəffər Ali Baş Komandanımız İlham Əliyev Ağdamda keçirilən tədbirdə çıxışı zamani bildirdi ki, bu sülh müqaviləsinin imzalanması üçün böyük ümidlər var və noyabr ayında həmin sənəd imzalana bilər. Bu həm də dünyaya bir mesaj idi. Kimin bu məsələyə mane olmasından asılı olmayaraq, Azərbaycan qətiyyətli siyasi iradəsini ortaya qoyub. Həm siyasi, həm hərbi müstəvidə Azərbaycan güclüdür, qüdrətlidir. Ermənistanın da bu müqaviləni imzalamaqdan başqa çıxış yolu yoxdur. Ermənistan siyasi rəhbərliyi də anlayır ki, bu müqavilə imzalanmasa ölkələrini daha böyük uçurama, faciəyə aparacaqlar. Düzdür, son günlər sərhəddə də Ermənistan tərəfdən müəyyən təxribatlar törədilir. Amma bunlar hamısı əbəsdir. Ermənistan hər dəfə Azərbaycanın dəmir yumruğunu hiss edib, bundan sonra da hiss edəcək”.
Məhəmmədəli QƏRİBLİ
