Fransa dövlətinin birmənalı olaraq yürütdüyü ermənipərəst və Ermənistanyönümlü siyasət olduqca ziyanlıdır. Bundan əlavə, bu ölkənin ayrı-ayrı yüksək vəzifəli şəxsləri, senatorları da erməniləri müdafiə etməkdən və qərəzli olaraq Azərbaycanı ittiham etməkdən əl çəkmirlər. Çox təəssüf ki, onlar proseslərə obyektiv yanaşmaq istəmirlər ki, Ermənistanın düşdüyü bəlaya dəqiq qiymət verə bilsinlər.
Azərbaycana qarşı əsassız ittihamlar, şər-böhtanlar yağdıranlar sırasına fransız senator Pyer Lui də qoşulub. “Ermənistan suveren ölkə kimi yox olmaq təhlükəsi qarşısındadır”. Bunu P.Lui öz tvitter bloqunda yazıb. O, Ermənistanın indiki durumu ilə bağlı həyasızcasına Azərbaycana böhtan atıb. “Azərbaycan, demək olar ki, ümumbəşəri biganəlik qarşısında hücumları artırır. Bu “vəhşiliklər” qarşısında Avropa sülh danışıqlarını davam etdirməlidir. Erməni xalqına tam dəstəyəm”, – deyə fransız senator yazıb.
Azərbaycana şər atan fransız senatoru həqiqəti görmək istəmir və bu problemin baiskarı kimi, Azərbaycanı yox, Ermənistanı görməli olduğunu unudur. Senator obyektivlik göstərib demir ki, Ermənistanı məhvə aparan onun yürütdüyü işğalçılıq, revanşizm, faşizm siyasətidir, burada Azərbaycanın heç bir günahı yoxdur. Bunların əvəzinə yalan danışıb Azərbaycanı şərləyir.
“Bu gün həmin təcavüzkar ölkə layiq olduğu cavabı aldıqdan sonra ermənilər qədər onlar da donlarını başlarına çəkib hay-haray salırlar”
Siyasi ekspert Rövşən Rəsulov “Bakı-Xəbər”ə şərhində bildirdi ki, bütövlükdə Fransa siyasətində yer alan bir çox siyasətçilərin bu kimi fikirlərinə təəccüb etməyə dəyməz. “Çünki Fransa Ermənistanın “böyük bacısıdır” və daim onun yürütdüyü işğalçılıq, təcavüzkarlıq siyasətinə, həmçinin sərsəm iddialarına xüsusi dəstək göstərən ölkələrdən biridir. Ümumiyyətlə, Fransada erməni aşiqliyi, ermənilərə bağlılıq prinsipləri daim mövcud olubdur. Yəni bu yeni hal deyil. Əsrlərdir ki, bu münasibət özünü sübut edib. Bu baxımdan, fransız senatoru Pyer Luinin Ermənistanın suveren ölkə kimi yox olmaq təhlkəsi ilə üzləşdiyini deməsi və üstəlik, bunu da Azərbaycanın üzərinə yıxması, Azərbaycanı “vəhşi” adlandırması əslində onun özünün şüuraltı vəhşi təfəkkürünün sübutudur. Fransanın 30 il ərzində ATƏT-in Minsk qrupunun həmsədri kimi heç bir iş görməməsi, faktiki olaraq Ermənistanın mövqeyini müdafiə etməsi, işğalçılıq və təcavüzkarlıq siyasətinə dəstək göstərməsi fonunda Fransada hər hansısa bir senatorun, siyasətçinin dövlətin mövqeyinə əks mövqe göstərdiyini görmüşükmü? Xeyr, görməmişik. Bunun özü də göstərir ki, Fransa açıq-aşkar Ermənistanın təcavüzünə dəstək göstərib. Bu gün həmin təcavüzkar ölkə layiq olduğu cavabı aldıqdan sonra ermənilər qədər onlar da donlarını başlarına çəkib hay-haray salırlar”.
R.Rəsulovun sözlərinə görə, ümumiyyətlə, Fransa siyasətinin formalaşmış stereotiplərindən biri də hay-həşir salmaqdır. O hesab edir ki, biz bu gün Ermənistan siyasətçiləri ilə fransalı siyasətçiləri, senatorları müqayisə etsək onların səviyyəsində, arasında heç bir fərq olmadığını görə bilərik. “Pyer Lui kimi şərəfsiz senatorlar bir dəfə də olsun dillərinə Xocalı soyqırımını, yaxud ermənilərin ərazilərimizdə törətdiyi qətliamları, vəhşilikləri gətirməyiblər. Bundan sonra da bu barədə danışacaqlarını ehtimal etmək mümkün deyil. Avropanın göbəyində yerləşən və özünü “demokratik” ölkə sayan Fransa nəyə görə öz daxilində baş qaldıran separatçılara qarşı zor tətbiq etdi? Biz bilirik ki, Fransanın daxilində də bir sıra separata meylli ərazilər mövcuddur. O ərazilərin Fransadan ayrılaraq müstəqil olmalarını tələb edirlər. Nəyə görə Fransa separatçıları yerindəcə, yuvalarındaca boğur, əllərində olan bütün təzyiq, təsir vasitələrindən onlara qarşı istifadə edir? Hətta vəhşi üsullara əl atırlar. Lakin söhbət Ermənistana, bu təcavüzkar ölkənin Azərbaycanın torpaqlarına göz dikməsinə gələndə Fransa ağzına su alıb susur. Bəs buna nə ad vermək olar? Təbii ki, bu da siyasətin tərkibində olan şərəfsizlik, qərəzlilik, vicdansızlıq və qeyri-insani münasibətin təzahürüdür. Bu baxımdan, fransız senatorunun bu cür qeyri-obyektiv, qərəzli fikirlərinə ciddi yanaşmaq olmaz, amma onları cavabsız da qoymaq lazım deyil. Luinin Ermənistana yazığı gəlirsə onu revanşist davranışlardan əl çəkməyə, Azərbaycanla sülh müqaviləsi bağlamağa çağırmalıdır ki, sənin dövlət kimi xilas yolun bu sülh müqaviləsidir. Əgər o həqiqətən də Ermənistana havadarlıq edirsə bu ölkənin rəhbərliyini Azərbaycanla sülh sazişi imzalamağa vadar etməli, tələb etməlidir ki, Ermənistan hakimiyyəti Azərbaycanla sülh razılaşmasını əldə etsin və nəhayət Cənubi Qafqazda sülh erasına qədəm qoyulsun. Təəssüf ki, onlar bunu etmirlər. Bu baxımdan, onların boğazlarını yırtmaları, üz-gözlərini cırmaları heç bir nəticə verməyəcək, qışqır-bağırları özlərinə qalacaq. Ermənistan da hər halda Pier Lui kimi senatorların onu dəstəkləməsindən ruhlanmalı, bu kimi şeyləri özünün növbəti xilas mənbəyi kimi görməli deyil. Belə məsələlər Ermənistanı daha pis vəziyyətə salır”- deyə R.Rəsulov vurğuladı.
İradə SARIYEVA
