Uzun illərdir işğal altında olan Azərbaycan ərazilərindəki məscidlər, dini, tarixi, mədəni abidələr erməni vandalları tərəfindən dağıdılıb. Təbii ki, bu onların dini, mədəni və tarixi dəyərlərə olan nifrətindən irəli gəlir. Fakt kimi işğal dövründə torpaqlarımızdakı məscidlərdən ermənilərin tövlə kimi istifadə etməsini də deyə bilərik. Ermənistan dini abidələrə, məscidlərə sayğı ilə yanaşmış olsaydı, işğal etdiyi Azərbaycan ərazilərindəki abidələri dağıtmazdı.
"Bizim işğaldan azad etdiyimiz torpaqlarda mövcud olan 67 məsciddən 65-i tamamilə dağıdılıb". Bu barədə Prezident İlham Əliyev Ağdamda keçirilən Azərbaycan Milli Şəhərsalma Forumunda çıxışı zamanı bildirib. Dövlət başçısı qeyd edib ki, dağıdılan məscidlərdən ikisi Ağdamdadır. Şuşadakı bir məscid isə qismən dağıntılara məruz qalıb.
Heç şübhəsiz, Azərbaycan bütün bu dini abidələri, məscidləri qısa zamanda təmir və bərpa edəcək. Artıq Şuşadakı Gövhərağa məscidində təmir və bərpa işləri yekunlaşıb.
Maraqlıdır, müsəlman dövlətləri Qarabağda dağıdılan məscidlərin tam ideal vəziyyətdə bərpasına niyə dəstək verməyib?
“İşğaldan azad olunan ərazilərdə dağıdılan məscidlərin bərpa prosesində qardaş ölkə Türkiyə, Pakistan və digər müsəlman dövlətləri iştirak edəcək”
Azərbaycan Milli Elmlər Akademiyası (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərli “Bakı-Xəbər”ə açıqlamasında bildirdi ki, işğaldan azad etdiyimiz torpaqlarda mövcud olan məscidlərin 98 faizi dağılıb, istifadəyə yararsız vəziyyətdədir: “Təbii ki, Azərbaycan dövləti zamanla həmin məscidləri bərpa edəcək. Həmin məscidlərin bərpasında müsəlman dövlətlərinin iştirakı da arzuolunandır. Ümid edirəm ki, Türkiyə, Pakistan və digər müsəlman dövlətləri məscidlərin bərpası işində yaxından iştirak edəcək. Ancaq adı müsəlman ölkəsi olan elə dövlətlər var ki, onların bu prosesdə iştirakı gözlənilmir. Elə müsəlman dövlətləri də var ki, onların bu işdə iştirakı lazım deyil. Xatırladım ki, Azərbaycan torpaqları işğal altında olan zaman həmin məscidlərin dağıdılması ilə bağlı dünyaya çağırışlar etsələr də, adda müsəlman dövləti olanlar islam adına uyğun hərəkət etmədilər. Birinci Qarabağ müharibəsi dövründə 44 günlük Vətən savaşı zamanı adda islam ölkələri olan dövlətlər Ermənistana həyan çıxdı. Həmin dövlətlər Ermənistana yardım etdi. Bu səbəbdən də həmin ölkələrin işğaldan azad edilmiş ərazilərdə dağıdılan məscidlərin bərpasında iştirakı gözlənilmir”.
Həmsöhbətimiz hesab edir ki, işğaldan azad olunan ərazilərdə dağıdılan məscidlərin bərpa prosesində qardaş ölkə Türkiyə, Pakistan və digər müsəlman dövlətləri iştirak edəcək. Azərbaycanın yanında səmimi şəkildə olan dövlətlər bərpa prosesində də olacaqlar.
Günel CƏLİLOVA
