Ermənilərin Birinci Qarabağ müharibəsində Xocavəndin Edilli kəndində azərbaycanlıları kütləvi basdırdıqları daha bir məzarlıq tapılıb. Baş Prokurorluğun yaydığı məlumata görə, həmin şəxslərin geyimlərdən hərbçi olduğu müəyyən edilib. Cəsəd qalıqlarından aydın şəkildə görünüb ki, onların ölməzdən əvvəl əlləri və ayaqları kəndirlə bağlanıb. Qeyd edək ki, məzarlıqda 12 nəfərin qalıqları üzə çıxıb.
Edilli kəndində aşkar olunan kütləvi məzarlıq dünya mediasında müzakirə olunur.
Türkiyə mətbuatı ermənilərin bu amansızlığını bəşəri cinayət kimi dəyərləndirib.
Türkiyə mediası yazır ki, cəsədlərin üstündəki geyimlər və əşyalar onların Azərbaycan hərbçiləri olduğunu təsdiqləyir. Diqqətə çatdırılır ki, meyitlərin əksəriyyətinin baş sümüklərində güllə deşikləri aşkarlanıb. Bu fakt əsir azərbaycanlı hərbçilərin erməni cəlladlar tərəfindən yaxın məsafədən vurulduqlarını təsdiqləyir.
Fransa mətbuatı Edillidə aşkarlanmış kütləvi məzarlıqdan yazıb. Azərbaycanın Xocavənd rayonunun Edilli kəndində aşkarlanmış 2-ci kütləvi məzarlıqla bağlı “20 Minutes”, “Le Preogres” portallarında da məqalələr dərc olunub. Məqalələrdə Edilli kəndində işgəncə verilmiş 25 cəsəd olan kütləvi məzarlıqdan, Birinci Qarabağ müharibəsində itkin düşmüş 4000 azərbaycanlı haqqında hələ də məlumat olmamasından, Ermənistanın kütləvi məzarlıqların yerini açıqlamaqdan imtina etməsindən yazılıb.
Qeyd edək ki, Edilli kəndində aşkar olunan kütləvi məzarlıq dünya mediasının gündəmindədir.
“Xocavənd rayonunun Edilli kəndində aşkarlanmış kütləvi məzarlığa dünya mediasının diqqət ayırmaması mümkün deyil”
Siyasi şərhçi Azər Həsrət bildirdi ki, Xocavənd rayonunun Edilli kəndində aşkarlanmış kütləvi məzarlığa dünya mediasının diqqət ayırmaması mümkün deyil. Çünki hər şey göz önündədir: “Ermənilər kimi biz havadan danışmırıq və uydurma videolar yaymırıq. Uzun müddət Ermənistanın işğalı altında olan torpaqda aparılan axtarışlar, araşdırmalar nəticəsində bu cür məzarlıqlar aşkar olunub. Təbii ki, bunların saxta olması ilə bağlı kimsə nəsə iddia irəli sürə bilməz. O cümlədən, dünyanın ədalətli, prinsipial insanları fakt qarşısında başqa davranış sərgiləyə bilməzdi. Bu baxımdan da Azərbaycanın aşkar etdiyi fakt ermənilərin azərbaycanlılara qarşı törətdiyi çoxsaylı bənzər dəhşətlərdən birinin sübutudur. Bu hadisəyə dünya mediası xüsusi diqqət ayırmalı idi”.
Həmsöhbətimiz hesab edir ki, Azərbaycan tərəfi məlum faktları beynəlxalq ictimaiyyətə təqdim etməlidir. Bu işdə emosiya ilə deyil, ağıl, məntiqlə davranmaq lazımdır: “Ermənilərin yaydığı saxta informasiyaların qarşısını almaq lazımdır. Danılmaz faktdır ki, ermənilər əsassız informasiyalar istehsal edib, dünyaya təqdim edir. Biz əlimizdə olan faktlarla ermənilərin törətdiyi vəhşiliyi rahat şəkildə sübuta yetirə bilərik”.
Günel CƏLİLOVA
