Azərbaycan dövlət müstəqilliyini bərpa etdikdən sonra dünya birliyinə, beynəlxalq aləmə inteqrasiya yolunu tutub. Heç şübhəsiz, Azərbaycanın dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi istiqamətində böyük addımlar atılır.
Azərbaycan bir sıra beynəlxalq təşkilatların, o cümlədən Birləşmiş Millətlər Təşkilatının, Avropada Təhlükəsizlik və Əməkdaşlıq Təşkilatının, Avropa Şurasının, İslam Əməkdaşlıq Təşkilatının, Müstəqil Dövlətlər Birliyinin və digər bu kimi nüfuzlu təşkilatların üzvüdür. Ölkəmiz həm də GUAM regional qrupunun təsisçilərindən biridir. Azərbaycan dövləti Qoşulmama Hərakatına sədrlik edir.
Məlumdur ki, Azərbaycan üzv olduğu beynəlxalq təşkilatlar qarşısında öz öhtəliyini tam olaraq yerinə yetirir. Amma beynəlxalq qurumların əksəriyyəti Azərbaycanın mövqeyini müdafiə etməkdə çox axsayırlar, demək olar ki, Azərbaycanın haqq işini müdafiə etmirlər.
“Beynəlxalq təşkilatlar Azərbaycanın nümunəvi əməkdaşlıq davranışlarını yüksək qiymətləndirməlidir”
Mövzuya şərh verən İSBAM sədri Samir Adıgözəlli “Bakı-Xəbər”ə bildirdi ki, Azərbaycan beynəlxalq təşkilatlarla əməkdaşlıq sahəsində çox aktivdir və ölkəmizin beynəlxalq təşkilatlarda daim aktiv fəaliyyət göstərməsi ilə fərqlənməsi diqqəti cəlb edir. S.Adıgözəlli qeyd etdi ki, burada əsas pioritet dövlətçilik və milli maraqlarımızın təmin olunmasıdır və Azərbaycan dövləti də buna yönəlmiş siyasət həyata keçirir. S.Adıgözəlli qeyd etdi ki, bu gün Azərbaycan dünyanın iqtisadi cəhətdən ən dinamik inkişaf edən ölkələrindən biridir və ölkəmiz istər regionda, istərsə də beynəlxalq müstəvidə öz yeri, rolu və xüsusi çəkisi olan dövlətdir. Respublikamızın beynəlxalq təşkilatlarda nüfuzunun yüksək olmasının nəticəsidir ki, Azərbaycan 2019-cu ildən etibarən Qoşulmama Hərəkatına sədrlik edir, bir sıra qlobal əhəmiyyətli tədbirlərin keçirildiyi məkana çevrilmişdir və bunu, əlbəttə ki, ölkəmizin çox mühüm diplomatik uğuru kimi qiymətləndirmək olar deyən ekspert vurğuladı ki, Azərbaycan beynəlxalq müstəvidə əməkdaşlığa böyük töhfələr verir. “Azərbaycan dövlət müstəqilliyini qazandıqdan ta bu günə kimi, Azərbayacanın xarici siyasətini, görülən işləri, əməkdaşlıqları film kimi nəzərdən keçirsək baxarıq ki, dövlətimiz hələ ümummilli lider Heydər Əliyevin rəhbərliyi dövründən BMT, Avropa İttifaqı, NATO və digər beynəlxalq təşkilatlarla, qurumlarla əməkdaşlıq əlaqələri qurub. Azərbaycan dövlətinin həm beynəlxalq təşkilatlarla, həm də region dövlətləri ilə çox yüksək səviyyəli qarışılıqlı münasibətlər qurub. Ölkəmiz istər daimi, istərsə də, müşahidəçi statusunda daxil olduğu beyəlxalq təşkilatlara hər zaman töhfələr verib, beynəlxalq konvensiyaların tələblərinə əməl edib, dünyaya inteqrasiyanı sağlam şəkildə həyata keçirib. Azərbaycan beynəlxalq aləmə inteqrasiyanı həyata keçirir və islahatları da bu istiqamətdə qurur.
Azərbaycan uzun illər işğaldan əziyyət çəkən, torpaqları 30 il Ermənistanın işğalına olan ölkə olub və bu illər ərzində beynəlxalq təşkilatlardan elə də ciddi dəstək görməyib. Torpaqlarımız iki ilə yaxındır ki, işğaldan azad olunub, amma yenə də erməni terroru, təxribatı bizdən əl çəkmir, azad ərazilərdə hər addımda mina terroru ilə üzləşirik. Eyni zamanda da Vətən müharibəsi ərəfəsində və dövründə Ermənistanın mülki əhalimizə qarşı həyata keçirdiyi aqressiya ilə üzləşmişik. Bu illər ərzində çox bəlalardan adlamışıq. İndi gəlin üzv olduğumuz beynəlxalq təşkilatların Azərbaycana münasibətini, yanaşmasını təhlil edək. Bir dövlətin vətəndaşlarının hüquqlarının, suveren sərhəddlərinin pozulması baxımından beynəlxalq təşkilatların adekvat münasibətini görməmişik. BMT-nin qəbul etdiyi qətnamələr də quru kağız parçası olaraq qaldı, heç bir təsirə malik olmadı. ATƏT-in Minsk qrupu da bu 30 ildə öz vəzifəsini icra etmək əvəzinə turist fəaliyyətilə məşğul olublar. Bu xalq, bu dövlət özü özünü ayaq üstə tutaraq, özünə inamla və öz gücü ilə torpaqlarını işğaldan azad edib. Beynəlxalq təşkilatlar Azərbaycanın nümunəvi əməkdaşlıq davranışlarını yüksək qiymətləndirməlidir”.
“Beynəlxalq təşkilatların Azərbaycanın ədalətli mövqeyinə lazımı reaksiya verməməsi onu göstərir ki...”
S.Adıgözəlli qeyd etdi ki, bu gün də haqqımız olan sərhədlərimizin bərkidilməsi, sülhün əldə olması üçün Azərbaycan dövləti inamlı bir siyasət yürüdür. S.Adıgözəllinin sözlərinə görə, amma təəssüflər olsun ki, bütün məsələlərdə Azərbaycanın bu inamlı siyasətinə, real münasibətinə qarşı beynəlxalq təşkilatların zəifdən də aşağı münasibətini görürük. Ermənistanın Azərbaycan ərazilərinə qarşı təxrubatlarının ard-arasının kəsilmədiyini deyən S.Adıgözəlli qeyd etdi ki, onlar bizi Rusiyanın verdiyi silahla vurur, amma Qərb təşkilatları, Fransa, ABŞ dövlətləri buna əhəmiyyət vermir. “Beynəlxalq təşkilatların Azərbaycanın ədalətli mövqeyinə lazımı reaksiya verməməsi onu göstərir ki, onlar hələ də xristian təəssübkeşliyindən əl çəkə bilmirlər. Onlar yenə də ermənilərin tərəfini tutub xristian təəssübkeşliyindən çıxış edirlər. Guya Azərbaycanda insan haqqları sahəsində problem olduğunu deyirlər, amma 1 milyondan artıq qaçqın-köçkünümüzün taleyi onları heç maraqlandırmayıb. İnsan haqqlarını müdafiə etdiklərini əllərində bayraq edən beyəlxalq qurumlar niyə Ermənistana qarşı hər hansı bir qətnamə qəbul etmir? Ermənistanda ümumiyyətlə, insan haqqları deyilən bir şey yoxdur. “Human rights” yalnız bir iki öz maraqlarına xidmət edənlərin rəyinə görə bəyanat verir, amma illərlə çadır şəhərciklərində yaşayan qaçqınlarımızın vəziyyəti, pozulmuş hüquqlarının bərpası barədə bir kəlmə də danışmayıb, eləcə də digət beynəlxalq təşkilatlar”.
S.Adıgözəlli qeyd etdi ki, bütün bunlar da beynəlxalq qurumların simasını, yönünü, məqsədini ifadə edir.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
