“İşğal dövründə Səudiyyə Ərəbistanı az sayda olan ölkələrdən biri idi ki, bizim haqlı işimizə davamlı dəstək verirdi”. Bunu Prezident İlham Əliyev Səudiyyə Ərəbistanı Krallığının xarici işlər naziri Feysal bin Fərhan Al Səudu qəbul edərkən deyib.
Ölkə başçısı qeyd edib ki, Azərbaycan hər zaman Səudiyyə hökumətinin və xalqının dəstəyini hiss edib: “Biz ölkələrimiz arasında mövcud olan bu səmimi münasibətlərə böyük dəyər veririk. Biz hər zaman hökumətinizin və xalqınızın dəstəyini hiss etmişik. İşğal dövründə Səudiyyə Ərəbistanı az sayda olan ölkələrdən biri idi ki, bizim haqlı işimizə davamlı dəstək verirdi. Bunun bariz nümunəsi işğal dövründə Səudiyyə Ərəbistanının Ermənistanla diplomatik münasibətlər qurmaması idi. Bu addımı isə dünyada yalnız üç ölkə atıb və biz buna görə həqiqətən də minnətdarıq. İndi isə torpaqlarımızı işğaldan azad etdikdən sonra biz irimiqyaslı yenidənqurma proqramı həyata keçiririk və qardaş ölkələrin şirkətlərini tərəfdaşımız olaraq görmək istəyirik. Eyni zamanda, ilin əvvəli də çox yaddaqalan olub - ölkənizdən olan şirkət tərəfindən maliyyələşdirilən böyük elektrik enerjisi stansiyası layihəsinə start verilib. Həmin layihə ilin əvvəli üçün yaxşı start idi və layihə uğurla gedir. Beynəlxalq təşkilatlar çərçivəsində əməkdaşlıq münasibətlərimizin daha bir vacib hissəsidir. Biz BMT və İslam Əməkdaşlıq Təşkilatı çərçivəsində göstərilən dəstəyə görə minnətdarıq. Biz bu təsisatlarda uğurla əməkdaşlıq edirik”.
Əslində Səudiyyənin bu siyasəti bəzi ərəb ölkələrinə nümunə sayılmalıdır. Çünki bir sıra ərəb ölkələri həm Vətən müharibəsindən əvvəl, həm də ondan sonra məscidlərin qənimi olan Ermənistanla sıx əməkdaşlıq edirlər. Bütün bu baş verənləri görməzdən gəlirlər.
“Təəssüf ki, bir sıra ərəb ölkələri nəinki səslərini çıxarmırdılar, əksinə, müsəlman mənəviyyatına təhqirlə...”
Məsələyə münasibət bildirən “SƏS” Media Qrupunun rəhbəri, politoloq Bəhruz Quliyevin fikrincə, Səudiyyə Ərəbistanı Krallığı Azərbaycan öz müstəqilliyini bərpa etdiyi gündən etibarən ölkəmizin yanında olub: “Və bu gün də həmin siyasətini davam etdirir. Bu reallıq həm də onu göstərir ki, Səudiyyə Ərəbistanı Krallığı Azərbaycanın haqq mübarizəsinə öz davamlı dəstəyini əsirgəməyib. Bu ölkə də Türkiyə və Pakistan kimi dost və qardaş ölkələr sırasında yer alaraq Ermənistanla diplomatik münasibətlər qurmaqdan imtina edib. Rəsmi Ər-Riyad Azərbaycanın ən çətin günlərində onun yanında olub, bir sıra istiqamətlərdə maksimum dəstəyini ifadə edib. Önəmli humanitar, iqtisadi layihələrin icrasında öncül yerlərdən birini tutub. Məhz bu xüsusda, Ermənistanın Azərbaycana qarşı yürütdüyü işğalçılıq və təcavüzkar siyasətinə qarşı bir sıra nüfuzlu təşkilatlarda öz sözünü deyib, habelə həmin yöndəki siyasi fəaliyyəti ilə ardıcıl dəstəklərini nümayiş etdirib”.
B.Quliyev hesab edir ki, Səudiyyə Ərəbistanı Krallığı 44 günlük Vətən müharibəsi dövründə də Azərbaycana mənəvi dəstəyini göstərib: “Lakin bununla yanaşı, ölkəmizlə iqtisadi əlaqələrini gücləndirib, hazırda da bu kimi proseslərdə önəmli yerlərdən birini tutmaqdadır. Bu gün işğaldan azad edilmiş ərazilərimizdə tikinti-quruculuq və bərpa işləri sürətlə vüsət almışdır. Və dövlətimizin başçısı da bu faktordan çıxış edərək Səudiyyə Krallığının şirkətlərinin həmin proseslərdə iştirak etməyə dəvət edib. Bu reallıq dost Səudiyyə xalqı ilə Azərbaycan xalqı arasındakı münasibətlərin bariz nümunəsidir. O cümlədən, ilin əvvəlinin də çox yaddaqalan oluğunu deyən ölkə rəhbərimiz dost ölkənin şirkətlərindən birinin böyük elektrik enerjisi stansiyasının tikinti layihəsinə start verdiyini xatırladıb. Düşünürəm ki, həm də İslam dünyasının mərkəzlərindən biri kimi tanınan Səudiyyə Ərəbistanı Krallığının Azərbaycana birmənalı dəstək ifadə etməsi digər ərəb ölkələrinə də bir nümunə olmalı, etalon kimi göstərilməlidir. İşğal altında qalarkən dağıdılan və təhqirlərə məruz qalan məscidlərimiz, dini ibadətgahlarımıza görə ilk etiraz səsini ucaldan da məhz Səudiyyə Ərəbistanı olub. Təəssüf ki, bir sıra ərəb ölkələri nəinki səslərini çıxarmırdılar, əksinə, müsəlman mənəviyyatına təhqirlə yanaşan Ermənistanla əməkdaşlıq edir, onun siyasətinə dolayısı ilə dəstək göstərirdilər. Hesab edirəm ki, artıq nüfuzlu ərəb ölkələri də yeni reallığı qəbul etməli və Səudiyyə Ərəbistanının Azərbaycanla dostluq, qardaşlıq münasibətlərindən örnək götürməlidirlər”.
Bu baxımdan politoloq hesab edir ki, bəzi ərəb ölkələri öz siyasətinə yenidən baxmalıdır.
Vidadi ORDAHALLI
