Spiker Simonyan Paşinyanın komandasında ikinci kurs açır - müharibəyə hazırlaşmamalıyıq...

Əhəd Məmmədli: “Anlayırlar ki, bir balaca şıltaqlıqları vəziyyəti daha da kəskinləşdirə bilər”

img

Ermənistan parlamentinin sədri Alen Simonyan Rusiyaya səfər edəcək. O, bu barədə parlamentdə çıxışı zamanı deyib. A.Simonyan bildirib ki, səfər oktyabrın 9-na planlaşdırılıb. O, Rusiya Dövlət Dumasının sədri Vyaçeslav Volodin ilə görüşəcək.

Parlament sədri deyib ki, səfər zamanı regional və Kollektiv Təhlükəsizlik Müqaviləsi Təşkilatı (KTMT) daxilindəki məsələlər müzakirə olunacaq.

Eyni zamanda o, Ermənistanın KTMT-dən çıxmaq vaxtının gəlib çatması ilə bağlı sualı cavablandırmaq istəməyib.

Onun sözlərinə görə, KTMT-nin Ermənistandan çıxmaqla bağlı qərar verməsi mümkündür: “Əgər bu struktur lazımi reaksiya göstərmirsə, o zaman – mən öz fikrimdə qalıram – bu barədə yaxşıca düşünüb başa düşməliyik. Amma bu bir oyun deyil. Biz bundan sonra nə edəcəyimizi və bundan sonra nələrin baş verəcəyini anlamadan qəfil addımlar ata bilmərik. Bəli, problemin olması barədə danışacağam”.

 Alen Simonyan əmindir ki, dinc gündəm qurularsa, məhbusların edamını əks etdirən videoçəkilişlər olmayacaq.

Jurnalistlərin “erməni hərbi əsirlərin edamını əks etdirən videogörüntülərdən sonra sülh gündəmini aktual hesab edirsinizmi” sualına parlament sədri belə cavab verib: “Bəli, belə videolar daha olmasın”.

Alen Simonyanın fikrincə, müasir dünyada Ermənistan qonşularına qarşı ərazi iddiaları ilə məşğul ola, silahlı ritorika ifadə edə bilməz:

“Biz müharibəyə başlamayacağıq, Ermənistanı müdafiə edəcəyik”.

Göründüyü kimi, Ermənistanın yüksək çinli məmuru Azərbaycana sülhlə bağlı reveranslar edir. Ancaq bir müddət əvvəl Ermənistanın yüksək rütbəli hərbçisi, konkret olaraq Müdafiə Nazirliyi Baş Qərərgah rəisinin müavini  ölkəmizi müharibə ilə təhdid etmişdi. Bütün bunlar belə bir nəticəyə gəlməyə əsas verirmi ki, Ermənistan hakimiyyətinin daxilində müharibə və sülhlə bağlı mövzuda ikitirəlik mövcuddur?

Politoloq Əhəd Məmmədli “Bakı-Xəbər”ə açıqlamasında bildirdi ki, Ermənistanın siyasi elitasında ikitirəliyin olduğu açıq-aydın görünür: “Biz eyni tendensiyanı onların müxalif cameəsində də müşahidə edirik. Müharibədən dərhal sonraya təsadüf edən parlament seçkiləri göstərdi ki, erməni cəmiyyəti müharibəyə deyil, sülhə meyl göstərir. Belə olmasaydı, müharibədə biabırcasına məğlub olmuş Paşinyanın liderlik etdiyi partiya seçkidə qalib gəlməzdi. Ermənistanın baş qərərgah rəisi  müavinin bizi müharibə ilə hədələməsi daxili auditoriyanın könlünü almağa hesablanmış bir blef idi. Onların bütün məmurları mövcud reallıqları gözəl dərk edir. Bilirlər ki, bütün parametrlər üzrə üstünlük Azərbaycanın tərəfindədir. Son hərbi toqquşma onları daha da qorxutdu. Bilirlər ki, hərbi səhnə artıq Azərbaycanın deyil, Ermənistanın öz ərazisində düzənlənir. Anlayırlar ki, bir balaca şıltaqlıqları vəziyyəti daha da kəskinləşdirə bilər. Erməni spikerin sözləri ümidvericidir, ancaq adamda tam əminlik yaratmır. Ermənistan müstəqillik əldə edəndən sonra asılı vəziyyətdə qaldı. Bir tərəfdən Moskva onu sıxdı, digər səmtdən xaricdəki erməni diasporu. Hər iki tərəfdən direktivlər gəlir. Onlara uyğun olaraq erməni hakimiyyəti hərəkət edir. Bu səbəbdən də belə ziddiyyətlər ortaya çıxır. Biz belə ziqzaqlı davranışları Paşinyanın özünün də addımlarında görürük. Azərbaycan Ermənistana qarşı sülhə məcbur etmə əməliyyatlarını dərinləşdirməlidir. Yalnız bundan sonra Ermənistan bizim bütün haqlı tələblərimizi yerinə yetirəcək və nəticədə sülh müqaviləsini imzalamağa razılıq verəcək”.

Məhəmmədəli QƏRİBLİ

Peşə etikası

Son xəbərlər