Azər Həsrət: “Bu cür kütləvi məzarlıqlara azad olunan ərazilərdə hələ çox rast gələcəyik”
Xocavəndin Edilli kəndində daha bir kütləvi məzarlıq aşkarlanıb. Məzarlıqda 12 nəfərin qalıqları üzə çıxıb. Əşyalarla birlikdə aşkarlanan skeletlərin geyimlərindən hərbçi olduqları bilinir. Bundan başqa, skeletlərin əlləri və ayaqlarının məftil və kəndirlə bağlandığı məlum olub. Qeyd edək ki, bu ilin fevral ayında da Xocavəndin Edilli kəndində kütləvi məzarlıq aşkarlanmışdı.
Edillidəki kütləvi məzarlıq da sübut edir ki, ermənilər zaman-zaman Azərbaycan xalqına qarşı kütləvi qətliamlar həyata keçiriblər. Onu da bildirək ki, Ermənistan tərəfi birinci Qarabağ müharibəsi dövründə itkin düşən 4000-ə yaxın azərbaycanlı ilə bağlı informasiya verməkdən imtina edir. Ancaq işğaldan azad edilən ərazilərdə aşkar edilən kütləvi məzarlıqlar bir daha sübut edir ki, ermənilər azərbaycanlıları vəhşicəsinə qətl edərək, kütləvi şəkildə dəfn ediblər.
Qeyd edək ki, beynəlxalq təşkilatlar, səfirliklər kütləvi məzarlıqlarla bağlı məsələyə laqeyd yanaşdılar.
- “Beynəlxalq təşkilatlar əmin olmaq istəyirlərsə, buyurub bölgəyə səfər edib, erməni vəhşiliyini öz gözləri ilə görə bilərlər”
Siyasi şərhşi Azər Həsrət “Bakı-Xəbər”ə açıqlamasında bildirdi ki, 30 illik işğal dövründə Azərbaycan tərəfi bütün dünyaya bəyan edirdi ki, ermənilər azərbaycanlıları kütləvi şəkildə qətlə yetirib, onları kütləvi şəkildə də dəfn ediblər: “Aşkar olunan kütləvi məzarlıqlar illərdir bizim dediyimiz, lakin beynəlxalq dairələrin israrla eşitmək istəmədiyi həqiqətlərdir. Onu da deyim ki, ermənilərin belə vəhşiliyi tək-tək deyil, kütləvi şəkildə baş verib. Bu səbəbdən də dünyanın anti-Azərbaycan ovqatlı liderləri bu məsələni nəzərə alıb, həqiqətləri görməli və eşitməlidirlər. Yəni Azərbaycan yalan uydurmur, yalnız həqiqətləri deyir. Beynəlxalq təşkilatlar əmin olmaq istəyirlərsə, buyurub bölgəyə səfər edib, erməni vəhşiliyini öz gözləri ilə görə bilərlər”.
Onun sözlərinə görə, Xocalının yaxınlığındakı Qaradağlı, Edilli, Cəmilli, Meşəli, Ballıqaya, Ağdaban kimi yaşayış məntəqələrində azərbaycanlı əhalini kütləvi şəkildə qətlə yetirirdilər. Daha sonra onları bu cür kütləvi məzarlıqlarda basdırırdılar. Bu, erməni vandalizminin, erməni vəhşiliyinin bir nümunəsidir: “Özü də dünyanın heç bir yerində görülməyən, misli-bərabəri olmayan bir vəhşilik. Bu cür toplu məzarlıqları aşkara çıxardıqdan sonra onları aktlaşdıraraq beynəlxalq təşkilatların müzakirəsinə çıxarmaq lazımdır”.
Həmsöhbətimiz onu da əlavə etdi ki, Birinci Qarabağ savaşında ermənilər bu cür vəhşilikləri işğal etdikləri bir çox ərazilərdə gerçəkləşdiriblər. Bu cür kütləvi məzarlıqlara azad olunan ərazilərdə hələ çox rast gələcəyik.
Günel CƏLİLOVA
.jpg)
