Ermənistan mətbuatında Qarabağla bağlı danışıqlar prosesində Azərbaycanın şərtləri açıqlanıb. Bu barədə Ermənistanın Baş naziri Nikol Paşinyanın ailəsinə məxsus “Haykakan Jamanak” qəzeti yazıb.
Qəzet Qarabağla bağlı danışıqlar prosesində Azərbaycanın yeni şərtlərini açıqlayıb. Qeyd olunur ki, Azərbaycan Qarabağ məsələsinin birdəfəlik həlli üçün Ermənistan qarşısında beş əsas şərt qoyub: “Tam aydın şəkildə deyə bilərik ki, Azərbaycanın Ermənistana 5 əsas şərti var. Onlar aşağıdakılardır:
1. Qarabağın “müdafiə ordusu”nun buraxılması;
2. Qarabağın Azərbaycanın tərkibində heç bir muxtariyyət olmadan (sıfır statuslu) tanınması;
3. Ermənistan ərazisindən keçən dəhlizin (Zəngəzur) açılması;
4. 1919-1920-ci illərin xəritələri üzrə delimitasiya və demarkasiya prosesinə başlanılması;
5. İtkin düşmüş azərbaycanlıların taleyinin öyrənilməsi”.
İnformasiyanın Paşinyanın ailə qəzetində dərc edilməsi onun həqiqiliyi ehtimalını artırır. Bununla dolayısı ilə etiraf edirlər ki, Azərbaycanın şərtlərini yerinə yetirməyə hazırdılar.
Maraqlıdır, bütün bunları ekspertlər necə dəyərləndirir?
“Ermənistan, Qarabağ daxil olmaqla, Azərbaycanın ərazi bütövlüyünü tanımalıdır”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə prizmadan yanaşdı: “İkinci Qarabağ müharibəsindən sonra Azərbaycan dərhal Ermənistana sülh müqaviləsinin bağlanması üçün təkliflər verib. Əsas təklif beş bənddən ibarətdir. Ancaq ilk əvvəl Ermənistan 10 noyabr birgə bəyannaməsinin bəndlərini həyata keçirməlidir. Ermənistan sözdə Azərbaycanın beş bənddən ibarət təklifini qəbul edib. Ermənistanın hakim ailəyə yaxın mətbuatinda bir sıra təkliflərin səsləndirilməsinə gəldikdə isə, Azərbaycan Qarabağ məsələsini Ermənistanla müzakirə etmir. Ümumiyyətlə, Azərbaycan tələb edir ki, Ermənistan bu məsələni qabartmamalıdır. Əgər onlar belə təklifləri mətbuatda veribsə, deməli burada sülhdən yayınmaq cəhdi var. Azərbaycanla bağlı yazıda deyilir ki, 1920 -ci illərin xəritəsini irəli sürür. Düşünürəm ki, Ermənistan burada manipulyasiya edir. Çünki beş təklifdə, düşünmürəm ki, bu xəritə məsələsi real ola. Azərbaycan qarşılıqlı olaraq ərazi bütövlüyünün tanınmasını irəli sürür. Burada Qarabağ sözü işlədilmir. Təbii ki, Ermənistan Qarabağ daxil olmaqla Azərbaycanın ərazi bütövlüyünü tanımalıdır. Ermənistan hələ ki, bundan yayınır. Ona görə də danışıqları uzadır. Ermənistan mətbuatı, xüsusilə hakimiyyətə yaxın olan mətbuat yenə də reallıqlara söykənməyən informasiya verir. Bu da beynəlxalq birliyi aldatmaqdır. Azərbaycan Prezidenti cənab İlham Əliyev beynəlxalq hüquqa dayanan təkliflər verib. İrəvan mütləq şəkildə bu tələbləri icra etməlidir. Düşünürlərsə ki, Prezident İlham Əliyevi bu təkliflərdən geri çəkəcəklər, yanılırlar. Prezident qətiyyətlə Azərbaycanın milli maraqlarını istənilən vasitə ilə qoruyur”.
Bu baxımdan politoloq hesab edir ki, Ermənistanın oyunbazlığı alınmayacaq.
Vidadi ORDAHALLI
