Məlum olduğu kimi, Fransa səfiri Zakari Qros oktyabrın 3-də Azərbaycan Xarici İşlər Nazirliyinə dəvət edilib. Görüşdə oktyabrın 1-də Azərbaycanın Fransadakı səfirliyinə qarşı bu ölkədəki radikal erməni qrupları tərəfindən törədilən növbəti vandalizm aktı ilə bağlı etiraz notası diplomata təqdim edilib.
Bu barədə Azərbaycan Xarici İşlər Nazirliyinin yaydığı məlumatda bildirilir. Görüşdə son zamanlar Azərbaycanın Fransanın ərazisində yerləşən diplomatik nümayəndəliklərinə qarşı bu ölkədə məskunlaşan radikal erməni qrupları tərəfindən törədilən hücumların sayının artdığı qeyd edilib. Növbəti belə bir hücumun oktyabrın 1-də gecə saatlarında baş verdiyi, bir qrup radikal erməni tərəfindən səfirliyin inzibati binasına qırmızı rəngli boya atıldığı və binanın üzərinə Azərbaycan əleyhinə təhqiramiz ifadələr yazıldığı müqabil tərəfin diqqətinə çatdırılıb.
Fransanın səlahiyyətli qurumlarından bu ölkənin ərazisində yerləşən Azərbaycanın diplomatik nümayəndəliklərinin və Azərbaycan Mədəniyyət Mərkəzinin mühafizəsinin lazımi qaydada təşkil edilməsi, indiyə qədər törədilmiş zorakılıq aktlarının hərtərəfli araşdırılması və təqsirkar şəxslərin məsuliyyətə cəlb edilməsi, səfirliyin inzibati binasına vurulmuş ziyanın aradan qaldırılması və müvafiq təzminatın ödənilməsinin təmin olunması tələb edilib.
Fransa səfiri Azərbaycan səfirliyinə qarşı baş verən hadisənin təəssüf doğurduğunu bildirib və Azərbaycan tərəfinin müraciətini Fransanın səlahiyyətli orqanlarına çatdıracağını söyləyib.
“Səfirliyimizə qarşı edilən vandallıqlarla bağlı adıçəkilən ölkədən təzminat tələb etmək hüququmuz var”
Azərbaycanın Fransaya nota verməsi və həmin ölkədən təzminat tələb etməsi ilə bağlı fikir bildirən siyasi şərhçi Tural İsmayılov qeyd etdi ki, Fransa uzun illərdir hüquq normalarını kobud şəkildə pozaraq birmənalı şəkildə Ermənistanı dəstəkləyirdi: “Fransa ATƏT-in Minsk Qrupu üzvü olduğu dövrlərdə həmin ölkə Azərbaycan torpaqlarının işğaldan azad edilməsi, beynəlxalq hüququn norma və prinsiplərinin təmin edilməsi məsələsində passiv mövqe nümayiş etdirib. Eyni zamanda, 44 günlük Vətən müharibəsi dövründə də Azərbaycanın öz torpaqlarını işğaldan azad etmək və beynəlxalq hüquq normalarının təmin edilməsi ilə bağlı başlanan haqq savaşında Fransa dəridən-qabıqdan çıxaraq Ermənistanı müdafiə edirdi. Postmüharibə dövründə də həmin ölkənin birmənalı olmayan addımlarının şahidi olduq. Bu gün Qarabağ münaqişəsi həll olunsa da, Fransa israrla lazımsız ATƏT-in Minsk Qrupunu Ermənistanın tələbi ilə dirçəltməyə çalışır”.
Həmsöhbətimiz onu da əlavə etdi ki, Fransanın öz ərazisində keçirilən “sarı jiletlilər” aksiyası vəhşicəsinə boğulmaqla dünyaya demokratiya və insan haqları dərsi keçən Fransanın necə bir ölkə olduğu beynəlxalq ictimaiyyətə bəlli oldu: “Bu hal Fransanın öz üzərinə götürdüyü beynəlxalq tələbləri kobud şəkildə pozduğunu göstərdi. Erməni faşist və vandalları tərəfindən Fransanın Azərbaycandakı səfirliyinə hücum zamanı həmin ölkənin güc strukturları bu olaya tamaşa etdilər. Həmçinin, Fransadakı Azərbaycanın mədəniyyət mərkəzinə edilən hücum cəhdi zamanı bu ölkənin aidiyyəti qurumları heç bir iş görmədi. Ermənistan lobbisinin son addımı Fransanın öz əleyhinə edilmiş bir akt oldu. Bütün dünyaya bir daha bəlli oldu ki, Fransa təhlükəsizlik orqanları siyasiləşmiş qurumlardır. Istənilən zaman hansısa lobbi maraqlarına göz yuma bilirlər. Bu baxımdan da Azərbaycan haqlı olaraq Fransaya növbəti dəfə nota verdi. Səfirliyimizə qarşı edilən vandallıqlarla bağlı adıçəkilən ölkədən təzminat tələb etmək hüququmuz var. Fransa da həmin təzminatı ödəməlidir”.
Günel CƏLİLOVA
