İkinci Qarabağ müharibəsi zamanı Ermənistanın muzdlu qüvvələrdən, terrorçulardan istifadə etməsi artıq bu ölkənin özündə açıq etiraf edilir. PKK üzvü olan iki şəxsin Türkiyəyə təhvil verilməsindən sonra səslənən etiraflar da bunu təsdiq edir.
Qeyd edək ki, kürd mənbələri sentyabrın 25-də “Leheng” və “Alisher” ləgəbli iki PKK terrorçusunun Ermənistan tərəfindən Türkiyə kəşfiyyatına təhvil verildiyini təsdiqləyib. Məsələyə münasibət bildirən Ermənistan parlamentinin deputatı Qeqam Manukyan qeyd edir ki, İrəvan ona sığınan iki kürd terrorçunu ekstradisiya edərək Türkiyəyə ciddi jest edib. O, Ermənistanı PKK-ya xəyanətdə ittiham edərək bildirib ki, bu kürdlər Qarabağda 44 günlük müharibənin fəal iştirakçıları olub. Bu etiraf bir daha təsdiq edir ki, İkinci Qarabağ müharibəsində Ermənistan PKK terrorçularını Azərbaycana qarşı istifadə edib. Manukyan baş verənlərə görə kürdlərdən üzr istəyib: “Qardaşlar, bizi bağışlayın ki, ermənilər övladlarınızı türklərin əlinə verdilər, orada öləcəklər”. Qeyd edək ki, Türkiyə ilə Ermənistan bugünə kimi diplomatik əlaqələr qurmayıb, ona görə də iki ölkə arasında terrorçuların və digər cinayətkarların qarşılıqlı ekstradisiyasına dair razılaşma yoxdur. Lakin diplomatik əlaqələrin olmaması Ermənistan və Türkiyə xüsusi xidmət orqanlarının iki PKK terrorçusunun Türkiyəyə təhvili üzrə birgə əməliyyat keçirməsinə mane olmayıb. Söhbət Atilla Çiçək və Hüseyn Yıldırımın ekstradisiyasından gedir. PKK bu şəxslərin Türkiyənin şərqində döyüşdüyünü və 2021-ci ilin avqustunda Türkiyə-Ermənistan sərhədində ermənilərə təslim olduqlarını bəyan edib. Ermənistanın “datalex.am” məhkəmə-informasiya sistemində dərc olunan məlumata görə, adıçəkilən şəxslərə qarşı Ermənistan sərhədini qanunsuz keçmək və respublikaya qaçaqmalçılıq yolu ilə silah-sursat gətirmək kimi rəsmi ittiham irəli sürülüb. Ona qədər isə bu şəxslər Qarabağda döyüşdükləri üçün sərbəst fəaliyyət göstəriblər. Lakin sonradan bunun qarşısı alınıb. Zəngəzur vilayətinin birinci instansiya məhkəməsi 2022-ci ilin yanvarında adları çəkilən şəxslərin hər ikisini 7 il müddətinə azadlıqdan məhrum edib. Daha sonra Apellyasiya Məhkəməsi onların həbs cəzasını 3 il sınaq müddətli şərti cəza ilə əvəz edib. Sonradan da bu şəxslər Türkiyəyə təhvil verilib.
Düzdür, indi Ermənistan rəsmi səviyyədə bunu təkzib etməyə çalışır və Türkiyəyə təhvil verilmə ilə bağlı əməliyyatın olmadığını bildirir. Ermənistan Milli Təhlükəsizlik Xidməti və Ədliyyə Nazirliyi kürdlərin Türkiyəyə ekstradisiyasında iştirakını inkar edib. Amma əksər erməni və kürd mənbələri tamamilə əks mövqedən çıxış edirlər. Terrorçu Atilla Çiçəyin ailəsi onun üzvü olduğu Xalq Müdafiə Qüvvələrinə (PKK-nın hərbi qolu) müraciət edərək övladlarının taleyindən narahat olduqlarını bildirib. Hadisə ilə bağlı təşkilat açıqlama yayıb və Atilla Çiçəyin, eləcə də Hüseyn Yıldırımın Türkiyə kəşfiyyatına məhz Ermənistanın xüsusi xidmət orqanları tərəfindən verildiyini bəyan edib. Xalq Müdafiə Qüvvələrinin bəyanatına görə, Çiçək və Yıldırım azadlığa buraxılmaq əvəzinə təxminən bir ay əvvəl Ermənistandan Türkiyəyə ekstradisiya edilib. Təşkilat vurğulayıb ki, bununla Ermənistan beynəlxalq hüquq normalarını və ölkə qanunlarını pozub. Bəyanatda Xalq Müdafiə Qüvvələri, həmçinin, bütün səlahiyyətliləri terrorçuların harada olduqları barədə ailələrinə məlumat verməyə çağırıb. Türkiyə mətbuatının məlumatına görə, 2012-ci il sentyabrın 25-də terrorçu Hüseyn Yıldırım Tunceli vilayətinin Çiçəkli kəndində "Türk Telekom"a məxsus avtomobili ələ keçirərək içərisinə uzaqdan idarə olunan partlayıcı qurğu yerləşdirib. Daha sonra terrorçu bu avtomobili Atatürk bölgəsində Türkiyə ordusunun hərbi maşınının yanında partladıb. Nəticədə 6 əsgər, eləcə də ətrafdakı bir nəfər həlak olub. 29 avqust 2020-ci il tarixində terrorçu Yıldırım İran ərazisindən Türkiyənin Aqra vilayətinə keçərək Doğubəyazıt bölgəsində təhlükəsizlik qüvvələrinə silahlı basqın həyata keçirib. Nəticədə iki əsgər şəhid olub. Digər terrorçu Atilla Çiçək isə uzun illərdir Türkiyə ilə həmsərhəd Suriya və İranda terror fəaliyyəti ilə məşğul olub. Onların Türkiyəyə təhvil verilməsindən sonra PKK bəyan edir ki, baş nazir Nikol Paşinyan bu addımı oktyabrın 6-da onun Türkiyə prezidenti Rəcəb Tayyip Ərdoğanla Praqada gözlənilən görüş ərəfəsində atıb. Qeyd edək ki, bu, Ermənistan tərəfindən kürdlərin Türkiyəyə ekstradisiyası ilə bağlı ilk hadisədir. Kürdlər indiyədək türklərə qarşı mübarizədə ermənilərin müttəfiqi olublar. Hər iki Qarabağ müharibəsində də kürd döyüşçüləri ermənilərin tərəfində iştirak edib. Ermənistan xüsusi xidmət orqanlarının Türkiyəyə qarşı PKK ilə uzun illər əməkdaşlıq etdiyini hamı bilir. İşğal dövründə ermənilərin nəzarətində olan Azərbaycan ərazilərində PKK üzvləri üçün təlim düşərgəsi yaratdığı da sirr deyil. Amma indi görünən budur ki, Azərbaycanın İkinci Qarabağ müharibəindəki qələbəsi Ermənistanın PKK-ya münasibətini dəyişib. Azərbaycanın yaratdığı yeni reallıqlarla barışmalı olan Ermənistan PKK ilə də işbirliyinə son verir.
Samirə SƏFƏROVA
