Ermənistan iki PKK terrorçusunu Türkiyəyə təhvil verib. Bu barədə Ermənistan parlamentinin “Ermənistan” blokundan olan deputatı Qaxam Manukyan məlumat verib. O, Ermənistan Milli Təhlükəsizlik Xidmətinin Kürdüstan Fəhlə Partiyasının iki terrorçusunu saxlayıb Türkiyə kəşfiyyatı “MİT”ə təhvil verməsi barədə şok məlumat yayıb.
Bu arada PKK bəyanat yayaraq Ermənistanı tənqid edib: “Bizim üzvlərimizi Türkiyəyə təslim etmək Ermənistan üçün ayıbdır”. Məlumata görə, Ermənistanın Kürdüstan Fəhlə Partiyasının (PKK) iki üzvünü Türkiyəyə ekstradisiya etməsi İrəvanda və terror təşkilatında narazılıqla qarşılanıb. PKK bu təşkilatın iki üzvünün Türkiyəyə ekstradisiyasına görə Ermənistanı beynəlxalq qanunları pozmaqda ittiham edib.
Atilla Çiçək və Hüseyn Yıldırım adlı terrorçular artıq Türkiyəyə təhvil verilib.
Mətbuatın yaydığı məlumata görə, “Lehenk” və “Əlişir” kod adlı PKK döyüşçüləri 2021-ci ilin avqustunda Ermənistan sərhədində saxlanılıb. Onlara qarşı ittiham irəli sürülüb. 2022-ci il fevralın 23-də onlar Ermənistanın Apellyasiya Məhkəməsi tərəfindən azadlığa buraxılıb. Amma erməni xüsusi xidmət orqanları kürdləri yenidən saxlayıblar. Onlara lazımi tədbirlər görüldükdən sonra azadlığa buraxılacağı vəd edilsə də, təxminən bir ay əvvəl onların Türkiyəyə ekstradisiya ediləcəyi bəlli olub.
Datalex.am məhkəmə-informasiya sistemində dərc olunan məlumata görə, 2021-ci ildə Ermənistanda Çiçək və Yıldırım 2021-ci il avqustun 16-da Ermənistan sərhədini qanunsuz keçməkdə və ölkəyə qaçaqmalçılıq yolu ilə silah və sursat keçirməkdə ittiham olunublar. Zəngəzur vilayətinin birinci instansiya məhkəməsi 2022-ci ilin yanvarında hər ikisini pulları müsadirə olunmaqla 7 il müddətinə azadlıqdan məhrum edib. Daha sonra Apellyasiya Məhkəməsi PKK-nın hər iki üzvünün həbs cəzasını azaldaraq, 3 il sınaq müddəti ilə şərti cəza ilə əvəz edib.
Türkiyə mənbələri də iki terrorçunun tutularaq ölkəyə gətirildiyini bildirir. Lakin Türkiyə mediası hüquq-mühafizə orqanlarına istinadən Ermənistanın adını çəkməyib. Bu barədə Azərbaycan mətbuatı yazıb.
Maraqlıdır, PKK üzvləri Ermənistanda nə gəzirdi? Sualın cavabı, təbii ki, sadədir, bu gün Ermənistanda xeyli sayda PKK terrorçusu var və onlar bu ölkə tərəfindən himayə olunur. Ermənistan bu iki nəfər PKK-çını təhvil verməklə əslində izi itirmək, iz azdırmaq istəyir. Guya Ermənistanda cəmi 2 PKK-çı vardı, onu da Türkiyəyə təhvil veriblər.
“Ermənistanın PKK ilə əməkdaşlığı, bu terror qrupunun üzvlərini himayə etməsi məlumdur”
Siyasi ekspert Rövşən Rəsulov “Bakı-Xəbər”ə bildirdi ki, bu gün Ermənistan terroru himayə edən dövlət kimi də tanınır: “Ermənistan terrorçu dövlət olmaqla yanaşı, həm də beynəlxalq axtarışa verilən bir sıra terrorçuları himayə edən ölkə kimi tanınır. Məhz sonuncu məsələ deyilənləri bir daha təsdiqlədi. İki PKK-çının Türkiyəyə təhvil verilməsi məsələsinə gəlincə, hazırda Ermənistan hakimiyyətinin içində ikitirəlik yaranıb. Belə ki, Ermənistan Milli Təhlükəsizlik Xidməti bir tərəfdən bəyan edib ki, onlar PKK terrorçularını Türkiyənin Milli İstihbarat Təşkilatına təhvil verməyib, Ermənistanın digər güc strukturları, eləcə də Ədliyyə Nazirliyi Türkiyə ilə heç bir əməkdaşlığa getmədiklərini bəyan ediblər, terrorçuları Türkiyəyə təhvil verməyiblər. Bu zaman erməni cəmiyyətində sual yaranır ki, bu iki terrorçunu Türkiyəyə kim təhvil verib? Əslində, biz digər tərəfdən ehtimal edə bilərik ki, Ermənistanın kəşfiyyat xidməti və yaxud xüsusi xidmət orqanları gizli yolla bu terrorçuları Türkiyəyə təhvil verib, bu da qeyri-rəsmi şəkildə baş tutub. Sadəcə, bunu açıq-aydın bəyan etməkdən çəkinirlər. Yəni bəyan etsələr, bu artıq Ermənistanla Türkiyənin müəyyən mənada münasibət qurmasına dəlalət edər. Digər tərəfdən, hesab edə bilərik ki, Türkiyə faktiki olaraq yalnız Ermənistana qarşı deyil, PKK terrorçularını himayə edən digər ölkələrə qarşı da sərt mövqeyini ifadə edir. Məsələn, Finlandiya və İsveçin NATO-ya üzv olmları üçün Türkiyə həmin ölkələrdə gizlənən PKK terrorçularının təhvil verilməsini tələb edib. Yalnız bu halda hən Finlandiya, həm də İsveçə NATO-ya daxil olmaq üçün vetonu aradan qaldıracağını vəd edib. Bu baxımdan, Türkiyənin PKK terrorçuları ilə bağlı sərt mövqeyi bu gün də davam edir”.
R.Rəsulov ehtimal edir ki, Türkiyə istihbaratı Ermənistana qarşı təzyiq siyasəti aparıb və siyasətin fonunda Ermənistanda gizlənən PKK terrorçularından ikisini geri almağa müvəffəq olub. Onun sözlərinə görə, bu kimi hallar həm də belə deməyə əsas verir ki, Ermənistan bundan sonra heç bir PKK terrorçusuna öz ölkəsində sığınacaq verməyəcək. “Ermənistanın PKK ilə əməkdaşlığı, bu terror qrupunun üzvlərini himayə etməsi məlumdur. O bunu davam etdirsə və belə fikri olsa da, bundan çəkinməli olacaq, çəkinməsə, qarşısında Türkiyənin sərt üzünü görəcək. Bu baxımdan, Kürd Fəhlə Partiyasının da Ermənistanı hədəfə alması və xəyanətdə ittiham etməsi belə deməyə zəmin yaradır ki, əslində Ermənistan düşdüyü çətin və böhranlı vəziyyətində başqa əlac da tapa bilmir. Ermənistanın xəyanət etməkdən başqa yolu yoxdur. Faktiki olaraq PKK hər zaman Ermənistana dəstəyini ifadə edib. Hətta müxtəlif Yaxın Şərq ölkələrində PKK terror təşkilatının düşərgələrində erməni terror təşkilatları da fəaliyyət göstərib. Bu baxımdan, hər iki cinahın bir-birinə yaxınlığı mövcuddur. Məhz Ermənistanın Türkiyə qarşısında əyilməsi, qorxması PKK-nın da Ermənistana qarşı sərt bəyanatlar verməsinə və onu xəyanətdə ittiham etməsinə şərait yaradıb. Bu baxımdan hesab edə bilərik ki, Türkiyə bundan sonra da nəinki Ermənistana, PKK terror qruplaşmasının üzvlərini himayə edən digər dövlətlərə qarşı da qətiyyətini nümayiş etdirəcək və öz istəyinə nail olacaq”-deyə R.Rəsulov vurğuladı.
İradə SARIYEVA
