Separatçı media Vardanyanın Qarabağı “idarə etməyə” başladığını yazır. Qanunsuz şəkildə Azərbaycanın Qarabağ iqtisadi rayonununa gəlmiş Ruben Vardanyan Xankəndinin meri David Sarkisyanla görüşüb.
Separatçı erməni nəşrlərinin yaydığı məlumata görə, bu barədə Ruben Vardanyan öz "Facebook" səhifəsində yazıb.
Məlumatda deyilir: “Ruben Vardanyanla Xankəndinin meri arasında keçirilən görüşdə paytaxtın inkişafı və prioritet problemləri müzakirə olunub. Biz Stepanakertin meri David Sarkisyanla “artsax” respublikası paytaxtının inkişafı, infrastrukturun yaxşılaşdırılması, həll edilməli olan prioritet vəzifələr və mümkün əməkdaşlıq haqqında danışdıq. Şəhərin prioritet məsələlərindən danışan mer uşaq bağçalarının artırılması məsələsini də diqqətə çatdırıb. Belə bir “problemin” olması məni həqiqətən də sevindirir. Bu o deməkdir ki, müharibədən sonrakı çətinliklər burada yaşayan insanları məyus etmir və onlar öz gələcəklərini doğma şəhərlərində görməkdə davam edirlər”.
Görünən odur ki, Rusiyadan olan milyarder Azərbaycanın icazəsi olmadan Qarabağda qanunsuz iqtisadi fəaliyyətlə məşğuldur. Bu isə, Azərbaycan qanunları ilə yanaşı, beynəlxalq hüquqa da zidd olan bir addımdır.
“Qanunsuz sosial-iqtisadi fəaliyyətlə məşğul olmaqla yanaşı, daha sonra onun separatçıların başına gətirilməsi planlaşdırılır”
Məsələyə münasibət bildirən AMİP funksioneri Əli Orucovun fikrincə, R.Vardanyanın Qarabağda qanunsuz iqtisadi fəaliyyəti həm beynəlxalq hüquqa ziddir, həm də çox təhlükəli tendensiyadır: “Bəli, kimliyindən asılı olmayaraq, Qarabağda iqtisadi fəaliyətlə məşğul olan xarici iş adamı Azərbaycanda icazə almalıdır. Hələlik biz Xankəndiyə və digər yaşayış məntəqələrinə nəzarət etməsək də, hüquqi baxımdan həmin ərazilər Azərbaycana məxsusdur. Bu isə o deməkdir ki, istənilən xarici vətəndaş Qarabağda hansısa iqtisadi-sosial fəaliyyətlə məşğul olacaqsa, buna görə Bakıdan icazə almalıdır. Digər tərəfdən, milyarder R.Vardanyan erməni əsilli olsa da sıradan bir adam deyil. R.Vardanyn Rusiyada müəyyən dairələr tərəfindən himayə olunur. Onun Qarabağa göndərilməsi də xüsusi missiyaya əsaslanır. Məsələ olnadır ki, sabiq prezidentlər Robert Köçəryan və Serj Sarkisyanın timsalında “Qarabağ klanı” cəmiyyətdə sosial dayaqlarını itirib. Onları yenidən hakimiyyətə gətirmək perspektivi yoxdur. Bunu ötən il Ermənistanda keçirilən parlament seçkilərinin nəticələri əyani şəkildə sübut etdi. Ona görə də R.Vardanyanın timsalında yeni persona hazırlanır. Qarabağda qanunsuz sosial-iqtisadi fəaliyyətlə məşğul olmaqla yanaşı, daha sonra onun separatçıların başına gətirilməsi planlaşdırılır. Ən nəhayət, onun Ermənistanda hakimiyyətə gətirilməsi. Biz nəzərə almalıyıq ki, 90-cı illərin ortalarında Köçəryan və Sarkisyan kimi quldurlar məhz bu formada Ermənistanda hakimiyyəti qamarladılar. Düzdür, indi situasiya başqadır. Ən azından, Azərbaycan güclü və qalib tərəfdir. Ancaq biz unutmamalıyıq ki, forma dəyişsə də məzmun dəyişməyib. Hələ də dünyanın aparıcı dövlətləri erməni separatizminin birdəfəlik məhv edilməsini istəmirlər. Cənubi Qafqazda öz təsir imkanlarını saxlamaq üçün ermənilərdən maşa kimi istifadə edirlər”.
Bu baxımdan partiya funksioneri hesab edir ki, Azərbaycan maksimum ayıq-sayıq olmalıdır.
Vidadi ORDAHALLI
