BMT-nin postqarabağ problemlərinə natamam və iki standartlı münasibətinin nəticəsidir ki, Paşinyan yalan danışdığını özü də bilə-bilə Azərbaycanı guya Ermənistanın ərazi bütövlüyünü tanımamaqda günahlandırdı.
BMT kürsüsündə çıxış etdi və əmin idi ki, düz 30 il Qarabağa dair öz qətnamələrinin icrasının dalınca nəinki getməyən, hətta işğalı qanuniləşdirmək niyyəti güdmüş BMT rəhbərliyi Paşinyanın ağzından vurmayacaq və ona deməyəcək ki, sənin yalanların dünyanı bezdirdi, necə yəni Azərbaycan Ermənistanın ərazi bütövlüyünü tanımır?! Bəs Azərbaycanın 5 sülh şərtinin birincisi ərazi bütövlüyünün qarşılıqlı tanınması deyilmi?!.. Təəssüf ki, Paşinyanın 20 dəqiqəlik çıxışındakı yalanlarına yerindəcə cavab verən bircə BMT rəsmisi tapılmadı...
Yalanlarının cavabsızlığından şirniklənən Paşinyan digər yalana əl atdı. Deyir mən soruşuram ki, İlham Əliyev bizə qəbul etdiyimiz hansı xəritəni göstərəcək?.. Azərbaycan Prezidenti Paşinyanın bu sözlərinin də cavabını özünəməxsus tərzdə verəcək və həmin xəritəni onun "gözünə soxacaq". Biz də soruşuruq ki, Paşinyan, sən Qarabağın, Zəngəzurun, İrəvanın və Göyçənin Ermənistanın olduğunu təsdiqləyən və 1921-ci ilə qədərki dövrə aid xəritə göstərə bilərsən?! Suallı nida Paşinyanın cavabsızlığına işarədir.
Paşinyanın çıxışında ən absurd yalan Azərbaycanın guya "BMT-nin tanıdığı sərhədlər daxilində Ermənistanın ərazi bütövlüyünü tanımaması" ilə bağlıdır. Paşinyan Ermənistanın BMT tərəfindən tanınmış sərhədləri deyəndə nəyi nəzərdə tutur? Məgər BMT SSRİ dağılana qədərki Ermənistanın sərhədlərini tanımır? Tanımırsa, onu BMT-yə necə qəbul edib? Məgər BMT bilmir ki, Dağlıq Qarabağ heç vaxt Ermənistanın tərkibində olmayıb?..
Paşinyan BMT-dəki yalanlarına dünyada kimlərinsə inandığını düşünə bilər. Lakin bilənlər də az deyil ki, Paşinyan yalan və saxta məntiqlə dünyanı fırlatmaq istəyir. Paşinyanın məntiq(sizlik) sxemi belədir - "Qarabağ Ermənistanındır, Ermənistan yalnız Qarabağla bütövdür, Azərbaycan bunu qəbul etmir, deməli Azərbaycan Ermənistanın ərazi bütövlüyünü tanımır". Paşinyanın yalançı məntiq(sizlik) sistemi burada bitdi...
Paşinyana tövsiyə... Məntiq elmində "məntiqi sillagizmlər" deyilən bölmə var, biz universitetdə 45 il əvvəl bunu oxuyurduq, yəqin Paşinyan da oxuyub, eyni dövrün adamlarıyıq. Əgər universitetdə dərslərdə axıradək oturubsa bilməlidir.
Sillagizm - ayrı-ayrılıqda səhv olan bir neçə mühakimədən məntiqi nəticə çıxarmaq... Məsələn, "Qoyun canlıdır. İnsan da canlıdır. Məntiqi nəticə - deməli, qoyunlar da insan kimi danışa bilər"... Paşinyanın BMT-də dediyi "Azərbaycan Ermənistanın ərazi bütövlüyünü tanımır" yalanı "qoyun da danışa bilər" məntiqinə tam uyğundur...
Aydın QULİYEV
