ABŞ-ın aparıcı “Boston Herald” nəşrində “Pelosi Amerikanın maraqlarını zərbə altında qoyur” sərlövhəli məqalə dərc olunub.
Məqalənin müəllifi, “60 Plus” və Amerika Böyük Vətəndaşlar assosiasiyalarının prezidenti, Respublikaçı Milli Komitəsinin keçmiş üzvü və Respublikaçılar Partiyasının Miçiqan təşkilatının sabiq sədri, Litva əsilli amerikalı Saul Anuzis ABŞ Nümayəndələr Palatasının spikeri Nensi Pelosinin Ermənistana son səfərinə toxunur. Müəllif qeyd edir ki, qarşıdan gələn seçkilər ərəfəsində Demokratlar səs toplamaq üçün xarici ölkələrdə çalışarkən çıxılmaz vəziyyətə düşürlər. Bu baxımdan ötən həftə Nensi Pelosi NATO-nun sülh naminə tərəfdaşı olan Azərbaycanla Rusiya və İranın müttəfiqi Ermənistan arasında 100 il tarixi olan münaqişəni həll etməyə cəhd göstərdi. Bu ayın əvvəllərində iki ölkə sərhədində hərbi toqquşmalar başlayanda Pelosi elan etdi ki, yüksək səviyyəli səfərə çıxaraq “öz dəstəyi”ni yalnız “haqlı tərəfə” göstərəcək. O, açıq-aşkar Ermənistanı nəzərdə tuturdu. Səbəb isə qarşıdakı seçkilərdir. Çünki Demokratlar divara dirəniblər, Pelosi üçün isə bu səfər spiker vəzifəsində qalmaqdan ötrü son ümiddir. Onun Ermənistana səfəri ölkəsində səsləri öz xeyrinə dəyişmək məqsədi güdürdü. Onun üçün xarici siyasət, ABŞ diplomatiyası və beynəlxalq miqyasda meydana gələcək nəticələr maraqlı deyil.
Vətənpərvər, Litva əsilli amerikalı və heç kimi öz doğma vətənini sevdiyinə görə günahlandırmadığını vurğulayan müəllif Nensi Pelosini Amerika qarşısında vəzifələrini, dünyanın mənəvi mövqeyini və strateji maraqlarını açıqcasına satdığına görə ittiham edib. O bildirib: “Biz artıq Pelosinin xarici səfərlərinin hansı ssenari ilə təşkil edildiyini bilirik. Buna görə də bu səfərin necə keçəcəyi təəccüblü deyil. Pelosi onilliklərlə davam edən diplomatik səylərin iflasa uğradığı və münaqişənin başladığı dözülməz vəziyyətlə üzləşmişdi. Xanım spiker Azərbaycanı son döyüşləri başlatmaqla “qanunsuz” hərəkət etməkdə ittiham etdi və heç bir ABŞ administrasiyasının əməl edə bilməyəcəyi bir vəd verdi: Rusiyanın hərbi müttəfiqinin NATO müttəfiqinə qarşı dəstəklənməsi. Bu, geosiyasi dəlilikdir. Lakin onun dediklərinin yalnız bir məqsədi var idi – seçki kampaniyası”.
Moskva və İrəvanın bir-birinə sıx bağlı olduqlarını söyləyən müəllif qeyd edir ki, Azərbaycan Qərbi həyati vacib enerji xətti təmin etdiyi halda, Ermənistanın bütün enerji sektoru Rusiyanın əlindədir. Ermənistanda Rusiyanın hərbi bazası var. Hətta ruslar onların sərhədlərini, gömrüyünü və dəmir yollarını idarə edirlər. Pelosi məhz belə bir ölkəyə səfər edib.
Görünən odur ki, aparıcı ABŞ mediası Pelosinin İrəvana səfərinin Vaşinqtonun maraqlarını zərbə altında saxlamasının fərqindədir.
“ABŞ-da ayrıca dövlət siyasəti var və bunu da heç bir şəxs, siyasi partiya dəyişdirə bilməz”
Məsələyə münasibət bildirən Aydınlar Partiyasının sədr müavini Qorxmaz İbrahimli hesab edir ki, Pelosi atdığı addımları ilə ABŞ maraqlarına açıq formada zərər vurur: “Əvvəla, Nensi Pelosi əzəldən ermənipərəst olub və erməni lobbisi ilə sıx bağlıdır. Ancaq biz nəzərə almalıyıq ki, Pelosi hökuməti təmsil etmir. ABŞ prezident üsul-idarəsinə malikdir. Ölkənin siyasi, hərbi, beynəlxalq qərarlarını hökumət verir. Hökumət nə qərar verirsə, o da icra edilir. Pelosi Nümayəndələr Palatasına rəhbərlik etdiyi üçün o yalnız hansısa qanunun qəbul olunmasına təsir edə bilər. Ondan o tərəfə bir şey ola bilməz. Pelosinin İrəvana gəlib ermənilərə yağlı vəd verməsi yalnız qarşıdan gələn seçkilərlə bağlıdır. Məsələ ondadır ki, noyabrda Konqresə seçkilər keçiriləcək. Demokratlar Partiyasının cəmiyyətdə nüfuzu çox aşağıdır. Pelosi gözlənilən acınacaqlı məğlubiyyətdən sığotalanmaq üçün erməni əsilli seçicilərə stavka edir. Ancaq biz nəzərə almalıyıq ki, Birləşmiş Ştatlarda ermənilərin sayı seçkilərin nəticələrinə həlledici təsir gücünə malik deyil. Onu da nəzərə almalıyıq ki, ABŞ-da ayrıca dövlət siyasəti var. Bunu da heç bir şəxs və siyasi partiya dəyişdirə bilməz. O da ondan ibarətdir ki, ABŞ-ın dövlət maraqları hər şeydən öndə gəlir. Dövlət maraqları nəyi tələb edirsə, o da olur. Yəni xarici siyasət dəyişməyəcək. Ona görə də biz öz işimizdə olmalıyıq. İşğaldan azad edilən rayonlarda məskunlaşdırma işi aparmalıyıq”.
Bir sözlə, sədr müavini hesab edir ki, bu kimi hallara elə də fikir vermək lazım deyil.
Vidadi ORDAHALLI
