Belarus rezidenti Aleksandr Lukaşenko, Rusiya ilə yüksək səviyyədə münasibətlərə baxmayaraq, Krımın ilhaqı ilə “dxr” və “lxr”in “müstəqilliyini” rəsmi olaraq niyə tanımamasına aydınlıq gətirib.
Bu barədə Lukaşenko xarici mediaya açıqlamasında deyib.
O bildirib ki, bununla bağlı heç bir zərurət olmayıb: “Bu, Luqans, Donetsk və Krıma əlavə heç nə verməyəcək. Ancaq Luqansk, Donetsk və Krıma yemək, kərpic, sement lazım olsa, biz onlara kömək edəcəyik. Lazım olacaqsa, tanıyacağıq - əgər bu, hansısa məna kəsb etsə. Ancaq bu gün tanıyıb-tanımamaq heç bir məna kəsb etmir. Biz faktiki olaraq onlarla əməkdaşlıq edirik. Necə ki, siz əslində Ukrayna ilə əməkdaşlıq edirsiniz və artıq Ukraynanı hissələrə bölmüsünüz. Siz fransızlar, məncə, Kiyev vilayətini bərpa etmək istəyirsiniz? Yəni siz artıq Ukraynanı parçaladınız və bərpa edəcəksiniz. Mən də Luqanska və Donetskə kömək edəcəyəm. Krıma kömək edəcəyəm. Biz onlarla əməkdaşlıq edirik, bunu gizlətmirik. Başqa sözlə, de-fakto Krım, Luqansk və Donetski tanımışıq. Ona görə ki, onlarla əməkdaşlıq edirik. Bütün bunlar boş söhbətdir: “Lukaşenko niyə onu tanıdı, bunu tanımadı. Lazımdırsa – prezident sərəncamı ilə tanıyacam. Əgər lazım olsa. Amma indi bu əlavə heç nə gətirmir. Bu, təxminən “Lukaşenko Ukraynada vuruşacaq, ya yox” söhbətlərinə bənzəyir. Tutaq ki, mən Rusiyanın Ukraynadakı əməliyyatına qoşuldum. Mən buna nəsə əlavə edəcəm? Yox. Silahlarımız Rusiyadakı kimidir. Onların hərbçiləri vuruşmaq üçün kifayət qədərdir. Biz orda sadəcə lazım deyilik”.
Lukaşenkonun Donbas respublikalarının müstəqilliyini tanımamaqla bağlı gətirdiyi arqumentləri əsaslı saymaq olarmı?
Politoloq Rəşad Bayramov “Bakı-Xəbər”ə açıqlamasında bildirdi ki, Lukaşenkonun bu tonda çıxışı yaranmış real situasiyaya tam adekvatdır:
“Ukrayna ilə müharibəyə başlayandan sonra BMT-də bu məsələ ilə bağlı səsvermələr olub. Müharibənin ilkin mərhələsində Rusiyanı səsvermədə dəstəkləyən ölkələrin sayı qısa müddət sonra yarıya qədər azaldı. Belarus prezidentinin özünün də ritorikası fərqlənməyə başlayıb. Əvvəl hətta Belarus Ukrayna ərazisinə hücum da etdi. Lukaşenko bunu etiraf etdi və dedi ki, belə bir “xüsusi əməliyyat” keçiriblər. Əslində isə bu, başqa ölkənin ərazisinə edilən hücum idi. Yəni əvvəlki mərhələdə Ukrayna ilə açıq müharibəyə girən ölkə rəhbəri indi özünü ehtiyatlı aparır. Belarus prezidenti bildirib ki, rəsmi Minsk Rusiyanın Ukraynadakı xüsusi hərbi əməliyyatının təcrübəsini nəzərə alaraq, ordusunu silahlandırmaq prinsiplərinə fərqli nəzər salır.
Lukaşenko deyib ki, Belarus Rusiyanın Ukraynadakı xüsusi hərbi əməliyyatının təcrübəsi əsasında öz qoşunlarını inkişaf etdirmək və təchizat baxımından dərs alır. Belarusun şimal cəbhəsindən Ukraynaya daxil olmaq məsələsi və KTMT vasitəsilə bu prosesdə iştirakı gözlənilirdi. Ancaq sonra Lukaşenko bundan imtina etdi. Yəqin ki, bu və ya gələn ay Belarus müharibəyə qoşulmasa, anti-Rusiya ritorikasına keçən Lukaşenkonu Rusiya cəbhəsində tapmaq mümkün olmayacaq. O həqiqətən də çevik siyasətçidir. Belarus prezidenti Rusiyanı istənilən anda və istənilən mərhələdə tək qoya bilər. Putin də bunu yaxşı bilir. Odur ki, Belarusu indidən müharibəyə cəlb etmək istəyirlər. Buna görə də, Lukaşenko KTMT-dəki digər ölkələrin də açıq şəkildə onlara dəstək ifadə etməsini tələb edir. Lukaşenkonun Donbasdakı qondarma respublikaları tanımamağının başlıca səbəbi onun gətirdiyi arqumentlərlə bağlı deyil. O bunu özü üçün son ayaq yeri kimi saxlayır. Buradan görünür ki, Lukaşenko Rusiyaya çox da etibar etmir”.
Məhəmmədəli QƏRİBLİ
