“Onlar parlamentin bəzi üzvlərinin cəhdlərinə baxmayaraq, Avropanı Azərbaycandan və Azərbaycanı Avropadan təcrid etməyin mümkün olmadığını bilməlidirlər”.
Bunu Prezident İlham Əliyev Avropa Parlamentinin Xarici Əlaqələr Komitəsinin sədri Devid MakAlisterin başçılıq etdiyi nümayəndə heyətini qəbul edərkən deyib.
Ölkə başçısının sözlərinə görə, əfsuslar olsun ki, bir çox Avropa parlamentariləri heç bir əsas olmadan bizi hücuma məruz qoyublar: “Beləliklə, vəziyyət belədir. Biz real dünyada yaşayırıq, bu bizim seçimimiz deyil. Siz mənim mövqeyimi bilirsiniz. Mənim mövqeyim 2017-ci ildə sonuncu görüşümüzdən bəri dəyişməyib. Biz Avropa ilə yaxın münasibətlər qurmaq istəyirik və bizim bütün etdiklərimiz, o cümlədən indicə qeyd etdiyim əməkdaşlığın nəzərəçarpan əlamətləri bunu nümayiş etdirir. Lakin Avropa Parlamenti belə bir yol seçməyi düşünürsə, bu onların seçimidir. Amma onlar parlamentin bəzi üzvlərinin cəhdlərinə baxmayaraq, Avropanı Azərbaycandan və Azərbaycanı Avropadan təcrid etməyin mümkün olmadığını bilməlidirlər”.
Prezidentin bu fikirləri həm də müəyyən dairələrə xəbərdarlıq kimi dəyərləndirilməlidir. O mənada ki, bəzi qüvvələr nə qədər cəhd etsələr də, Azərbaycanı Avropadan təcrid edə bilməyəcəklər.
“Qurumun müəyyən üzvləri Azərbaycanı Avropadan təcrid etməyin mümkün olmadığını bilməlidir”
Məsələyə münasibət bildirən “SƏS” Media Qrupunun rəhbəri, politoloq Bəhruz Quliyevin fikrincə, Azərbaycan Avropanın ayrılmaz parçasıdır: “Azərbaycan Avropa məkanının ayrılmaz parçasıdır və bunu ehtiva edən bir sıra amillər mövcuddur. Azərbaycanın Avropa İttifaqı ilə ikitərəfli əməkdaşlığı, eləcə də bu əməkdaşlığın strateji tərəfləri bütün bunları kifayət qədər sübut edir. Xüsusilə, bu gün Avropa məkanının enerji təhlükəsizliyinin, eləcə də təminatının əsas faktorlarından hesab edilən Azərbaycanla Aİ arasındakı münbit münasibətlər qarşıdakı illərə daha geniş, daha pesrpektivli yollar açır. Ölkəmizə rəsmi səfər edən Avropa Komissiyasının Prezidenti Ursula Fon der Lyayenin Prezident İlham Əliyevlə görüşündə də bu kimi məsələlərə toxunması habelə Azərbaycan ilə Avropa İttifaqı arasında “Azərbaycan Respublikası ilə Avropa Komissiyası tərəfindən təmsil olunan Avropa İttifaqı arasında enerji sahəsində Strateji Tərəfdaşlığa dair Anlaşma Memorandumu”nun imzalanması da qeyd edilənləri isbatlayır. Eyni zamanda, Avropa İttifaqının (Aİ) Cənubi Qafqaz və Gürcüstan böhranı üzrə Xüsusi Nümayəndəsi Toivo Klaarın Azərbaycana səfəri və səfər çərçivəsində dövlət başçımızla görüş keçirməsi, ölkəmizin Cənubi Qafqaz regionunda liderlik mövqeyini təsdiqləməsi də belə deməyə zəmin yaradır ki, bütövlükdə Azərbaycan Avropa İttifaqı üçün çox mühüm dost və eyni zamanda strateji partnyordur”.
B.Quliyev hesab edir ki, Aİ-nin Azərbaycana bu qədər önəm verməsinə rəğmən, Avropada mövcud olan digər təşkilatlar yanlış düşüncə tərzində formalaşıblar: “Buna misal kimi Avropa Parlamentini göstərmək olar. Əbəs deyil ki, Prezident İlham Əliyev Avropa Parlamentinin Xarici Əlaqələr Komitəsinin sədri Devid MakAlisterin başçılıq etdiyi nümayəndə heyətini qəbul edərkən də bir sıra xatırlatmalar etdi. Xüsusilə bildirdi ki, Avroparlament nümayəndələri Azərbaycana sonuncu dəfə 2017-ildə səfər ediblər və bu baxımdan, hazırkı səfər barədə məlumat veriləndə cənab İlham Əliyev təəccüb hissi keçirib. Eyni zamanda, bu qurum davamlı olaraq Azərbaycan əleyhinə qərarların qəbul olunmasında necə deyərlər, canfəşanlıq göstəriblər. Burada Avroparlamentin ayrı-ayrı şəxsləri öz maraqlarını gizlətməyiblər. Ona görə də, dövlətimizin başçısı vurğuladı ki, Avroparlamentin müəyyən üzvləri Azərbaycanı Avropadan təcrid etməyin mümkün olmadığını bilməlidirlər. Təbii ki, dünyadakı demokratik düşüncə tərzinin mövcudluğunu xatırlasaq bu zaman hər kəsin öz seçimində azad olduğunu da deyə bilərik. Prezident İlham Əliyev məhz bu incə məqama toxunması ilə sebut etdi ki, Azərbaycan üçün hər hansı qeyri-səmimi qurumun necə davranış sərgiləməsi naratahlıq doğurmur. Belə ki, Azərbaycan Avropa İttifaqı, Avropa Şurası və s. avroqurumlarla sıx təmaslarını qurur, inkişaf etdirir. Yaxşı olardı ki, Avropa Parlamenti də hər hansı qeyri-ciddi siyasi mənfəətlər güdməkdənsə həqiqət yolunu seçsin. Hadisələrə doğru-dürüst münasibət sərgiləsin. Avropa Parlamentindəki bəzi dairələr Azərbaycanın Avropa məkanının bir parçası olduğunu, Azərbaycanın Aİ ilə sıx münasibətlərinin strateji əməkdaşlığa qədər inkişaf etdiyini dərk etməlidir”.
Bir sözlə, politolq hesab edir ki, qərəzli yanaşmalara son qoyulmalıdır.
Vidadi ORDAHALLI
