“Erməni tərəfi substantiv danışıqlara həmişə hazırdır və Azərbaycan belə siyasi iradə göstərsə, təbii ki, biz daha sürətlə irəliləyəcəyik”. Bunu Ermənistan Təhlükəsizlik Şurasının katibi Armen Qriqoryan bildirib.
O, Ermənistan İctimai Televiziyasına müsahibəsində delimitasiya ilə bağlı ikinci görüşün gecikməsini belə əsaslandırıb: “Rəsmi İrəvan Ermənistan-Azərbaycan münasibətlərinin gündəminin sürətlə irəliləməsi üçün fəaliyyətini davam etdirir. Mən deməzdim ki, bu, dalana dirənib, çünki delimitasiya ilə bağlı ilk görüş baş nazirin müavinləri səviyyəsində keçirilib və hər iki tərəf bu görüşü müsbət qiymətləndirib. Növbəti görüş Moskvada, daha sonra Brüsseldə keçiriləcək. Ümid edirik ki, görüşlə bağlı razılıq ən qısa zamanda əldə olunacaq. Siz də bilirsiniz ki, baş nazirin müavinləri bu yaxınlarda Sankt-Peterburqda görüşdülər və ümumilikdə öz mövqelərini mümkün qədər yaxınlaşdırmağa çalışdılar. Hesab edirəm ki, bununla bağlı bizdə müsbət impuls və irəli getmək üçün imkanlar var. Ermənistan danışıqlara hazırdır və Azərbaycan tərəfdən belə siyasi iradə olarsa, daha sürətlə irəliləmək mümkün olacaq. Erməni tərəfi substantiv danışıqlara həmişə hazırdır və Azərbaycan belə siyasi iradə göstərsə, təbii ki, biz daha sürətlə irəliləyəcəyik”.
Qriqoryan həmçinin yaxın vaxtlarda onunla Hikmət Hacıyev arasında görüşün baş tutacağına ümid etdiyini bildirib: “Bu görüş və digər məsələlər müzakirə olunur... Ümid edək ki, yaxın vaxtlarda sülh müqaviləsi mövzusunda əsaslı görüşlər olacaq və biz irəliyə gedə biləcəyik, xarici işlər nazirlikləri bu istiqamətdə işləyirlər”.
Görünən odur ki, Qriqoryan sərhəd görüşünün gecikməsini Azərbaycanın üstünə yıxmağa çalışır. Guya ki, Azərbaycanın günahı üzündən görüş gecikir.
“Qriqoryan Bakını ittiham etməkdənsə, öz ölkəsinin aqibətinin...”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, A.Qriqoryanın dəyərləndirməsi reallığı əks etdirmir: “Fakt budur ki, sərhədlərin delimitasiyası prosesinin geckdirilməsində əsas günahkar məhz Ermənistan tərəfidir. Hələ bir müddət əvvəl Ermənistan rəsmiləri bəyan edirdilər ki, rəsmi Bakının irəli sürdüyü beş təklifi qəbul ediblər və bu təkliflərin realizəsi üçün sadəcə prosesə başlamaq lazımdır. Deyərdim ki, hazırkı dövrə qədər baş nazir müavinlərinin görüşlərinin keçirilməsi hələ prosesin başlanması anlamını daşımır və əslində şərtlərin reallaşdırılması istiqamətində konkret addımların atılmasına ehtiyac var. Əvvəlcə Moskvada, daha sonra isə Brüsseldə gözlənilən görüşlərə qədər nəticəli qərarlar qəbul etməyin zamanıdır. Əbəs deyil ki, buna qədər Prezident İlham Əliyev bir neçə dəfə Bakının uzunmüddətli səbr, təmkin nümayiş etdirməyəcəyini bəyan edib. Ortada qəbul olunmuş bəyanat və həmin bəyanatın icra mexanizmlərini şərtləndirən bəndlər, müddəalar mövcuddur. İrəvanın həmin bəndlər üzrə hərəkət etməkdən başqa çıxış yolu da qalmayıb. Prosesin uzadılması isə, söz yox ki, Ermənistana baha başa gələ bilər. Yaxşı olardı ki, Ermənistan rəhbərliyi üçüncü qüvvələrin təhriklərinə getməsin və Azərbaycanı ittiham etmək yerinə, üzərinə götürdüyü öhdəlikləri yerinə yetirsin. Əks halda məsuliyyət bir daha rəsmi İrəvanın və onun hərbi-siyasi dairələrinin üzərində olacaq”.
B.Quliyevin fikrincə, Qriqoryanın Azərbaycanın siyasi iradə nümayiş etdirməklə substantiv danışıqlara getməli olduğunu iddia etməsi isə sadəcə istehzalı gülüş doğurur: “Azərbaycan 20 ay əvvəl öz qətiyyətli iradəsini nümayiş etdirib və Ermənistanı diz çökdürməklə ona kapitulyasiya sənədini imzaladıb. Bu adamlar hansı “iradədən” danışırlar ki, onlar 44 günlük müharibədə öz iradəsizliklərini ortaya qoydular? Hesab edirəm ki, gerçəyə qalanda onlar özlərində təpər tapmaqla imzalarına hörmət göstərməlidirlər. Əks halda, biz bir daha və bu dəfə Qərbi Zəngəzur adlı tarixi ərazilərimizdə sərhədlərin dəqiqləşdirilməsinin birtərəfli qaydada həyata keçiriləcəyini müşahidə edəcəyik. Və Azərbaycan tərəfi buna hazır olduğunu dəfələrlə bəyan edib. Qriqoryan Bakını ittiham etməkdənsə, öz ölkəsinin aqibətinin daha ağır vəziyyətə düçar olması barədə düşünsəydi heç də pis olmazdı. Çünki Bakı da öz prinsipial mövqeyini istər Brüsseldə, istərsə də Moskvada daha əvvəldən bəyan edib. İrəvanın isə nala-mıxa döyəcləməsi boş dəyirman səsindən başqa bir şey deyil”.
Bu baxımdan politoloq hesab edir ki, Ermənistan delimitasiya və digər məsələlərdə konkret addımlar atmalıdır.
Vidadi ORDAHALLI
