Ermənistan Təhlükəsizlik Şurasının katibi Armen Qriqoryan İran İslam Respublikasının Ali Milli Təhlükəsizlik Şurasının katibi Əli Şamxani ilə görüşüb. Təhlükəsizlik Şurasının məlumatına görə, tərəflər iki ölkə arasında çoxsahəli əməkdaşlığın sabit inkişaf tendensiyasını vurğulayıb və bu kontekstdə ikitərəfli iqtisadi əməkdaşlığın vacibliyini qeyd ediblər.
Ermənistan-İran iqtisadi əlaqələri və konkret olaraq Sünik şəhərinin inkişafı kontekstində İranın Çabahar limanının əhəmiyyəti xüsusi vurğulanıb. Hər iki tərəf Mehri azad iqtisadi zonası və Şimal-Cənub yol dəhlizi çərçivəsində əməkdaşlığı davam etdirməyə hazır olduğunu yüksək qiymətləndirib. Armen Qriqoryan Ermənistan-Azərbaycan münasibətlərinin nizamlanması prosesini təqdim edərək, bu prosesdə “dəhliz məntiqi” ilə heç bir məsələnin müzakirə olunmadığını vurğulayıb. Əli Şamxani qeyd edib ki, bu kontekstində dövlətlərin ərazi bütövlüyü və sərhədlərinin toxunulmazlığı prinsiplərinə əməl edilməlidir. Şamxani bildirib ki, ölkəsi Ermənistanla əlaqələrin inkişafında və gücləndirilməsində maraqlıdır. O, regionda geosiyasi vəziyyəti dəyişmək cəhdlərinin qəbuledilməz olduğunu bildirib və İranın dövlətlərin ərazi bütövlüyü və suverenliyi çərçivəsində infrastrukturların blokdan çıxarılması prosesini dəstəklədiyini vurğulayıb. Maraqlıdır, “regionda geosiyasi vəziyyəti dəyişmək cəhdlərinin qəbuledilməz olduğunu” deyəndə İran rəsmisi nəyi nəzərdə tutur?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, İranın bu yöndə verdiyi açıqlamadan müəyyən nəticələr çıxarmaq mümkündür: “Bilirik ki, son vaxtlar Qərb və ABŞ-ın İrana qarşı basqıları daha da güclənib. İran böyük neft ixracatçısı kimi ciddi embarqo ilə üzləşib. Son günlər tətbiq edilən sanksiyalar isə İranın vəziyyətini daha da pisləşdirmiş olacaq. Ancaq bu fikirin harada səslənməsi də önəmlidir. Qonşu ölkənın rəsmisi bu fikri Ermənistanın baş naziri ilə görüşdə səsləndirib. Azərbaycan 44 günlük müharibədən sonra bölgədə yeni reallıqlar yaradıb. Yaxşı olardı ki, bütün qonşu ölkələr bu reallıqları qəbul edəydi. Bu reallıqlar bölgəyə sülh və təhlükəsizlik, yeni iqtisadi imkanlar, bölgə ölkələrinin inteqrasiyasının dəyişməsini vəd edir. Yəni bütün bunların yalnız bizə yox, həm də qonşularımıza xeyri var. Azərbaycana qarşı 30 il ərzində yönələn separatizmin, terrorun kökünü kəsmişik. Yox əgər hansısa qonşu ölkə bununla barışmaq istəmirsə, deməli, regionda sülhün bərqərar olmasında maraqlı deyillər. Həmin ölkələr gərginliyin qalmasında maraqlıdırlar. Ermənistandakı revanşist qüvvələr də yeni reallıqları qəbul etmirlər. Azərbaycanla sülh müqaviləsinin bağlanması bu amillərə görə uzanır. Hələ də Ermənistan ərazimizdə olan qanunsuz silahlıə birləşmələri çıxara bilmir. İranın bu mövqeyini kökündən yalnış sayıram. Yaxşı olardı ki, İran rəsmisi Ermənistanın üzərinə götürdüyü öhdəliklərə əməl etməyə çağırsın. Təəssüf ki, bunu görmürük. Əslində, İran daha çox əminamanlığın olmasına çalışmalıdır. Çünki bütün dünya tərəfindən təcrid edilən ölkədir”.
Münaqişədən sonra imzalanmış üçtərəfli sənədlərdə regionda yaranmış yeni reallıqlar öz əksini tapır, sülh və sabitliyin bərqərar olması və əməkdaşlığın qurulması üçün vacib şərtlər göstərilir. Azərbaycan tərəfi öz öhdəliklərini vaxtında və lazımi səviyyədə yerinə yetirir, lakin təəssüflər olsun ki, Ermənistan tərəfi hələ də bu şərtlərə adekvat cavab vermir, bütün cəhdləri ilə üçtərəfli razılaşmaların yerinə yetirilməsinə mane olur.
İran və Ermənistan hələ də anlamır ki, artıq bütün dünya Azərbaycanın yaratdığı yeni reallıqları qəbul edib. İstənilən təxribatçı mövqe, regionda dayanıqlı sülhün əldə olunması yolunda yaradılan əngəllər dünya birliyi tərəfindən qəbul olunmur.
Məhəmmədəli QƏRİBLİ
