Azərbaycanda söz və məlumat azadlığının, plüralizmin inkişaf etdirilməsi sahəsində mətbuatın rolu çox böyükdür. Müasir medianın inkişafına, maliyyələşməsinə dövlət tərəfindən dəstək göstərilir. Bu danılmaz faktdır. Ancaq çap mediaya iş adamlarının, sahibkarların dəstəyi lazımi səviyyədə deyil.
Xatırladaq ki, başda Hacı Zeynalabdin Tağıyev olmaqla, bizim böyük milyonçularımız çap mediasına dəstək göstəriblər. Onlar bu dəstəyi milli mənafe, milli maraqlar naminə verməyi miras qoyublar. Xeyriyyəçilər çap mediaya dəstəyi tək qazanc məqsədi ilə etməyiblər. Onlar dilimizi, mədəniyyətimizi, milli mənafeyimizi qorumaq məqsədilə çap mediaya dəstək göstərirdilər.
Nəzərə almaq lazımdır ki, müasir dövrdə çap mediaya böyük ehtiyac var. Dövlətin də çap mediaya ehtiyacı var. Belə olan halda yaxşı olar ki, iş adamları milli manefənin inkişafı baxımından çap mediaya dəstək olsunlar.
Qeyd edək ki, MEDİA Agentliyinin şöbə müdiri Natiq Məmmədli bir neçə gün əvvəl AzTV-nin “Çıxışa doğru” proqramında medianın reklam bazarı ilə bağlı fikir bildirib. N.Məmmədli qeyd edib ki, reklam yalnız bir məhsulun tanıdılması kimi başa düşülməməlidir, burada məsələnin sosial tərəfləri var: “Hacı Zeynalabdin Tağıyev 1897-ci ildə 57 min rubl verib “Kaspi” qəzetini alanda məgər ondan gəlir əldə etmək istəyirdi? Bizim milli burjuaziya Rəsulzadənin, Ağaoğlunun, Əli bəy Hüseynzadənin “Tərəqqi”, “İrşad”, “Həyat” qəzetlərinə gəlir əldə etmək üçün pul ayırırdı? Onların məqsədi pul qazanmaq idi? Milli mətbuata dəstək milli maraqlarımıza olan dəstəkdir. Məsələyə bu aspektdən yanaşmaq lazımdır”.
İş adamları çap mediasına pul ayırmaqla qazanc deyil, milli mənafeyə xidmət və dəstək anlamında yardım etdiyini düşünməlidirlər. Nəzərə almaq lazımdır ki, çap mediasına dəstək dilimizə, dilimizin qaydalarının qorunması, jurnalistika prinsiplərinin qorunub saxlanılması deməkdir.
Akif Aşırlı: “İndi sahibkarlıqla məşğul olan şəxslərin tək düşüncəsi öz kapitallarını qoruyub inkişaf etdirməkdir”
“Şərq” qəzetinin baş redaktoru Akif Aşırli “Bakı-Xəbər”ə açıqlamasında qeyd etdi ki, Hacı Zeynalabdin Tağıyev, Bəşir bəy Aşurbəyov, Murtuza Muxtarov kimi düşüncədə olan sahibkarlar indi yox səviyyəsindədir: “İndi sahibkarlıqla məşğul olan şəxslərin tək düşüncəsi öz kapitallarını qoruyub, inkişaf etdirməkdir. Ancaq böyük ziyalılarımız cəmiyyətin inkişafı, maarifli olması üçün vəsait ayırırdılar. Xeyriyyəçilər qəzetin bütövlükdə çap xərcini həyata keçirirdi. Onları qazanc deyil, milli manefə düşündürürdü. Təəssüf ki, belə bir hal indi yoxdur”.
Həmsöhbətimiz qeyd etdi ki, çap mediası qorunub, saxlanılmalıdır. Çap mediası jurnalistikanın təməli deməkdir: “Mətbuatın dili, janrı, yazı üslübü, forması və digər qaydalar çap mediasının üzərindədir. Çap medianın inkişafı üçün bu sahəyə diqqət göstərilməlidir. Təəssüf ki, Hacı Zeynalabdin Tağıyev, Bəşir bəy Aşurbəyov, Murtuza Muxtarov kimi şəxslərin vaxtilə çap mediaya göstərdiyi münasibəti indiki iş adamları etmir. Iş adamlarını ancaq özlərini bu günü maraqlandırır”.
İlham Quliyev: “Bu gün özəl sektorun, iş adamlarının çap mediasına dəstəyi, demək olar ki, yox səviyyəsindədir”
“Kaspi” qəzetinin baş redaktoru İlham Quliyev qəzetimizə açıqlamasında bildirdi ki, bu gün özəl sektorun, iş adamların çap mediasına dəstəyi, demək olar ki, yox səviyyəsindədir: “Bu danılmaz faktdır. Bəli, əsrin əvvəlində Bakı milyonçuları çap mediasına xüsusi dəstək göstərirdilər. Amma gəlin etiraf edək ki, zaman həmin zaman deyil. Bu gün çap mediasının iş adamlarından kömək ummaq üçün imkanları çox məhduddur. Çünki bu gün çap mediasının ictimai rəyə təsiri son dərəcə azalıb. Qəzetlərin tirajı inanılmaz dərəcədə aşağı düşüb. Qəzetlər kollektivlərini qoruyub saxlamaq üçün əllərindən gələni etsələr də, buna tam nail ola bilməyiblər. Ötən əsrin əvvəlləri ilə müqayisədə hazırda medianın texnoloji növləri peyda olub və onlar media sektorunda aparıcı mövqeləri ələ keçiriblər.
Düşünürəm ki, indi əsas hədəf çap mediasının qorunub saxlanması olmalıdır. Bu istiqamətdə lokomotiv rolunu dövlət oynamalıdır. İnsaf naminə, dövlət son illər Media Agentliyinin vasitəsilə bu dəstəyi göstərməyə çalışır. Gəlin etiraf edək ki, dövlət dəstəyi olmasaydı, bu gün Azərbaycanda çap mediası nümunəsinə rast gəlmək mümkün olmazdı. Son illər təbii seçmə vasitəsilə dövlət tərəfindən maliyyələşdirilən çap mediası subyektlərinin sayı da xeyli azalıb. Hesab edirəm ki, dövlət qarşıdakı illərdə özünü qoruyub saxlaya bilən, tarixi keçmişi olan maraqlı çap mediası nümunələrinə diqqəti bir qədər də artırmalıdır. Elə etmək lazımdır ki, Azərbaycanda normal əməkhaqqı alan yaradıcı kollektivi, geniş texniki imkanları olan, gözəl dizaynla çap olunan qəzetlər yaşadılsın. Bunu formalaşdıra bilsək, ümid edirəm ki, gələcəkdə iş adamlarının, biznes dünyasının da çap mediasına dəstəyini hiss etmiş olacağıq”
Günel CƏLİLOVA
