Təhlükəsizlik Şurasının katibi Armen Qriqoryan İrəvanda iranlı həmkarı Əli Şamxani ilə görüşərək bir sıra məsələləri müzakirə edib. Danışıqlar zamanı tərəflər ikitərəfli və regional mövzuların geniş spektrini nəzərdən keçirib.
A.Qriqoryan görüşdə müharibədən sonrakı regionda nəqliyyat kommunikasiyalarının açılması perspektivinə toxunaraq qeyd edib ki, Ermənistanla Azərbaycan arasında aparılan danışıqlar prosesində “dəhliz” məntiqində heç bir məsələ müzakirə olunmur. Qriqoryan və Şamxani Mehri Azad İqtisadi Zonası və Şimal-Cənub nəqliyyat dəhlizi çərçivəsində əməkdaşlığı davam etdirməyə hazır olduqlarını bildiriblər. Ermənistan-İran iqtisadi əməkdaşlığı və qonşu ölkənin sərhəd Sünik bölgəsinin inkişafı fonunda Əli Şəmxani İranın cənub-şərqində (Sistan və Bəlucistan əyalətləri) Çabahar limanının əhəmiyyətini vurğulayıb.
Ermənistan rəsmiləri sanki İranı əmin edirlər ki, narahat olmayın, dəhliz olmayacaq. Bir tərəfdən regional kommunikasiyalardan danışırlar, o biri tərəfdən də dəhlizi inkar edirlər.
“Dəhlizin açılmasını dünyada baş verən yeni siyasi reallıqlar diqtə edir”
Məsələyə münasibət bildirən AMİP-in sədr müavini Afsəddin Nəbiyevin fikrincə, bütün bunlar Ermənistanın əsil simasını göstərir: “Əslində erməni siyasətçilərinin bir-birini təkzib edən açıqlamaları bizim üçün təəccüblü deyil. Uzun illər mifoloji təsəvvürlərlə bəslənmiş erməni siyasətçilər Azərbaycan Ordusu tərəfindən acı məğlubiyyətə düçar olduqdan sonra regionun gələcəyi ilə bağlı heç bir aydın təsəvvürə malik deyillər. Qriqoryanın bu açıqlaması erməni cəmiyyətində revanşist qüvvələrin sakitləşdirilməsinə hesablanıb. Onsuz da bu dəhliz nə olursa-olsun mütləq açılacaq. İstər beynəlxalq hüquq baxımından, istərsədə regionun təhlükəsizliyi və gələcək inkişafı baxımından bu dəhliz mütləq mənada işə düşəcək. Bunu eyni zamanda dünyada baş verən yeni siyasi reallıqlar diqtə edir. Əgər erməni tərəfi bu dəhlizin açılmasına real əngəllər yaratmağa davam edəcəksə, Ermənistanın bir dövlət kimi mövcudluğu sual altında qalacaq. Qaldı ki, İranla Ermənistanın kommunikasiya əlaqələri barədə təsəvvürlərinə, bu məsələdə hər iki dövlət sonunda beynəlxalq güclərin təzyiq mexanizmlərini bilməmiş deyil. Dünyanın belə qarmaqarışıq dövründə Azərbaycan dövləti dünyanın tərəqqipərvər kəsiminin yanında yer almaqla, nəinki regionun, eyni zamanda qlobal sülhün və təhlükəsizliyin təmin olunmasında ən üstün mövqeyə sahibdir. Bu üstünlüklər Azərbaycan dövlətinin regionda təhlükəsizlik arxitekturasını qura bilməsinə şərait yaradacaq. Həm güclü iqtisadiyyatlmız, həm də güclü Ordumuz sayəsində Azərbaycan dövləti sülhə böyük töhfələr verəcək. Erməni siyasətçiləri də artıq anlamağa başlayıblar ki, bu dalandan çlxış imkanları sıfıra bərabərdir. Hərdən populist çağırışlar edərək bu prosesi uzatmağa çalışırlar, ancaq yaxşı dərk edirlər ki, bu işin sonu qalib Azərbaycan dövlətinin xeyrinə baş tutacaq”.
Bu baxımdan sədr müavini hesab edir ki, əvvəl-axır Ermənistan yeni reallıqları qəbul etmək məcburiyyətində qalacaq.
Vidadi ORDAHALLI
