İrəvan yenidən Kremlin qəzəbinə tuş gəlir... Bu dəfə Kanada səfirliyi üzündən...

img

Kanadanın Ermənistanda səfirliyinın açılması istiamətində həyata keçirilən fəaliyyətə Rusiyanın reaksiyası İrəvanda ciddi narazılıq yaradıb. Ermənistanın “Joxovurd” nəşri xatırladır ki, Rusiyanın İrəvandakı səfirliyi Kanadanın Ermənistanda səfirliyinin açılması ilə bağlı bəyanat yayıb.

Nəşr öncə Rusiyanın Ermənistandakı səfirliyinin açıqlamasını təqdim edir: “Kanadanın Ermənistanda səfirliyinin açılması ilə bağlı mətbuatda gedən yazılara diqqət yetirdik. Mətbuat nəşrlərinə görə, Kanada Xarici İşlər Nazirliyinin bunu açıq şəkildə “Rusiya təsirinə qarşı atılan addım” kimi təqdim etməsi çaşqınlıq yaratmasaydı, problemli heç nə olmazdı. Münasibətlərini gücləndirmək istədikləri bir ölkəyə qarşı belə açıq-aşkar aşağılayıcı və hörmətsiz münasibət görmək təəccüblüdür. İstər-istəməz bu xəttin erməni xalqının rifahına necə təsir edəcəyini düşünürsən. Görünür, bu münasibət özünü dünyanın qalan hissəsinə “qızıl milyard” hesab edən ölkələrin hakim elitasına xasdır. Başqa ölkələrə və xalqlara bənzər təkəbbürlü münasibət müasir dünyada baş verən belə faciəvi hadisələr üçün səbəb olur”. Bunun ardınca “Joxovurd” yazır: “Qeyd edək ki, Rusiyanın Ermənistandakı səfirliyi kifayət qədər qəribə bəyanat yayıb. Birinci ondan başlayaq ki, Kanada xarici siyasətini və prioritetlərini özü müəyyənləşdirir. Əgər həmin prioritetlərdə “Rusiya təsirinin məhdudlaşdırılması” məqamı varsa, təbii olaraq bu, Ermənistanda səfirliyin açılması münasibətilə, o cümlədən artıq açılandan sonra həmin səfirliyin fəaliyyəti ilə həyata keçiriləcək. Bu təbiidir. Ermənistan indi nə qədər zəif və “başqasının əlinə baxan dövlət” olsa da, yenə də öz xarici siyasətini aparmaq, öz ərazisində diplomatik nümayəndəlik açmaq istəyən ölkələrə icazə vermək hüququna malikdir”. Ermənistanda hadisələrə belə yanaşma, Rusiyanın mövqeyinə zidd hərəkət Moskvada xoş qarşılanmır. Rus ekspert Sergey Markedonov qeyd edir ki, ABŞ-da, eyni zamanda Kanadada, Avropa İttifaqı ölkələrində “demokratiya” bir dəyər kimi deyil, Rusiyanın təsirini minimuma endirmək vasitəsi kimi qəbul olunmağa başlayıb: “Ermənistanda diplomatik nümayəndəliklərin sayı artıb. Kanada hökuməti İrəvanda səfirlik açmaq qərarına gəlib. Kanadanın xarici işlər naziri Melani Colinin sözlərinə görə, bu addım “iki ölkə arasında əlaqələri gücləndirəcək və Kanadanın Ermənistanda demokratiyaya dəstəyini artıracaq”. Kanadanın xarici siyasət rəhbərinin protokol ifadələrinin arxasında nə gizlənir? Bu, Ottavanın Qafqaz regionunu fəal şəkildə tədqiq etməyə hazırlaşacağı anlamına gəlirmi? Ermənistan XİN İrəvanda Kanada səfirliyinin açılmasını alqışlayır, amma bunu Rusiya diplomatik missiyası haqqında demək olmaz: Rusiya diplomatları öz şərhlərində Ottavanın addımını başqa ölkələrə qarşı təkəbbür  nümayişi adlandırıblar. Onları bu qədər sərt qiymətləndirmələrə vadar edən nədir? Məsələ burasındadır ki, digər xəbərlərlə yanaşı, Kanadanın İrəvanda səfirliyinin açılmasından bəhs edən hökumətin xüsusi press-relizində Kanadanın “Rusiyanın sabitliyi pozan fəaliyyətinə” qarşı müxalifətdə iştirakından bəhs edilir. Nəticədə bu, Rusiyanın özünün xüsusi maraq dairəsi hesab etdiyi regionlarda və ölkələrdə Qərb təsirinin genişlənməsinin ağrılı qəbuludur. Və ən azı narahatlıq üçün əsaslar mövcuddur. Kanada Ukraynaya dəstək verən əsas cəbhəçilərdən biridir. Ottava üçün Ukrayna mövzusunun da daxili siyasi əhəmiyyəti var. Kanada orada yaşayan etnik ukraynalıların sayına görə dünyada üçüncü ölkədir. Təəccüblü deyil ki, 1991-ci ilin dekabrında Ukraynanın müstəqilliyi ilə bağlı referendumdan sonra Ottava ardıcıl olaraq Kiyevi dəstəkləyir. Və təbii ki, onun maraqları rus maraqları ilə toqquşur”.

 Rus politoloq qeyd edir ki, Moskva nümayəndələri heç vaxt və heç yerdə Ermənistanda avtoritarizmi müdafiə etdiklərini iddia etməyiblər: “Sual, həmişə olduğu kimi, vurğu və qavrayışdadır. Yuxarıda qeyd edildiyi kimi, uzun illər ABŞ-da, eynilə Kanadada, Aİ ölkələrində “demokratiya” dəyər kimi deyil, Rusiyanın təsirini minimuma endirmək üçün bir vasitə kimi qəbul olunub. Və Ukraynanın son hadisələrlə bağlı təcrübəsi “demokratiya”nın belə özünəməxsus təfsirinə dair çoxlu nümunələr göstərdi. Bu gün Rusiya və Qərbin o unikal əməkdaşlıq platforması yoxdur, o, Qarabağ nizamlanmasında olub və artıq aradan qalxıb. Kanada kollektiv Qərb tərəzisinə “çəki daşları” əlavə edəcəkmi? Bunu yaxın gələcək göstərəcək”.

“Valday” beynəlxalq debat klubunun direktoru Timofey Bordaçov da hesab edir ki, Ermənistan Qərblə Rusiyanın çəkişmə məkanına çevriləcək: “Qərblə münaqişələr davam edəcək və əlbəttə, Rusiyanı əhatə edən, Ermənistanın da tərkibində olduğu ərazi bütün dünya kimi ümumi münaqişə məkanının bir hissəsi olacaq. Burada biz onu da başa düşməliyik ki, bizim beynəlxalq əlaqələrimiz, ölkələrimizin beynəlxalq əlaqələri daim müharibə kölgəsində, silahlı münaqişənin daimi ehtimalının kölgəsində inkişaf edəcək. Buna hazır olmalıyıq və nailiyyətlərimizi maksimuma çatdırmaq, potensial düşmənlərimizin nailiyyətlərini minimuma endirmək üçün diplomatik, xarici siyasət fəaliyyətlərimizdə həmişə bunun mümkünlüyünü nəzərə almalıyıq”. Bordaçov vurğulayıb ki, Ukraynadakı hazırkı münaqişə yeni dövrün konfliktlərindən biridir. Növbəti belə konflikt məkanının isə məhz Ermənistan olacağı gözlənilir.

Samirə SƏFƏROVA

Peşə etikası

Son xəbərlər