Qərb və Rusiya arasında Ermənistana nəzarət uğrunda rəqabətin son dövrlərdə daha da şiddətlənməsi müşahidə edilir. İrəvan isə bu mübarizədə heç bir rola malik deyil. Elə bu səbəbdən Ermənistanın Qərb-Rusiya toqquşmasının yeni məkanına çevrilmə ehtimalı artır.
Qeyd edilənlərin növbəti təsdiqi Kanadanın Ermənistanda səfirliyinin açılması ilə bağlı cərəyan edənlər fonunda özünü qabarıq büruzə verdi. Bu günlərdə Kanadanın xarici işlər naziri Melani Coli bildirib ki, ölkəsi Ermənistanda diplomatik korpus açır: “Bu, ölkələrimiz arasında əlaqələri gücləndirəcək və Kanadadan Ermənistana demokratiya dəstəyini artıracaq”. Ermənistanın xarici işlər naziri Ararat Mirzoyan məsələ ilə bağlı bildirib: “Biz Kanadanın Ermənistanda daimi səfirlik açmaq qərarını alqışlayırıq. Bu, ümumi dəyərlərə əsaslanan ikitərəfli əməkdaşlığımızı daha da gücləndirəcək Ermənistan-Kanada münasibətlərinin mütərəqqi inkişafında növbəti mərhələdir”. Qeyd edək ki, bu, Kanadanın Cənubi Qafqazda ilk rezident səfirliyidir. Amma səfirliyin açıllması ilə bağlı proseslər və verilən açıqlamalar Rusiyanın narazılığına yol açıb. Belə ki, Rusiyanın Ermənistandakı səfirliyi Kanadanın Ermənistanda səfirliyinin açılması ilə bağlı açıqlamaya sərt münasibət bildirib. Bu xüsusda verilən açıqlama Rusiya səfirliyinin “Facebook” səhifəsində yerləşdirilib və orada deyilir: “Kanadanın Ermənistanda səfirliyinin açılması ilə bağlı mətbuatda gedən xəbərə diqqət yetirdik. Hər şey yaxşı olardı, amma təəccüblüdür ki, bu addım, mediaya görə, Kanada Xarici İşlər Nazirliyi tərəfindən vicdanla, o cümlədən “Rusiya təsirinə qarşı mübarizə” kontekstində təqdim edilib. Dövlətə qarşı bu cür açıq-aydın təkəbbürlü və nifrətli münasibət təəccüb doğurur. İstər-istəməz fikirləşirsən ki, belə bir xətt erməni xalqının rifahına, təhlükəsizliyinə necə təsir edəcək. Bu süjet özünü “qızıl milyardlar” sırasına daxil edən həmin dövlətlərin hakim dairələrinin dünyanın qalan hissəsini qavramasının göstəricisidir. Müasir dünyada baş verən bir çox faciəli hadisələrin kökündə başqa ölkələrə və xalqlara qarşı bu təkəbbürlü münasibət dayanır”.
Beləliklə, Kanadanın Ermənistanda səfirliyinin açılmasının əsas məqsədlərindən biri burada Rusiya təsirinə qarşı mübarizədir. ABŞ-ın, Avropanın diqqəti fonunda erməni cəmiyyəti daha çox Qərbə inteqrasiyadan bəhs edir. Hətta İrəvanda keçirilən bir sıra aksiyalarda Rusiya əleyhinə çıxışlar edilir və şüarlar səslənir. Xatırladılır ki, Ermənistanın indiki baş naziri Nikol Paşinyan hakimiyyətə gəlməzdən əvvəl parlamentdə müxalif deputat kimi dəfələrlə Avrasiya İqtisadi İttifaqı və Kollektiv Təhlükəsizlik Müqaviləsi Təşkilatına qarşı çıxış edib, İrəvanın bu qurumlardan çıxmasının parlamentdə müzakirə olunması təklifini irəli sürüb. Ermənistan cəmiyyəti Rusiyadan çox Qərbə üstünlük verir. 44 günlük müharibədən sonra Nikol Paşinyanın partiyasının yenidən üstünlük qazanması onu da göstərdi ki, Qarabağ Ermənistan cəmiyyətinə lazım deyil. Deməli, Rusiyanın Qarabağ kartı ilə Ermənistana təsir imkanları azalıb. Bu şəraitdə Kreml Rusiyayönlü qüvvələrdən faydalanmağa çalışır. Rusiyayönümlü qüvvələrin Avropa İttifaqının Ermənistandakı ofisi qarşısında etiraz aksiyası keçirməsini Ermənistan cəmiyyəti Kremlin sifarişi hesab edir. Ermənilər bunu onunla izah edirlər ki, əks halda Serj Sarkisyanın Respublikaçılar Partiyası, Robert Köçəryana bağlı qüvvələr ön sıralarda olmazdı. Qeyd edək ki, Ermənistan müxalifətinin “Müqavimət” hərəkatının tərəfdarları yenidən Avropa İttifaqının Ermənistandakı nümayəndə heyətinin fəaliyyətini tənqid ediblər. Müxalifət nümayəndələri Avropa İttifaqının Ermənistandakı nümayəndə heyətinin rəhbəri Andrea Viktorinin Paşinyan hakimiyyətinin antidemokratik hərəkətlərini ört-basdır etdiyini bəyan edib, Avropa İttifaqının Ermənistandakı ofisi yaxınlığında keçirilən etiraz aksiyası zamanı qurumun fəaliyyətini sərt şəkildə tənqid ediblər. Nümayişçilər İrəvandakı etirazlar zamanı həbs olunan fəalların fotoşəkilləri, həmçinin Viktorinin Ali Məhkəmə Şurasının keçmiş rəhbəri Qaqik Cahangiryanla birgə olan fotosunun əks olunduğu plakatla Avropa İttifaqının ofis binasına gəlib, “Ayıb olsun!” şüarları səsləndiriblər. Erməni deputat Qeqam Manukyan bildirib: “Avropa İttifaqı Ermənistandakı bütün qanunsuz hərəkətlərə və siyasi təqiblərə göz yumur, Viktorinin susması sayəsində bu bina biabırçılıqların tüğyan etdiyi məkana çevrilib. Nümayəndə heyətinin rəhbərliyi təcili dəyişdirilməlidir ki, struktura münasibətdə dəyişikliklər olsun”. Ermənistandakı rusiyapərəst qüvvələr Avropa İttifaqı səfirinə ona görə üz tutublar ki, o, indiki hakimiyyətlə əməkdaşlıq edir və məhz ona görə Andrea Viktorini onlara “xidmət etməkdə” ittiham olunur. Rusiyayönlü qüvvələr qorxu içindədirlər ki, Ermənistan Rusiyanın təsir orbitindən çıxa bilər. Cəmiyyətdə böyük əksəriyyət də bunu istəyir. Beləliklə, Qərblə Rusiya arasında qalan bir ölkə kimi Ermənistan müəmmalı durumdadır və belə görünür, onlar arasında çəkişmə məkanı olaraq əzilməkdə davam edəcək.
Samirə SƏFƏROVA
