Əliyev Baydenə məktubunda bölgənin taleyi üçün ABŞ-dan önəmli gözləntiləri gündəmə gətirdi...

Qabil Hüseynli: “Azərbaycan dövlətinin əsl niyyətlərini çox aydın və başa düşüləsi formada Baydenə çatdırıb”

img

Azərbaycan Prezidenti İlham Əliyev Amerika Birləşmiş Ştatlarının Prezidenti Cozef Baydenə təbrik məktubu ünvanlayıb. Məktubda deyilir:

"Hörmətli cənab Prezident, 4 İyul – Müstəqillik Günü münasibətilə Sizə və Sizin simanızda dost Amerika xalqına öz adımdan və Azərbaycan xalqı adından ən səmimi təbriklərimi və xoş arzularımı çatdırıram. 30 ildir ki, Azərbaycan Respublikası ilə Amerika Birləşmiş Ştatlarını dostluq və tərəfdaşlıq münasibətləri birləşdirir. Biz ilk gündən ölkəmizin müstəqilliyinə, suverenliyinə və ərazi bütövlüyünə ABŞ-ın dəstəyini yüksək qiymətləndiririk. Ölkələrimiz arasında qarşılıqlı faydalı əməkdaşlıq ikitərəfli və çoxtərəfli müstəvidə uğurla davam edir. Beynəlxalq təhlükəsizliyin təmin olunması və terrorizmə qarşı mübarizədə uzun müddətdən bəri davam edən birgə fəaliyyətimiz məmnunluq doğurur. Enerji təhlükəsizliyi məsələlərində ölkələrimizin sıx əməkdaşlığı, həyata keçirdiyimiz irimiqyaslı transmilli layihələrdə ABŞ-ın yaxından iştirakı və hərtərəfli dəstəyi müvəffəqiyyətimizin əsas amillərindəndir. Bu gün Azərbaycan ilə ABŞ arasında bir sıra mühüm sahələrdə strateji tərəfdaşlıq səviyyəsinə yüksəlmiş əməkdaşlığımız siyasi əlaqələrimizin də genişlənməsinə şərait yaratmışdır. Ölkələrimizin enerji, təhlükəsizlik və terrorizmə qarşı mübarizədə əməkdaşlığı nümunəvi xarakter daşıyır. Cənubi Qafqazda davamlı sülhün, iqtisadi tərəqqinin bərqərar olması üçün əlverişli şəraitin formalaşdığı bir zamanda biz ABŞ-ın Ermənistan-Azərbaycan münasibətlərinin normallaşdırılmasında, kommunikasiyaların açılmasında, insanlararası təmasların yaradılmasında mühüm rol oynaya biləcəyinə inanırıq. Eyni zamanda tərəfimizdən təqdim olunan beş prinsip əsasında Ermənistanla Azərbaycan arasında sülh müqaviləsinin hazırlanması prosesinə ABŞ-ın dəyərli töhfə verə biləcəyi qənaətindəyik. İşğaldan azad edilmiş ərazilərimizdə Ermənistan tərəfindən basdırılmış minalar burada apardığımız bərpa və yenidənqurma işlərinə ən böyük əngəl olaraq qalmaqdadır. Biz minatəmizləmə işində ABŞ-ın ölkəmizə göstərdiyi yardımı təqdir edirik. Ermənistan-Azərbaycan münaqişəsi zamanı itkin düşmüş 4000-ə yaxın soydaşımızın taleyinin aydınlaşdırılması məsələsində də ölkənizin dəstəyinə böyük ümidlər bəsləyirik.

Hörmətli cənab Prezident,

Əminəm ki, Azərbaycan ilə ABŞ-ı birləşdirən dostluq və qarşılıqlı faydalı əməkdaşlıq münasibətləri xalqlarımızın mənafelərinə uyğun olaraq birgə səylərimizlə bundan sonra da müvəffəqiyyətlə davam edəcək və genişlənəcəkdir.

Fürsətdən istifadə edərək bu bayram günündə Sizə möhkəm cansağlığı, işlərinizdə uğurlar, Amerika Birləşmiş Ştatlarının dost xalqına daim firavanlıq diləyirəm".

Göründüyü kimi, məktubda İlham Əliyevin Baydeni Ermənistanla bağlı məsələlərdə ABŞ-ı fəallığı bir az da artırmağa dəvət etdiyi məqamlar gözə dəyir. Bu detallardan hansı nəticələri çıxara bilərik?

Politoloq Qabil Hüseynli “Bakı-Xəbər” qəzetinə açıqlamasında bildirdi ki, Azərbaycan ABŞ-la  strateji tərəfdaşlığın tam bərqərar olmasını istəyir: “Buna görə də, münasibətlərin daha yüksək səviyyədə olması istiqamətində addımlar atır. Son dövrlərdə ABŞ-ın  Ermənistana yönəlik bəzi lazımsız addımlarının şahidi oluruq. Qarabağdakı  ermənilərə iki milyon dollar humanitar yardım ayırdılar, həmin ərazini yenə də “Dağlıq Qarabağ” adlandırırlar. Bütün bunlar bizi narahat edir. İlham Əliyev bu məktubunda sanki Azərbaycanın  rolu və əhəmiyyətini  yenidən Baydenin  nəzər-diqqətinə çatdırmış olur. Eyni zamanda, ondan  bir böyük dövlətin başçısı kimi Cənubi Qafqazla bağlı fəallığı artırmağa  dair gözləntilərinin olduğunu bəyan edir. Həm də  bölgəyə sülh və əminamanlığın gətirilməsinin yollarını xatırladır. Sanki ABŞ-ın  regionla bağlı siyasətinin əsas istiqamətlərinə dair ona xatırlatmalar edir. Bu məktub çox uğurlu hazırlanıb. Azərbaycan dövlətinin əsl niyyətlərini çox aydın və başa düşüləsi formada Baydenə çatdırıb. Doğrudur, biz həmin məktubda qaldırılan müddəaların dərhal həyata keçəcəyini iddia etmirik.  Məktub Azərbaycanın xarici siyasət xəttinin bütün çalarlarını özündə ehtiva edir. Azərbaycan-ABŞ münasibətlərinin daha da şəffaflaşmasına xidmət edə bilər”.

Məhəmmədəli  QƏRİBLİ

Peşə etikası

Son xəbərlər