Ermənilər Qarabağda qalmaq, özlərinin burada “yerli əhali” olduğunu sübut etmək üçün hər cür vasitəyə əl atırlar. Hər cür saxtakarlıqda mahir olan bədnam qonşularımız indi də başqa bir yöndə tamah dişlərini göstərməyə başlayıblar.
Dünənə qədər daha çox “mədəniyyət mərkəzi”, “dini mərkəzlər” açmaqda israrlı olan haylar indi də Qarabağda təhsil müəssisələri açmaq niyyətini ortaya qoyublar. Yayılan məlumatlara görə, ermənilər Azərbaycanın Qarabağ iqtisadi zonasının rus sülhməramlılarının müvəqqəti nəzarətində olan hissəsində texnikum açmaq istəyirlər. Bu barədə Gümrü şəhərində keçirilən “Tech Week Gyumri 2022”-də “Instigate mobile”ın maliyyə direktoru Spartak Kürəkyan deyib.
O bildirib ki, bu, “faciəli şəkildə” maşın vurması nəticəsində ölən 29 yaşlı Sona Mnatsakanyanın arzusu imiş və indi ermənilər birləşib, bunu gerçəkləşdirməyə çalışırlar. Ermənilər hətta texnikumun açıqlacağı yeri də müəyyən ediblər, onlar əsassız olaraq Naxçıvanik kəndini seçiblər.
“İlk məktəbə Sona Mnatsakanyanın adı veriləcək. Layihə üçün 107 min dollar toplamaq lazımdır ki, onun bir hissəsi müxtəlif fondlar sayəsində artıq toplanıb" – deyə Kürəkyan bildirib.
Məlum olduğu kimi, ermənilərin iddiası və əsassız istəkləri günü-gündən daha çox dilə gətirilir. Amma təəssüf ki, Rusiya sülhməramlıları bütün bunlara səssiz qalır, bu da bizim ərazilərdə özbaşınalığın və qanunsuz əməllərinin artmasına səbəb olur. Azərbaycanlılar öz doğma evlərinə hələ gedib çıxmayıblar, amma ermənilər orada hansısa texnikum açacaqlarını iddia edirlər.
“...Burada görülən və görüləcək hər bir işə ermənilər yox, dövlətimiz qərar verməlidir”
Azərbaycan dövlətinin iradəsi və icazəsi olmadan Qarabağ ərazisində hansısa bir təhsil müəssisəsinin açılması təşəbbüsünün irəli sürülməsinin yolverilməz olduğunu deyən Müasir İnkişaf Birliyinin sədri, siyasi şərhçi Mübariz Göyüşlü bizimlə söhbətində bildirdi ki, ermənilərin istər Ermənistanda yaşayan, istərsə də Qarabağda qalan ermənilərin Azərbaycanın suverenliyini, ərazi bütövlüyünü təhdid edən, Azərbaycanı qıcıqlandıran fəaliyyətləri, davranışları son zamanlar daha da genişlənib. “Ermənilər xarici güclərə güvənib Azərbaycan torpaqlarını 30 il ərzində işğalda saxlasalar da ordumuz 44 günlük mübaribədə onları diz çökdürdü. Ermənilər 44 günlük müharibədən dərs götürməli idi. Dəmir yumruqla başlarına dəyən ağır zərbədən sonra daha da sərsəmləməyə başlayıblar. Çox maraqlıdır ki, Ermənistan rəhbərliyi - baş nazir Paşinyan da, erməni müxalifəti də, Qarabağdakı separatçı tör-töküntüləri də, revanşist qüvvələr də mütəmadi olaraq belə qızışdırıcı açıqlamalar verirlər. Elə şeylər danışırlar ki, həqiqətən də çox gülünc səslənir. Onların Qarabağda, Naxçıvanik kəndində texnikum açmaq iddiaları da bu cür gülməli səslənir. Ermənilərin orada özbaşına nə isə etmək ixtiyarları yoxdur. Hazırda müvəqqəti olaraq rus sülhməramlılarının nəzarəti altında olan ərazilər Azərbaycanın suveren ərazisidir və burada görülən və görüləcək hər bir işə ermənilər yox, dövlətimiz qərar verməlidir”.
M.Göyüşlü hesab edir ki, o ərazilərdə Azərbaycan dövlətinin qanunları tamamilə bərqərar olmalıdır və yalnız bundan sonra hansısa texnikumdan, məktəbdən danışmaq olar. İndiki halda isə həmin texnikumun açılmasının xam xəyal olduğunu deyən M.Göyüşlünün sözlərinə görə, burada baş verəcək hər bir hadisə, Qarabağa səfərlər də daxil olmaqla, Azərbaycan hökumətinin razılığı ilə həyata keçirilməlidir. “Görünən odur ki, ermənilərin ağılları hələ də başlarına gəlməyib və bu səbəbdən də qıcıq doğuran davranışlarını davam etdirirlər. Hesab edirəm ki, Azərbaycan bu məsələdə öz mövqeyini kəskin şəkildə ortaya qoymalıdır, qoyacaq da. Bizim ərazi bütövlüyümüz üçün təhdid yaradan təxribatlarla bağlı Azərbaycan öz sözünü deməlidir və addımlar atmalıdır. Əgər ermənilərin “texnikum açmaq” adı ilə bu cür təxribatları davam edirsə, bu o deməkdir ki, onlar sakit durmaq fikrində deyillər. Çünki texnikum açmaq məsələsini ortaya atmaları onların yeni təxribatlarından xəbər verir, biz bu təxribatlara cavab verməyə hər an hazır olmalıyıq. Azərbaycan ilk fürsətdə hərbi müdaxilə də, antiterror əməliyyatı da həyata keçirməlidir. Bunu belə düşünürəm. Yoxsa başqa cür bunların ağıllanacağı yoxdur”- deyə M.Göyüşlü qeyd etdi.
İradə SARIYEVA
